Mateo i

A Maraay na Bareta na isinorat ni

San Mateo

Kapinonan

A Maraay na Bareta na isinorat ni San Mateo nagsasabi na si Jesus amo a ipinanogang Paraligtas. Sa paagi ni Jesus naotob so manga panoga ka Diyos sadto manga tawo sa Lomang Tipan. A Maraay na Baretang adi buku sana sa manga Judio, na kin sari si Jesus namundag sagkud dinnakulu, kindi sa bilog na kinaban.

Maingat na sinasabi sa libro ni San Mateo so manga nangyari sa boway ni Jesus. Pinnoon adi sadto pagkapangigin kanya, pagbunyag sagkud manga pagporbar, pangala so kanyang ministeryo sa pangangadal, pagtotottoro, sagkud pagpaparaay sadto Galilea. Pagkatapos kadi nasorat man sadi so ngamin na ginibo ni Jesus galin sa Galilea anggan sa Jerusalem sagkud so manga nangyari sa luug ko manga oring simana ko boway niya sadi raga. Adi migtapos sa pagkapako niya sa kros, sagkud pagkaboway otro.

A librong adi ipinipresentar si Jesus bilang usad na dakulung Paratottoro, na agko kapangyariyan na mag-isplikar ka Layi ka Diyos sagkud magtottoro manungud ka paghahadi ka Diyos. A manga importanteng katottoroan ni Jesus na sinasabi sa librong adi nababanga sa limang parte: (1) A Sermon sadto Bokid, na nagsasabi manungud ka pag-oogali, obligasyon, poder sagkud a paiiyanan ka manga tawong pinaghahadian kana Diyos (Mateo 5-7). (2) Manga togon sadto doseng disipolo manungud ka manga kaipowan nirang gibowon (Mateo 10). (3) Manga parabola manungud ka Paghahadi ka Diyos (Mateo 13). (4) Katottoroan manungud ka buut sabiyun ka pagigin disipolo (Mateo 18). (5) Katottoroan manungud ka magigin kataposan ka presenteng panawon sagkud sa omaabot na Paghahadi ka Diyos (Mateo 24-25).

Manga Luug

Listaan ko manga Ginikanan ni Jesus (1:1--2:23)

So Pagsirbi ni Juan na Parabunyag (3:1-12)

So Pagbunyag sagkud Pagtintar ki Jesus (3:13--4:11)

So Pagsirbi ni Jesus sadto Galilea (4:12--18:35)

Galin sa Galilea anggan sa Jerusalem (19:1--20:34)

So Oring Simana bago Magraan si Jesus (21:1--27:66)

So pagkaboway otro sagkud manga pagpapabayad ni Jesus (28:1-20)