5
A Paladan
1 Ko mabayad ni Jesus so malakadakul na tawo, tinnokad iya sadto kolod sagkud innula. Rinnapo kanya so manga disipolo niya, 2 saka pinnoon na iyang magtottoro kanda sa arug kadi,
3 “Paladan a manga tawong nag-ako na uda sira ibang maaasahan kindi a Diyos sana,
ta isan kanda a paghahadi ka Diyos.
4 Paladan a manga nagmumundu ngowan holi sa kasalan,
ta maaako nira a ragang ipinanoga ka Diyosa.
6 Paladan a manga nagmamawut na makagibo ka kabutan ka Diyos,
ta itatao ka Diyos a kandang manga minamawut.
7 Paladan a manga maeerakun,
ta kaeerakan sira ka Diyos.
8 Paladan a manga agko malinig na poso,
ta mababayad nira a Diyos.
9 Paladan a manga parapatoninung,
ta sira babaoyon na manga igin sa Diyos.
10 Paladan a manga pinapadipisilan holi ka pagsonod nira ka kabutan ka Diyos
ta makaiiba sira sa paghahadi ka Diyos!
11 Paladan kamo kin kamo minomoda, pinapadipisilan sagkud pinapakaraut ka manga tawo, holi kanaku. 12 Mag-ogma sagkud mamuya kamo, ta dakulu a kaninyong balus galin sa langit, ta arug man kan, pinadipisilan man nira so manga propetang naona kaninyo.”
Asin sagkud Liwanag
(Mk. 9:50; Lk. 14:34-35)
13 “Arug kamo sa asinb sadi kinaban. Alagad kin a asin maudaan sa asgad, paono adi mapaaasgad otro? Uda na yan pakinabang, kaya kaipowan nang iapon sagkud pag-agiagiyan ka manga tawo.
14 Arug kamo sa soloan sadi kinaban. Kin paonong a usad na syodad san ibabuw ka kolod diri natatago, kaipowan man kamong magin arug kan. 15 Uda tawong nagsosolo sa soloan na ibinubutang sa irarum ka takaran. Kindi ibinubutang adi sa tamang bubutangan tanganing maliwanggan a ngamin na nakaistar sa luug ka baluy. 16 Sa arug ka paagi, kaipowan ninyong paliwanggun a kaninyong sadiri sa atobangan ka manga tawo, tanganing mabayad nira a maraay ninyong gibo sagkud oomawun a kaninyong Ama na nasa langit.”
A Katottoroan manungud sa Pagsonod ka ngamin na Layi ka Diyos
17 “Diri kamo mag-isip na inniyan ako sadi tanganing alinan sa alaga so Layi ni Moises sagkud so manga katottoroan ko manga Propeta. Inniyan ako sadi tanganing maotob a ngamin na an. 18 Sinasabi ko kaninyo a kamatoranan, anggan na omabot na a langit sagkud a raga mauda, dawa a pinakasadit na litra sagkud korit ka Layi diri mauudaan sa alaga anggan na a ngamin na katoyowan kadi diri pa naootob. 19 A siisay man na diri komoyog ka pinakasadit na parte ka Kasoratan sagkud magtottoro na diri komoyog kan, maibibilang iyang pinakasadit sa manga pighahadian ka Diyos. Alagad a siisay man na komoyog sagkud magtottoro manungud ka Layi, ibibilang iyang dakulu sa manga pighahadian ka Diyos. 20 Sinasabiyan ko kamo, diri kamo makaiiba sa pighadian ka Diyos kin diri ninyo malalampasan so pagkoyog ko manga paratottoro sa Layi sagkud ka manga Pariseo sa paggibo ka kabutan ka Diyos.”
A Katottoroan manungud ka Kaungutan
21 “Narungug na ninyo na iminanda kadto sadto kaninyong manga ginikanan, ‘Diri ika mangguraan, sagkud siisay man a mangguraan, oosgaran.’ 22 Alagad ngowan sinasabi ko kaninyo, na a siisay man na maungut sa ngod niyac, oosgaran. A siisay man na manginsolto sa ngod niya, dadarawun sa Konseho. Sagkud a siisay man na somabing, ‘Patal ika!’ Namimilegrong iapon sa impiyerno.
23 Kaya kin mig-atang ika sa Diyos sagkud narumruman mo na agko kanimo raut sa buut so ngod mo, 24 bayaan mo ngona a atang sadto atobangan ka altar. Pomaiyan ika sagkud makipag-osay sa ngod mo, pangala bomalik ika tanganing mag-atang sa Diyos.
25 Makipag-osay tolos ika ka tawong innakosar kanimo, mantang diri pa dinadara sa osgado a kaso mo. Ta kin diri, itatao ika niya sa owis na migdara man kanimo sadto gwardiya na migpriso kanimo. 26 Sinasabi ko kanimo a kamatoranan, diri ika makalolowas sadto anggan na diri mo nababayaran a oltimong sentimo na kaipowan mong bayaran.”
Katottoroan manungud sa Pananambay
27 “Narungug na ninyo na iminanda na, ‘Diri ika makiolod sa buku mong agom.’ 28 Alagad ngowan sinasabi ko kaninyo na a siisay man na somilung sa usad na babayi na agko salang motibo sa poso niya, iya nagkasala na sa pananambay. 29 Kin a mata mo amo a rason ka pagkakasala mo, ilwatun mo sagkud iapon. Mas maraay pang maalinan sa usad na parte ka awak kisa bilog na awak a maiapon sa impiyerno. 30 Saka kin a kamut mo a magin rason ka pagkakasala, potolon mo yan sagkud iapon. Mas maraay pang maalinan sa usad na parte ka awak kisa a bilog mong awak a maiapon sa impiyerno.”
Katottoroan manungud sa Pagsoway ka Mag-agom
(Mt. 19:9; Mk. 10:11-12; Lk. 16:18)
31 “Itinottoro man kadto, ‘A siisay man na makisoway sa agom niyang babayi, kaipowan niya ading tawan sa kasoratan sa pakikipagsoway. 32 Alagad ngowan sinasabi ko kaninyo, kin sinowayan ka lalaki a kanyang agom na diri man nagpapasambay, iya a nagigin rason na so agom niya magkasala sa pagpapasambay kin magpaagom adi otro. Sagkud a siisay man na nangagom sa babaying sinowayan, nagkakasala man sa pananambay.’ ”
A Katottoroan manungud sa Panonompa
33 “Narungug ninyo otro na iminanda na sa manga tawo uban nang panawon, ‘Diri mo pag-alinan sa alaga a kanimong panoga, kindi gibowon mo a isinompa mo sa Kagorangnan.’ 34 Alagad, ngowan sinasabi ko kaninyo, nongka kamong manompa kin kamo nanonoga, ‘Testigo ko a langit,’ ta adi trono kana Diyos. 35 ‘Testigo ko a kinaban,’ ta adi a tongtongan kana Diyos. ‘Testigo ko a Jerusalem,’ ta adi a syodad ka Dakulung Hadi. 36 Sagkud diri kamo manompang, ‘Pogotan man ako!’ Ta ni a usad na book ka payo mo diri mo kayang papotiun o paitumun. 37 Sabiyun mo na sanang, ‘Amo kin amo,’ ‘Diri kin diri’ ta ono pa man na irogang mo, naggagalin na yan ki Satanas.”
A Katottoroan manungud sa Pagbalus
(Lk. 6:29-30)
38 “Narungug na ninyong sinabi, ‘Mata sa mata, ngipun sa ngipun.’ 39 Alagad sinasabiyan ko kamo ngowan, diri na ninyo pagbalusun a ginnigibo kaninyo sa maraut. Kin sampalingun ika sa too mong pisngi, ipasampaling mo pa a sa wala. 40 Kin agko kanimo omakosar ta gosto niyang koon a bado mo, itao mo na pati a pang-alikbuy mo. 41 Kin agko kanimo magpipirit na magpaiba sa usad na kilometro, ibanan mo iya abot sa darwang kilometro. 42 Tawan mo a innaayat kanimo, sagkud diri mo pagsayomaan a gostong manguram kanimo.”
Mabutan mo a Kasogot mo
(Lk. 6:27-28, 32-36)
43 “Narungug na ninyong sinabi kadto, ‘Mabutan mo a ngod mo sagkud maungut ika sa kasogot mo.’ 44 Alagad amo adi a sabi ko, ‘Mabutan ninyo a manga kasogot ninyo, sagkud ipangadyi a nagpapadipisil kaninyod,’ 45 tanganing kamo magin tonay na manga igin ka kaninyong Amang nasa langit. Ta iya a nagpapasilaw ka alduw sa manga mararaay sagkud mararaut saka nagpapaoran sa manga matanos sagkud bukung matanos. 46 Kin a nabubuut sana kaninyo a nabubutan ninyo, ono pang balus a makokoko ninyo? Bukung arug man kan so ginibo ko manga parasingil sa bowise? 47 Sagkud kin a manga ngod sana ninyo a manga sinisisino ninyo, ono a mas orog na ginibo ninyo kisa iba? Bukung arug man kan so ginibo ko manga bukung Judio? 48 Kaya kaipowan na uda kasagkuran a paggibo ninyo sa karayan, arug ka kaninyong Amang nasa langit na uda kasagkuran a paggibo sa maraay.”