A Maraay na Bareta na isinorat ni
San Marcos
A Maraay Na Bareta manungud ki Jesu Cristo na isinorat ni Marcos
Manungud Ka Librong Adi
A Maraay na Baretang adi manungud ki Jesu Cristo isinorat ni Marcos amo a pinakaonang naisorat na libro manungud ki Jesus. Pinaniniwalaan na isinorat a librong adi para sa manga bukung Judio ko si Marcos sadto Roma. Kadaklan ka manga nag-aadal sa Bibliya naniniwala na isinorat adi ni Marcos ko manga A.D. 50 o kaya manga A.D. 60. TagaJerusalem a kag-igin na babayi ni Marcos sagkud medyo oroagkowon sa boway. A ngaran niya Maria (Gibo 12:12). Kadaklan ka manga nag-adal sa Bibliya nagsasabi na si Marcos amo si Juan Marcos na pinsan ni Barabas (Col. 4:10) na inniba kanda ki Pablo sagkud Barabas ko onang pagpangadal nira sa ibang nasyon. Nagin korokaiba ni Pedro si Marcos ko nangangadal si Pedro manungud ki Jesus. Sinasabi man ka kadaklan na nag-adal ka Bibliya na naisiyan ni Marcos ki Pedro kin ono so manga ginibo sagkud manga itinottoro ni Jesus.
Ipinapabayad sa librong adi na malaka importanti ko manga kasakitan na inagyan ni Jesus sagkud ko manga milagro sagkud manga ngangalasan na ginibo niya para sa pagbisto kanya sagkud ka Diyos. Kaya dawa sinabi tolos ni Marcos sa kapinonan ka librong adi na si Jesus a Cristo sagkud Igin sa Diyos, isinorat pa nanggayud na niya a librong adi anggan sa kataposan tanganing diskobriyun ka manga migbasa kin si siisay si Jesus. Malinaw na inistorya ni Marcos so ngamin na ginibong pagparaay ni Jesus sagkud so ngamin niyang ginibong manga milagro tanganing ipabayad na agko iya kapangyariyan arug sa Diyos ta iya Diyos. Binibinsir ka librong adi na kaipowan na maintindiyan sagkud bistowon ka manga migbasa na si Jesus amo a Cristo sagkud a tonay na Igin sa Diyos. Usad na alimbawa kadi amo so pagtobod ko usad na Romanong soldados ki Jesus ko sabiyun niyang, “Tonay talagang Igin sa Diyos a tawong adi!”
Sadi maaksyon na librong adi mababayad na so kagostowan ka Diyos amo pa nanggayud na nangyari dawa kadakul ko manga nagin ulang. Ipinababayad sa librong adi na diri nagtobod so manga namomoon na padi, so manga paratottoro ka Layi ni Moises sagkud so iba pang manga namomoon na Judio na si Jesus Diyos. Imbes, nagmaigut sira na ipaguraan si Jesus. Malinaw man sa librong adi na nabayad ko manga demonyo so kapangyariyan ni Jesus kaya isi nira na iya Diyos.
Kinokonbinser ni Marcos a manga migbasa na kaipowan magtobod sira na si Jesus agko kapangyariyan na parayun a si siisay man na agko ilang, magpalayas sa demonyo sagkud agko kapangyariyan na bomoway sa guraan. Ipinapabayad man ni Marcos sa librong adi na bukung madaling mamoway bilang usad na nagtotobod ki Jesus. Kinakaipowan niyang somonod ki Jesus sa paagi ka pagserbi sa iba sagkud kinakaipowan niyang magin andam na magsakit arug ko ginibo ni Jesus. Sa pagtatapos ka librong adi, ipinabayad ni Marcos na a Diyos naglalaom na ipapangadal ka manga nagsosonod kanya a Maray na Bareta manungud ki Jesu Cristo arug ko pagpangadal ko manga disipolo niya.
Manga Luug ka Librong Adi
A pagpoon ka Maray na Bareta manungud ki Jesus 1:1 - 13
A pagministeryo ni Jesus sadto Galilea 1:14 - 9:50
A pagministeryo ni Jesus sadto Judea 10:1 - 52
A pagpako ki Jesus sadto Jerusalem 11:1 - 15:47
A pagkaboway otro ni Jesus 16:1 - 20