Marcos 1

A Maraay na Bareta na isinorat ni

San Marcos

A Pagpriparar ni Juan na Parabunyag ko Pag-abot ni Jesu Cristo

(Mateo 3:1-12; Lukas 3:1-9, 15-17; Juan 1:19-28)

^1-2 Amo adi a Maray na Bareta manungud ki Jesus na binabaoy na Cristo na Igin ka Diyos. Nagpoon adi ko mangyari so sinabi ka Diyos manungud ko Igin niya oyon sadto isinorat ni Propeta Isias na a sabi,

“Taan, ipinapadara ko a kanakung minsahero na naona kanimo,

iya a migpriparar ka aagyan mo.

^3-4 Pakagrat niyang sinabi sadto manga tawong isadto usad na pwerang logar so arug kadi,

‘Ianda sagkud tolidun ninyo a aagyan ka Kagorangnan.’ ”

Iya amo si Juan na Parabunyag. Tinottoroan man ni Juan so manga tawo sadto pwerang logar na adto na kinakaipowan sirang magpabunyag tanganing ipabayad na sira nagsusulsul na ko manga kasalanan nira sagkud patatawarun sira ka Diyos. ⁵ Kaya nag-iriyanan kanya so malakadakul na tawo galin sa Judea sagkud Jerusalem na nagsusulsul ko manga kasalanan nira. Pangala binunyagan sira ni Juan sadto salog na binabaoy na Jordan.

⁶ Gibo sa bogaybo sa ayup na kamelyo so bado niya sagkud so paha niya gibo sa anit pagkatapos manga lokton sagkud tanggoli so pagkaun niya. ⁷ Sinabi pa niya sadto manga tawo, “Agko omaabot na nakasosonod kanaku. Mas makapangyariyan iya kisa kanaku. Kaya, buku basang akong angay dawa pa magin usad na oripun na tagaopso ka sandalyas niya. ⁸ Binubunyagan ko kamo sa paagi ka tobig alagad bubunyagan niya kamo sa paagi ka Espirito Santo.”

Pagbunyag ni Juan ki Jesus

(Mt. 3:13-17; Lk. 3:21,22)

⁹ Diri nauban pagkatapos kadi, innabot si Jesus sadto salog na binabaoy na Jordan. Galin iya sa Nazaret na nasa rehiyon ko Galilea. Pangala, binunyagan iya ni Juan sadto Jordan. ¹⁰ Pagkaawas tolos ni Jesus sadto tobig, nabayad niya so langit na naboksan sagkud so Banal na Espirito na bagana kalapating tinnogpa kanya. ¹¹ Pangala, agko boses na nagngabil galin sadto langit, “Ika a nabubutan kong igin. Naoogma ako kanimo saigo.”

Diri Natintaran ni Satanas si Jesus

(Mt. 4:12-17; Lk. 4:14-15)

¹² Pagkatapos kadi, dinara tolos si Jesus ko Espirito Santo sadto pwerang logar. ¹³ Nagtiner iya sadto sa luug sa kwarentang alduw. Sa luug sa kwarentang alduw na adi, pinagparatintaran iya ni Satanas alagad diri iya natintaran. Sadto logar na adto agko manga layas sagkud maiisug na ayup sagkud agko man sadto manga anghel na nagsisirbi ki Jesus.

Nagpoon na Mangadal si Jesus

¹⁴ Pangala, napaiyan sagkud nangadal si Jesus sadto Galilea. Itinottoro niya so Maraay na Bareta manungud sa paghahadi ka Diyos. Nangyari adi pagkatapos na rakupun si Juan. ¹⁵ Pagkatapos sinabi niya, “Innabot na a tamang panawon na arani nang ipabayad a paghahadi ka Diyos. Magsulsul na kamo ka manga kasalan ninyo sagkud magtobod ka Maraay na Bareta.”

Pagbaoy ko Onang manga Disipolo

(Mt. 4:18-22; Lk. 5:1-11)

¹⁶ Pangala, mantang nag-aagi si Jesus sadto pangpang Ranuw Galilea, nabayad niya so magngod na Simon sagkud Andres na namomokot. ¹⁷ “Somonod kamo kanaku tanganing magin manga disipolo ko sagkud totottoroan ko kamo kin paono mangombinsir sa manga tawo.” sabi ni Jesus kanda. ¹⁸ Kaya lang daling binayaan ko magngood so laya pagkatapos nagsonod kanya.

¹⁹ Nagpadagos sa pag-agi si Jesus, pangala ko makarayo sa gatikot, nabayad niya so magngod na Santiago sagkud Juan, manga igin ni Zebedeo. Nakalonad sira sa bangka ta pinapakaraay nira so laya. ²⁰ Binaoy man sira ni Jesus, “Mayang, somonod kamo kanaku.” Kaya binayaan tolos nira so kag-igin nira sagkud so ibang manga katabang sadto bangka pagkatapos sinnonod ki Jesus.

Pinalayas ni Jesus so Maraut na Espirito

(Lk. 4:31-37)

²¹ Pangala, nagpaiyan si Jesus sagkud so manga disipolo niya sadto logar na a ngaran Capernaum. Pag-abot ko alduw na Sabado, a alduw na pagpaingalo ko manga Judio, nag-iyan tolos sira sadto sinagoga, pagkatapos nagtottoro si Jesus sadto. ²² Nagngalas so manga tawo sadto klase ko pangangadal niya ta nagtottoro iya na agko kapangyariyan, bukung pareyo ko pangangadal ko manga paratottoro ko Layi ni Moises. ²³ Kadto man na oras na adto sadto luug ko sinagoga agko usad na lalaking sinasaniban sa maraut na espirito na biglang kinnagrat, ²⁴ “Onong labut mo kanamu Jesus na tagaNazaret? Ono nagpaiyan ika sadi tanganing pasakitan kami? Bisto ko kin siisay ika, ika a Banal na ipinadara ka Diyos!” ²⁵ Alagad sinabiyan iya ni Jesus, “Pomondo ika! Lomayas ika sa lalaking iton!” ²⁶ Pangala, pinangubugkubug so lalaki ko maraut na espirito sagkud nagkagrat pagkatapos linnayas adi. ²⁷ Ngamin na isadto biyong nagngalas ko nangyari kaya nag-orongaan sira, “Amo adi so ono? Usad na makapangyariyan na pagtottoro! Ta oltimong maraut na espirito namamandan niya.” ²⁸ Holi kadi, lang daling linnuyap so bareta manungud ki Jesus sa bilog na rehiyon ko Galilea.

Binolong ni Jesus so Kadakul na Nag-iilang

(Mateo 8:14-17; Lukas 4:38-41)

²⁹ Paggalin nira sadto sinagoga dinniritso tolos si Jesus kaiba sira si Santiago sagkud Juan sadto baluy nira ni Simon sagkud Andres. ³⁰ Pag-abot nira sadto baluy sinabiyan nira si Jesus na nakabatang so panogangan na babayi ni Simon ta kalintora. ³¹ Kaya iniyanan niya adi sadto luug, kinaptan niya so kamut tapos tinabangan niyang bomangon. Pagkabangon niya, nauda tolos so kalintora kaya iniposan niya sa pagkaun sira si Jesus.

³² Pangala pagkasulnud ko alduw, kadakul na manga nag-iilang sagkud sinasaniban sa demonyo so dinara kanya. ³³ Malakadakul na tawo sadto logar na adto so nagtipon sadto atobangan ko baluy na adto. ³⁴ Pagkatapos, binolong ni Jesus so ngamin na agko ilang, onoman na klasing ilang. Pinalayas man niya so manga sinnanib na demonyo sadto ibang manga tawo sagkud diri niya sira pinirmitaran na magparangabil ta bisto kaya iya nira.

Nangadal si Jesus sadto Galilea

(Lk. 4:42-44)

³⁵ Kinaramragi, malakaamay na binnangon ni Jesus, pangala, nag-iyan iya sa usad na pwerang logar tapos nangadyi iya sadto. ³⁶ Kaya inanap iya ni Simon sagkud ko iba pang manga kaiba niya. ³⁷ Ko matorakan nira si Jesus, sinabi nira kanya, “Ngamin po nag-aanap kanimo.” ³⁸ Sinnimbag si Jesus, “Mosna, iyanan ta a manga kaabay na banwaan ka logar adi tanganing maipangadal ko man a Maraay na Bareta sadto ta amo adi a katoyowan kin ngata ta nag-abot ako.” ³⁹ Kaya iniyanan niya so manga logar sadto rehiyon ko Galilea sagkud nangadal iya sadto manga sinagoga. Pinalayas man niya so manga sinnanib na demonyo sadto ibang manga tawo.

Pinaraay ni Jesus so Usad na Pudpurun

(Mt. 8:1-4; Lk. 5:12-16)

⁴⁰ Usad na pudpurun so rinnani pangala tinniklod sadto atobangan ni Jesus sagkud nagmakaerak kanya. Sinabi niya, “Kin gogostowon mong maraay ako, kaya mo yan na gibowon.” ⁴¹ Naerak saigo si Jesus kaya kinaptan niya adi sagkud sinabi, “Gosto ko. Maraay ika!” ⁴² Kadto tolos, nauda so pudpud ko lalaki kaya nagraay so pagmati niya. ⁴³ Pinagalin tolos ni Jesus so lalaki, alagad bago niya adi pinagalin, sinabiyan iya ni Jesus, ⁴⁴ “Diri mo ipag-istorya kiisay man so nangyari imbes ipabayad mo sadiri mo sa padi na ika maraay na sagkud mag-atang ika oyon sa katottoroan ni Moises. Amo yan a magigin testigo mo sa atobangan ka manga tawo na ika maraay na.” ⁴⁵ Alagad ipinagparapangistorya ko lalaki so nangyari, kaya diri na si Jesus ayagan na makaiyan sa manga banwaan ta kadakul nang manga tawo so nag-uulat kanya. Nagpirmi na sana logod iya sa manga pwerang logar alagad iniiyanan pa nanggayud iya ko katatawowan na kin sarisari na sana galin.