8
So Lalaking Pudpurun
(Mk. 1:40-45; Lk. 5:12-16)
1 Ko romos'og na si Jesus galin sadto bokid, kadakul ko manga tawong sinnonod kanya. 2 Pangala agko usad na pudpurun na rinnapo kanya. Tinniklod adi sadto atobangan niya sagkud sinnabing, “Maestroa, parayun mo tabi ako ta isi ko na mapararaay mo akobkin kagostowan mo.”
3 Iinunat ni Jesus so kamut niya sagkud irinuta sadto lalaki, “Gosto kong maraay ika,” sabi ni Jesus. Kadto tolos naraay so pudpud niya. 4 Pangala sinabi ni Jesus kanya, “Diri mo adi pagsabiyun sa kiisay man. Alagad magpabayad ika sa manga pading Judio sagkud magtao ika sa atang arug ko ipinagbuut ni Moises bilang pagpatonay mo.”
So Pagtobod ko Kapitan
(Lk. 7:1-10)
5 Ko magluug si Jesus sa banwaan ko Capernaum, rinnapo kanya so usad na kapitanc sagkud innayat sa tabang, 6 “Maestro,” sabi niya, “so mamandaan ko sadto baluy nakabatang ta paralisado sagkud grabi a pagsakit.”
7 Sinabi ni Jesus kanya, “Paiiyan ako sagkud pararayun ko iya.”
8 Sinnimbag so kapitan, “Maestro, buku po akong angay na iyanan mo sa baluy ko. Sabiyun mo po sana, saka mararaay so mamandaan ko. 9 Isi ko tabi adi ta nasasakupan man ako ka nakatataas na opisyal, sagkud agko man ako nasasakupan na manga soldados. Pagsinnabi ako sadto usad na, ‘Omagi ika,’ omaagi man iya, sagkud sadto usad na, ‘Mayang sadi,’ romarapo man iya, saka pag sinabi ko sa oripun ko na, ‘Gibowon mo adi!’ Ginigibo man niya.”
10 Ko marungug adto ni Jesus, nagngalas iya sagkud sinabiyan niya so manga sinnosonod kanya, “Sinasabi ko kaninyo a kamatoranan, diri pa ako nakatorak sa Israel sa arug kadi kadakulung pagtobod. 11 Sinasabi ko kaninyo, dakul na manga bukung Judio a miggalin sa manlainlain na nasyon kaiba na so galin sa sirangan sagkud sulnuran na makaiibang migkaun sadto ki Abraham, Isaac sagkud ni Jacob sa paghahadi ka Diyos sadto langit. 12 Alagad dakul na manga Judio na amo kintana a makaiiba sa paghahadi ka Diyos, a iaapon sa kangitngitan ka impiyerno. Sagkud migragut a kandang manga ngipun sa sobrang kulug.”
13 Pangala, sinabi ni Jesus sadto kapitan, “Omoli na ika! Mingyari a inaayat mo sigon ka pagtobod mo.” Kaya so mamandaan naraay ko oras man sanang adto.
Dakul so Pinaraay ni Jesus
(Mk. 1:29-34; Lk. 4:38-41)
14 Pangala nag-iyan si Jesus sadto baluy ni Pedro, nabayad niya so panogangan niya na nakabatang ta kinakalintora. 15 Kinaptan niya so kamut ko babayi kaya nauda so kalintora, pangala binnowat so babayi sagkud pinagsirbiyan iya.
16 Ko gab'i na, kadakul ko manga nasaniban sa demonyo so dinara kanya, pangala pinalayas niya so manga mararaut na espirito sa paagi ko kapangyariyan ko kanyang oosipun kaya naraay so ngamin na agko ilang. 17 Sa ginibo niyang adi naotob so sinabi ni Propeta Isaias,
“Inalin niya so manga ka'ilangan ta
sagkud pinaraay so manga kamatian ta.”d
A Alaga ka Pagsonod ki Jesus
(Lk. 9:57-62)
18 Ko mabayad ni Jesus so kadakul na tawong nakapalibot kanya, minandaan niya so manga disipolo na lomoyo sira sadto ranuw. 19 Mantang nag-aagi sira paiyan sadto bangka, rinnapo kanya so usad na paratottoro sa Layi sagkud sinnabing, “Maestro, somosonod ako kanimo sari man ika pomaiyan.”
20 Sinnimbag si Jesus, “A manga amid agko baang sagkud a manga bayong agko salagan, alagad ako na binabaoy sa Igin sa Tawo, uda sadiring baluy na matorogan.”
21 So usad man na disipolo niya sinnabi kanya, “Maestro, togotan mo akong pomaoli ngona sagkud ilubung so kanakung ama.”
22 Alagad sinabiyan iya ni Jesus, “Somonod ika kanaku, ta a siisay man na uda ka boway na uda kasagkuran guraan sa pagsilung ka Diyos. Pabayaan ninyo a manga tawong an maglubung ka manga guraan nira.”
Pinapondo ni Jesus so Bagyo
(Mk. 4:35-41; Lk. 8:22-25)
23 Pangala linnonad iya sadto bangka sagkud so manga disipolo niya sinnonod kanya. 24 Mantang nagsasakuy sira, biglang innabot so makusug na angin, sagkud alos matawban na sa daddakulung alun so bangka nira. Alagad si Jesus malakatorog. 25 Kaya rinapo sagkud ginisung iya ko manga disipolo sagkud sinnabing, “Maestro, iligtas mo kami! Malulunud na kita!”
26 Sinnimbag iya, “Ngata kamo ta nakatatakot? Malakasadit ka kaninyong pagtobod!” Pangala binnowat iya sagkud pinagsabiyan so angin na pomondo saka so alun tomoninung. Saka pinnondo man so angin sagkud nagtoninung so alun.
27 Nagngalas so manga disipolo sagkud innonga, “Onong klasing tawo adi? Ta maski a angin sagkud alun kinnokoyog kanya!”
So Pagparaay ko Darwang Lalaking Nasaniban
(Mk. 5:1-20; Lk. 8:26-39)
28 Pag-abot ni Jesus sadto loyo, sa logar ka Gadareno, sinabat iya sa darwang lalaking nasaniban galin sadto kamposanto. Malang isug nira kaya uda ni usad na innaagi sa aagyan na adto. 29 Pangala nagkagrat sira, “Ono pakilabut mo kanamu, Igin sa Diyos? ono ika, inniyan sadi tanganing pasakitan kami dawa buku pang panawon para kan?”
30 Sadto oroarayo agko kababaktinan na nagdodongkal. 31 Kaya nakimaerak so manga demonyo ki Jesus, “Kin pagagalinun mo kami, paiyanun mo na sana kami sadto kababaktinan.”
32 Sinabi niya kanda, “Sige, gomalin na kamo!” Kaya linnowas so manga demonyo sadto darwang lalaki sagkud linnuug sadto kababaktinan. Nagpandalagan adi sadto ampas, dorodiretso sadto ranuw sagkud nagkalulumus. 33 So manga paraataman ko manga baktin nagpandalagan paiyan sadto banwaan sagkud sinabiso ngamin na nangyari, pati so nangyari ko manga sinaniban sa demonyo. 34 Kaya so ngamin na tawo linnowas sadto banwaan sagkud iniyanan si Jesus sagkud nakimaerak kanya na gomalin na sadto logar nira.