Mateo 9

Pinaraay ni Jesus so Usad na Paralisado

(Mk. 2:1-12; Lk. 5:17-26)

¹ Linnonad sira Jesus sa bangka, sagkud nagsakuy paiyan sadto loyo ko ranuw saka nagderetso sadto sadiri niyang banwaan. ² Ngowan dinara kanya ko nagkapirang tawo so usad na paralisado na nakabatang. Ko mabayad ni Jesus so kandang pagtobod, sinnabi iya sadto paralisado, “Igin ko, kusgan mo a buut mo! Pinapatawad na ika ka manga kasalan mo.”

³ Kaya sinabuut ko manga paratottoro sa Layi, sagkud sinnabi sira sa kandang sadiri, “Iniisip ka lalaking adi na kapareyo iya ka Diyos!”

⁴ Alagad isi ni Jesus kin ono so manga naiisip nira, kaya sinabi ni Jesus kanda, “Ngata ta nag-iisip kamo sa maraut? ⁵ Ono a mas madaling sabiyun, ‘Pinatatawad na ika ka manga kasalan mo.’ O sabiyun na, ‘Tomindug ika sagkud omagi’ ? ⁶ Kaya agko ako gigibowon tanganing maisiyan ninyo na akong Igin sa Tawo tinawan sa kapangyariyan ka Diyos na magpatawad ka manga kasalan sadi kinaban. Kaya sinabi niya sadto paralisado, ‘Tomindug ika, darawun mo a batangan mo, sagkud pomaoli na ika.’ ⁷ Kaya so lalaki tinnindug sagkud napaoli. ⁸ Ko mabayad adto ko manga tawo, nakatakot sira saigo sagkud nag-omaw sa Diyos, na amo tinnao sa arug kading kapangyariyan sa manga tawo.”

So Pagkabaoy ki Mateo

(Mk. 2:13-17; Lk. 5:27-32)

⁹ Ko pagalin na sadto si Jesus, nabayad niya so usad na lalaki na a ngaran Mateo na nakaula sadto opisina ko singilan sa bowis, sagkud sinabi ni Jesus kanya, “Somonod ika kanaku.” Tinnindug man si Mateo sagkud sinnonod kanya.

¹⁰ Mantang nagkakaun si Jesus sagkud so manga disipolo niya sadto baluy ni Mateo, innabot so dakul na parakasala sagkud dakul na parasingil sa bowis. Innula sira sagkud nagkaun na kaiba si Jesus. ¹¹ Ko mabayad adto ko manga Pariseo, inonga nira so manga disipolo, “Ngata ta a maestro ninyo kasabay na nagkakaun ka manga parasingil sa bowis sagkud manga parakasala?”

¹² Narungug adto ni Jesus, kaya sinabiyan niya sira, “Diri nangangaipo sa parabolong a tawong uda ilang, kindi adto sanang manga nag-iilang. ¹³ Omagi kamo sagkud pag-isipan kin ono a buut sabiyun ko sinabi ka Diyos sa Kasoratan, ‘Pagkaerak a kaipowan ko, bukung atang.’ Ta diri ako inniyan sadi tanganing baoyon a manga matanos, kindi a manga parakasala.”

Inonga si Jesus manungud ka Pag-aayono

(Mk. 2:18-22; Lk. 5:33-39)

¹⁴ Pangala, inniyan kanya so manga disipolo ni Juan na Parabunyag sagkud innonga, “Ngata ta kami sagkud a manga Pariseo pirming nag-aayono, alagad a manga disipolo mo diri nag-aayono?”

¹⁵ Sinnimbag si Jesus, “Kaipowan raw na magmundu a manga bisita sa kinasalan mantang kaiba pa nira a nobyo? Omaabot a panawon na a nobyo aalinun sa kaibaan nira saka sira mig-ayono.

¹⁶ Sagkud uda nagtatagabbo sa bagong tela sa usad na lomang bado, ta a itinagabbo amo man sana a gomagasi ko lomang bado, kaya orog pang lomalakbang a gasi. ¹⁷ Sagkud uda man nagpapalis ka bagong alak sa lomang bubutangan na anit. Ta kin arug kan a gigibowon, pomopotok a anit, maoola a alak sagkud mararaut a bubutangan. Kaya a bagong alak kaipowan na ibutang sa bagong bubutangan, tanganing pareyo sirang maistak.”

Pagboway otro ko Igin ko Namomoon sagkud Pagparaay ko Usad na Babayi

(Mk. 5:21-43; Lk. 8:40-56)

¹⁸ Mantang nag-oosip si Jesus kadi, so usad na namomoon sa Judio innabot sagkud tinniklod sa atobangan niya sagkud sinnabi, “Kaguguraan pa sana tabi ko igin kong babayi. Alagad kin omiba ika kanaku sagkud rutaan mo iya ka kamut mo maboboway iya otro.” ¹⁹ Kaya tinnindug si Jesus sagkud inniba kanya, pati man so manga disipolo niya.

²⁰ Mantang nag-aagi si Jesus, sinnonod kanya so usad na babayi na doseng taon nang pigpapararogo sagkud rinnapo sadto tarikoran niya pangala rinutaan so gayad ko bado niya. ²¹ Ta sinabi niya sa sadiri, “Kin marutaan ko sana a bado niya, mararaay na ako.”

²² Linnilili si Jesus sagkud pagkabayad kanya sinnabing, “Igin ko, kusgan mo a buut mo. Pinaraay ika holi ka pagtobod mo.” Kadto tolos naraay so babayi.

²³ Ko omabot na si Jesus sadto baluy ko namomoon, narungug niya so manga nagtotogtog sa plawta sagkud so manga tawo na malang riribok. ²⁴ Sinabiyan niya sira, “Lomowas ngona kamo. Bukung guraan a igin, kindi natotorog sana!” Alagad pinagtaw-an iya ko manga tawo. ²⁵ Ko mapalowas na so manga tawo, linnuug si Jesus sagkud kinaptan niya so kamut ko igin, pangala so igin binnangon. ²⁶ Linnuyap a baretang adi sa bilog na rehiyon.

Nakabayad so Darwang Bota

²⁷ Pagkagalin ni Jesus sadto, sinondan iya ko darwang bota na nagrarait, “Erensiya ni David! Kaerakan mo kami!”

²⁸ Ko makaluug na iya sadto baluy, rinnapo kanya so darwang bota sagkud inonga sira ni Jesus, “Nagtotobod kamo na mapararaay ko kamo?”

“Opo, Kagorangnan,” simbag nira.

²⁹ Pangala rinutaan ni Jesus so manga mata nira sagkud sinnabi, “Holi ka kaninyong pagtobod, mararaay kamo.” ³⁰ Kaya nakabayad sira. Tinogon sira saigo ni Jesus, “Diri ninyo adi pagsabiyun dawa kiisay.” ³¹ Alagad ko makagalin na sira, ipinamareta nira so ginibo ni Jesus kanda sadto bilog na rehiyon.

Pinaraay ni Jesus so Ngolang Sinasaniban ko Demonyo

³² Ko pagalin na si Jesus sagkud so manga disipolo niya, dinara kanya so usad na ngola na sinasaniban sa demonyo. ³³ Pinalayas ni Jesus so demonyo kaya nakangabil na so ngola. So manga tawo nangalas sagkud sinnabi, “Uda pa kita nabayad na arug kadi sa bilog na Israel!”

³⁴ Alagad sinnabi so manga Pariseo, “A namomoon ka demonyo amo a nagtatao kanya sa kapangyariyan na magpalayas ka manga demonyo.”

Naerak si Jesus sadto manga Tawo

³⁵ Linibot ni Jesus so ngamin na banwaan sagkud baryo sagkud nagtottoro iya sadto kandang manga sinagoga. Ipinaayag niya a Maraay na Bareta manungud ka paghahadi ka Diyos. Sagkud pinaraay niya so ngamin na klase sa ka-ilangan sagkud kamatian. ³⁶ Ko mabayad niya so malakadakul na tawo, naerak iya kanda holi ta nalilibungan sagkud nanloloya sira, na bagana manga karnero na uda paraataman. ³⁷ Kaya sinabi niya sa manga disipolo, “Kadakul ka aaniyun, alagad kagagatikot ka paraani. ³⁸ Kaya ipangadyi ninyo sa Kagorangnan na amo a kagsadiri ka manga aaniyun na magpadara sa manga paraani.”