7
Pag-osgar sa Kapwa
(Lk. 6:37-38, 41-42)
1 “Diri kamo mang-osgar tanganing diri man kamo osgaran ka Diyos. 2 Ta oosgaran kamo ka Diyos kin paono ninyo inoosgaran a kaninyong kapwa.
3 Sagkud ngata ta nababayad mo a sala ka ngod mo na bagana kosot sa mata niya, alagad diri mo nababayad a dakulung sala mo na bagana kawoy sa mata mo? 4 Paono mo sasabiyun sa ngod mong, ‘Alinun ko raw a kosot sa mata mo,’ na kin a sadiri mong mata agko dakulung kawoy? 5 Parasaginsagin! Alinun mo ngona a dakulung kawoy sa mata mo, tanganing makabayad ika saigo sagkud maalin mo na a kosot sa mata ka ngod mo.
6 Pangala sinabi ni Jesus, ‘Diri ninyo ipagtottoro a manga bagay manungud sa Diyos sa manga mararaut na tawo ta arug sira sa baktin na nagraraut sa maalagang bagay sagkud ayam na nangangagat. ’ ”
Padagos na Nagtottoro si Jesus sa Pagpapangadyi
(Lk. 11:9-13)
7 “Padagos kamong omayat sa Diyos, ta itatao yan kaninyo, padagos kamong mag-anap ta makatotorak kamo sagkud padagos kamong magtoktok ta kamo boboksan. 8 Ta a siisay man na nag-aayat, tatawan, a nag-aanap makatotorak, sagkud a siisay man na nagtotoktok, boboksan.
9 Siisay a ama na kin a igin innaayat sa pagkaun, bato a itatao? 10 O kin innaayat sa isura tatawan sa sawa? 11 Kin kamo tanganing mararaut tattaong tomao sa maraay na bagay sa kaninyong manga igin, gaomno pa kaya a kaninyong Amang nasa langit a diri tomao sa maraay na bagay sa manga innaayat kanya! 12 Kaya sa ngamin na bagay, gibowon ninyo sa kaninyong kapwa a gosto ninyong gibowon nira kaninyo, ta amo yan a buut sabiyun ko Layi ni Moises sagkud ko manga Propeta.”
Aagyan Paiyan sa Kahadian ka Diyos
(Lk. 13:24)
13 “Lomuug ika sa kipot na raran na paiyan sa Kahadian ka Diyos, ta a malakbang sagkud maiwas na raran, paiyan sa impiyerno, sagkud dakul a innaagi sadi. 14 Alagad kipot sagkud sadit a raran paiyan sa boway na uda kasagkuran, kaya gatikot sana a nakatotorak kadi.”
A Kawoy sagkud a Bonga
(Lk. 6:43-44)
15 “Magmaan kamo sa manga bukung matood na propeta. Ta romarapo adi kaninyong bagana manga karnerong malangbubuut, alagad a kamatoranan rinaraut nira a pagtobod ninyo arug sa maisug na lobo. 16 Mabibisto ninyo sira sa paagi ka manga ginigibo nira. Diri namomonga sa obas a matotodok na tanum. 17 Arug man kan, a maraay na kawoy nagbobonga sa maraay, alagad a maraut na kawoy nagbobonga sa maraut. 18 A maraay na kawoy diri nagbobonga sa maraut, sagkud a maraut na kawoy diri nagbobonga sa maraay. 19 A kada kawoy na diri nagbobonga sa maraay, pinopotol sagkud isinosogba sa kalayo. 20 Kaya, a bukung matood na manga propeta mabibisto ninyo sa paagi ka kandang manga gibo.”
Alduw sa Pag-osgar
(Lk. 13:25-27)
21 “Bukung a ngamin na binnabaoy kanaku sa, ‘Kagorangnan, Kagorangnan,’ makaluluug sa kahadian ka Diyos, kinding adto sanang naggigibo ka kabutan ka kanakung Amang nasa langit. 22 Pag-abot ka alduw sa pag-osgar, dakul a migsabi kanaku sa, ‘Kagorangnan, Kagorangnan, nagpaayag kami sa oosipun ka Diyos, nagpalayas sa manga demonyo sagkud ginnibo kami sa ngangalasan sa kapangyariyan na itinao mo!’ 23 Alagad ipaiisi ko kanda, ‘Uda ako labut kaninyo. Romayo kamo kanaku, manga paragibo sa maraut!’ ”
A Parabola ko Darwang Tawo na Nagtogrok sa Baluy
(Lk. 6:47-49)
24 “Kaya a siisay man na nag-iirungug ka manga oosipun ko sagkud kinnokoyog kadi, arug sa usad na madonong na tawo na tinnogrok sa baluy na a pondasyon bato. 25 Innoran sa makusug, binnaha, sagkud sinalpok sa makusug na angin so baluy na adto, alagad diri narugma ta itinogrok sa pondasyon na bato. 26 Alagad a siisay man na nag-iirungug ka manga oosipun ko na diri man kinnokoyog, arug ko patal na tinnogrok sa baluy na a pondasyon baybay. 27 Innoran sa makusug, binnaha sagkud sinalpok sa makusug na angin so baluy na adto, kaya interong narugma.”