2
Pinatawad ni Jesus so Lalaking Paralisado
(Mt. 9:1-81; Lk. 5:17-26)
1 Pagkaagi sa nagkapirang alduw binnalik si Jesus sadto Capernaum. Kadto tolos, nabaretaan ko manga tawo sadto na napaoli iya. 2 Kaya kadakul na naman na manga tawo so nagpaiyan sadto inolian niyang baluy. Biyong napono so baluy ta sadto mismo pwertaan pono sa manga tawo. Pangala nangadal si Jesus kanda ko Oosipun ka Diyos. 3 Pangala, agko innabot na manga tawong agko kaibang paralisadong nakabatang na katinkatin ko upat na lalaki. 4 Pero diri sira makarapo ki Jesus ta malakadakul talaga ko manga tawo. Kaya pinnanik sira sadto atup ko baluy pangala binaklasan nira adi sa atup sadto upud ni Jesus tanganing magkaosto so nababatangan ko paralisado. Pangala itinonton nira adi. 5 Kaya ko mabayad ni Jesus kin gaomno kadakulu so pagtobod nira, sinabi niya sadto paralisado, “Igin ko, pinatawad na ika ka manga kasalan mo.”
Isi ni Jesus a nasa Isip ka Tawo
6 Kadtong oras na adto agko man sadto manga paratottoro ko Layi ni Moises na nakabayad ko nangyari kaya nag-isip sira sa arug kadi, 7 “Ngata iya ta nagngangabil sa arug kan. Usad an na pagbasangbasang sa Diyos ta uda ibang pwedeng magpatawad sa kasalan kindi a Diyos sana.” 8 Alagad naisiyan tolos ni Jesus sa paagi ko espirito niya so iniisip nira kaya inonga niya sira, “Ngata ta arug kan a iniisip ninyo? 9 Ngata ari mas madali, sabiyun sadi paralisado na, ‘Pinatatawad na manga kasalan mo’ o sabiyun na, ‘Tindug na, daraa na iton na binatangan mo pangala paoli na?’ 10 Alagad ngowan ipababayad ko kaninyo na a Igin sa Tawoa agko kapangyariyan sadi kinaban na magpatawad sa manga kasalan.” Kaya sinabi ni Jesus sadto paralisado, 11 “Tindug na, darawun mo a binatangan mo pagkatapos pomaoli na ika!” 12 Kaya kadto tolos tinnindug so paralisado, dinara so binatangan niya pangala ginnalin na. So ngamin na nakabayad ko nangyari nagngaralasan pangala nangag-omaw sa Diyos. Sabi nira, “Pagkabayad ta adi sa arug kadi ngowan!”
Pagbaoy ni Jesus ki Levi na Magin Disipolo
13 Pangala, nag-iyan otro si Jesus sadto pangpang ko Ranuw Galilea. Kadakul na manga tawo so sinnonod kanya pangala tinottoroan niya adi. 14 Pagkatapos, mantang nag-aagi iya, nabayad niya si Levi na igin ni Alfeo sadto singilan sa bowis na naniningil. Sinabi ni Jesus kanya, “Somonod ika kanaku sagkud magin disipolo ko.” Kaya tinnindug iya pangala sinnonod ki Jesus.
15 Sadto baluy ni Levi nanggab'i sira si Jesus sagkud so manga disipolo niya. Kaiba man nirang nagkaun so iba pang manga parasingil sa bowis sagkud manga makasalan na nagsonod kanya. 16 Kaya ko mabayad iya ko manga paratottoro ko Layi ni Moises na kasorog ko manga Pariseob na nagkakaun kaiba so manga parasingil sa bowis sinabi nira sadto manga disipolo ni Jesus, “Bukung kaipowan diri iya nagkakaun na kaiba nira, ngani?” 17 Narungug adi ni Jesus kaya nagsimbag iya, “A uda ilang diri nangangaipo sa parabolong kindi a agko ilang amo nangangaipo. A toyo ko kin ngata ta isadi ako amo tanganing baoyon na magsulsul a manga mararaut bukung a manga maraay.”
Manga Bagong Pangadal ni Jesus
(Mt. 9:14-17; Lk. 5:33-39)
18 Usad na beses agko manga tawong nag-onga ki Jesus manungud sa pag-aayonoc ta isi kaya nira na so manga disipolo ni Juan na parabunyag sagkud so manga disipolo ko manga Pariseo nag-aayono. Arug kadi so onga nira ki Jesus, “Ngata ta nag-aayono a manga disipolo ni Juan na parabunyag sagkud a manga Pariseo alagad a manga disipolo mo diri?” 19 Nagsimbag si Jesus, “Ngata, makapag-ayono raw a manga bisita ka usad na kasalan mantang kaiba nira a nobyo? Nagdiri na ngani? Ta mantang kaiba nirang nagsisilibrar a nobyo nongka sirang makapag-ayono. 20 Alagad omaabot a alduw na kokoon kanda a nobyo kaya ka alduw na an mig-ayono na sira.
21 Uda siisay man na nagtatagabo sa lomang bado na naggagamit sa bagong tela ta kin gibowon an mas orog logod na magagasi a bado. 22 Uda siisay man nagpapalis sa bagong alak sa lomang bubutangand ta kin gigibowon an pomopotok sana a bubutangan pangala maoola sana a alak sagkud mararaut sana a bubutangan. Kaya kaipowan na ipalis a bagong alak sa bago man na bubutangan.”e
Mas Makapangyariyan si Jesus kisa sa Layi ka Alduw sa Pagpapaingalo
(Mt. 12:1-8; Lk 6:1-5)
23 Usad na Alduw sa Pagpapaingalo, mantang naglalabos sira si Jesus sagkud so manga disipolo niya sadto tanuman sa trigo, nanggiro sa bonga so manga disipolo niya. 24 Kaya so manga Pariseo nag-onga ki Jesus, “Silngi ngani a ginigibo ka manga disipolo mo. Kontra sa Layi ni Moises a manggiro sa Alduw sa Pagpaingalo, buku?”
25 Sinnimbag si Jesus, “Ngata diri pa basang ninyo naintindiyan so Kasoratan manungud ko ginibo ni David ko mag-alup iya sagkud so manga kaiba niya? 26 So ginibo niya, nagluug iya sadto Baluy sa Diyos, kinoko so tinapay na manga padi sana kaipowan magkaun pangala, kinaun niya adi pati ko manga kaiba niya. Nangyari adi ko si Abiatar amo pa namamayo sa ngamin na kapadian.” 27 Sinabiyan pa sira ni Jesus, “Ginibo a Alduw sa Pagpapaingalo tanganing makapagpaingalo a tawo bukung a tawo ginibo para magin oripun ka Alduw sa Pangpapaingalo. 28 Kaya nasa irarum kana kapangyariyan ka Igin sa Tawo a Alduw sa Pagpapaingalo.”