3
Mas Maraay na Gomibo sa Karayan sa Alduw sa Pagpaingalo
(Mt. 12:9-14; Lk. 6:6-11)
1 Linnuug otro si Jesus sadto sinagoga. Sadto man luug kadto agko usad na lalaking paralisado so usad na kamut. 2 Kaya minanmanan iya saigo ko manga Pariseo ta baka parayun niya so lalaki sa Alduw sa Pagpapaingalo. Ta kin parayun niya, agko na sira maiakosar kanya. 3 Pangala, sinabi ni Jesus sadto lalaki na bomitnga tanganing mabayad ko manga tawo. 4 Pagkatapos, nag-onga si Jesus sadto manga tawo, “Ono a pinipirmitaran ka na Layi ni Moises na gibowon sa Alduw sa Pagpapaingalo, gomibo sa karayan o gomibo sa maraut, magligtas sa boway o gomuraan?” Alagad uda ni usad na sinnimbag.
5 Mantang nakasilung si Jesus sadto manga Pariseo na agko pagkaungut sagkud pagkamundu ta la nira ka manga kusung, sinabi niya sadto lalaki, “Unata ito kamut mo.” Inunat man ko lalaki kaya naraay so kamut niya. 6 Pangala, naggalin tolos so manga Pariseo sadto sinagoga pagkatapos iniyanan so manga parasonod ni Herodes tanganing makipagsabwatan kin paono maipaguguraan si Jesus.
Sinnonod ki Jesus so Malakadakul na Tawo
7 Pangala naggalin man si Jesus sagkud so manga disipolo niya. Nag-iyan sira sadto pangpang ko Ranuw Galilea. Pagkatapos malakadakul na tawo so sinnonod kanda galin sa manga rehiyon ko Galilea, Judea, 8 Jerusalem sagkud Idumea. Agko pa galin sadto loyo ko salog Jordan sagkud sadto palibot ko Tiro sagkud Sidon. Nagsoronoran sira ko maisiyan nira so manga ginibo ni Jesus. 9 Pangala, minandaan ni Jesus so manga disipolo na ikoko iya sa bangka tanganing diri iya masuksuk ko malakadakul na tawo. 10 Holi ko pagparaay ni Jesus ko kadakul na manga nag-iilang, nagraniyan so kadakul pang manga agko kamatian tanganing makaptan iya.
Pinagbawalan ni Jesus so manga Maraut na Espirito
11 Pangala, pagnababayad iya ko manga tawong sinasaniban ko maraut na espirito, tinnitiklod sira sa atobangan ni Jesus sagkud nagkakagrat, “Ika a Igin sa Diyos!” 12 Alagad pinagbawalan sira ni Jesus na diri ipagparasabi kin siisay iya.
Pagpili ni Jesus ko Dosing Disipolo
(Mt. 10:1-4; Lk. 6:12-16)
13 Pangala, nagtokad si Jesus sa usad na bokid kaiba so manga disipolong gosto niyang iiba. 14 Pagkatapos pinnili iya sa Dosing Disipolo na makaiba niya dawa sari sagkud tanganing ipadara niya na mangadal sa manga tawo 15 sagkud magpalayas sa manga demonyo sa manga tawong sinasaniban. 16 Amo adi so Dosing pinili ni Jesus: si Simon na nginaranan niyang Pedro, 17 si Santiago sagkud si Juan na manga igin ni Zebedeo. Nginaranan man sira ni Jesus na Boanerges na a buut sabiyun, ‘manga igin sa daguldul’ . 18 So iba pang piniling disipolo amo si Andres, si Felipe, si Bartolome, si Mateo, si Tomas, si Santiago na igin ni Alfeo, si Tadeo, si Simon na Makabayan 19 sagkud si Judas Iscariote na sa katapostaposi amo nagtraydor ki Jesus.
Mas Makapangyariyan si Jesus kisa ki Satanas
(Mt. 12:22-32; Lk. 11:14-23; 12:10)
20 Pagkatapos ko pagpili, nagbalik si Jesus kaiba so Dosi sadto baluy na dinadagosan niya sadto Capernaum. Pangala namangno nirang kadakul na naman ko manga tawo ta sa sobrang kadakulan ngani uda na sira oras sa pagkaun. 21 Ko maisiyan ko pamilya ni Jesus so manga ginigibo niya, iniyanan nira iya tanganing koon sagkud pugulan na mangadal ta so pag-una nira nakakapay si Jesus.
22 Pangala, agko innabot na manga paratottoro ko Layi ni Moises galin sa Jerusalem. Sinabi nira, “Sinasaniban ni Beelzebul,a a namomoon ka manga demonyo a lalaking adi ta nagpapalayas iya sa manga demonyo sa paagi ka kapangyariyan ni Beelzebul.” 23 Alagad pinarani ni Jesus so manga tawo kanya. Pagkatapos nagngabil iya sa paagi sa usad na parabola, “Paono palalayasun ni Satanas a sadiri niya? 24 Arug man kan kin a manga tawo sa usad na kahadian naglalabalanan, diri mig-uban a kahadian na an. 25 Arug man kan kin a usad na pamilya nagpapararabongan, diri mig-uban a pamilyang an. 26 Arug man kadi mingyari kin kinakalaban ni Satanas a manga kampon niya sagkud kin nagsosorogsorogan sira, diri mig-uban a kahadian niya imbes amo na yan a sagkuran niya.
27 Alagad diri maluluug sagkud matatabanan niisay man a baluy ka usad na makusug na lalaki anggan na diri ngona niya ginagapos a kagsadiri.
A Kasalanan Kontra sa Espirito Santo
28 Sinisigoro ko kaninyo na patatawadun kamo onoman na kasalan na ginibo o sinabi ninyo, gaomno man karaut na manga ngangabilun. 29 Alagad diri patatawadun a siisay man na magngabil sa maraut kontra sa Espirito Santo. A kasalanan na adi diri na patatawadun anggan pa man.” 30 Sinabi adi ni Jesus ta sinabi kaya ko manga paratottoro ko Layi ni Moises, “Sinasaniban iya sa maraut na espirito.”
A Tonay na Pamilya ni Jesus
(Mt. 12:46-50; Lk. 8:19-21)
31 Pangala, innabot so ina sagkud manga ngod na lalaki ni Jesus. Sadto sana sira lowas nakatindug. Pangala ipinabaoy nira si Jesus na lomowas. 32 Kaya sinabiyan si Jesus ko manga tawong nakapalibot kanya na inuulat iya ko ina niya sagkud manga ngod sadto lowas. 33 Alagad sinabi ni Jesus kanda, “Sasabiyun ko kaninyo kin siisay talaga a binibisto kong ina sagkud manga ngod.” 34 Pagkatapos sinilngan niya so manga disipolong nakapalibot kanya, sabay sinnabi, “Amo adi a ina sagkud manga ngod ko. 35 Ta a siisay man na magkoyog sa kabutan ka Diyos, amo ko ibibilang na ina sagkud manga ngod.”