3
So Pangangadal ni Juan na Parabunyag
1 Dakul na taon so nakaagi, agko usad na lalaki na nakaistar sadto kalangtaran ko Judea na binabaoy na Juan na Parabunyag na nagtotottoro 2 sagkud pirmi niyang sinasabing, “Magsulsul na kamo, ta arani na a paghahadi ka Diyos.” 3 Si Juan amo a sinasabi ni Propeta Isaias ko sabiyun niyang,
“Agko nagrarait sadto kalangtaran,
‘Ianda ninyo a sadiri ninyo sagkud magpreparar sa pag-abot ka Kagorangnana.’ ”
4 A bado ni Juan gibo sa bogaybo ka kamelyo, sagkud agko iya pahang anit. A pagkaun niya manga roron sagkud tanggoli. 5 Nag-iyan kanya so dakul na tawo na galin sa Jerusalem, sagkud sa manga banwaan sa Judea sagkud sa manga banwaan na nakapalibot sa Salog ko Jordan. 6 Ipinaayag nira so manga kasalan nira pangala binunyagan sira ni Juan sadto Jordan. 7 Alagad ko mabayad niyang kadakul ko manga Pariseob sagkud manga Saduceongc rinnapo kanya tanganing magpabunyag, sinabiyan niya sira, “Kamong manga mararaut sagkud manlolokod! Siisay a sinnabi kaninyong makadudulag kamo ka omaabot na padosa ka Diyos?
8 Pamatoranan ninyo sa paagi ka gibo na kamo matood na nagsulsul. 9 Sagkud diri kamo mag-una na kamo makaliligtas ta kamo erensiya ni Abraham. Sinasabiyan ko kamo na sa manga batong adi, makagigibo a Diyos sa manga erensiya ni Abraham. 10 A padosa ka Diyos nakaanda na kaninyo arug ka pisaw na nakapatuk na sa manga gamot ka kawoy. A kawoy na diri nagbobonga sa maraay, pupuludun sagkud iaapon sa kalayo. 11 Bubunyagan ko kamo sa tobig na tanda ka kaninyong pagsulsul. Alagad agko mig-abot na kasonod ko, usad na mas makapangyariyan kisa kanaku, na ni a sandalyas niya buku akong angay na magtangkas. Iya migbunyag kaninyo sa Espirito Santo sagkud iya man a mig-osgare. 12 Arug iya sa usad na tawo na daradara a pangkagkag niya tanganing alinun a ragami. Titiponon niya sadto payag so manga trigo, alagad so apa sosoloon sadto kalayo na diri napaparung.”
So Pagbunyag ki Jesus
(Mk. 1:9-11; Lk. 3:21-22)
13 Ko panawon na adto inniyan si Jesus sadto Jordan galin sa Galilea tanganing magpabunyag ki Juan. 14 Alagad sinnayoma si Juan sagkud sinnabing, “Ako po a kaipowan mong bunyagan, ngata po ta ika a inniyan sadi kanaku? 15 Sinnimbag si Jesus, ‘Pabayaan mo na mangyari adi ngowan, ta amo adi a kaipowan tang gibowon tanganing maotob a inaayat kana Diyos.’ Kaya binunyagan iya ni Juan.