Mateo 2

So Pagbisita ko manga Mago

¹ Naipangigin na si Jesus sadto Bethlehem sakup ka probinsya ka Judea, ko panawon na si Herodes so hadi, pangala innabot sadto Jerusalem so manga Mago na galin sadto sirangan, ² sagkud innonga, “Sari a usad na ipinangigin na hadi ka manga Judio? Nabayad namu so bitoon sadto sirangan na nagpapaayag ka kanyang pagkamundag, kaya inniyan kami sadi tanganing sambawun iya.” ³ Ko mabaretaan adi ni Hading Herodes, naporisaw iya sagkud so kadaklan ko manga tagaJerusalem. ⁴ Kaya ipinabaoy niya ngamin so manga namomoon ko manga Pading Judio sagkud manga paratottoro sa Layi ni Moises, sagkud inonga niya sira, “Sari ipingigin a Cristo? ⁵ Sadto Bethlehem ka Judea,” simbag nira, ta arug kadi so ipinasorat ka Diyos sa paagi ko propeta,

⁶ “ ‘Alagad kamong manga tagaBethlehem, sa karagaan ka Juda,

bukung kamo a pinakasadit sa manga nangongorog sa Juda;

Holi ta kaninyo gomagalin a usad na mimmayo.

Na mig-ataman ka kanakung banwaan na Israel.’ ”

⁷ Pangala ipinabaoy na ilum ni Herodes so manga Mago sagkud inonga kin kono so eksaktong oras na nagpabayad kanda so bitoon. ⁸ Pangala pinaiyan sira sadto Bethlehem sagkud tinogon, “Agi na kamo, anapun ninyo saigo so igin. Pagnabayad ninyo, ibareta tolos ninyo kanaku, tanganing ako man omiyan sagkud somamba kanya.”

⁹ Pagkatapos nirang marungug so hadi, ginnalin na sira. Mantang nag-aagi sira, bigla nirang nabayad otro so bitoon na nabayad nira sadto sirangan. Pinangonaan sira kadi anggan sa pinnondo adi sadto logar kin sari so igin. ¹⁰ Ko mabayad nira so bitoon malakaogma nira. ¹¹ Pagluug nira sadto baluy, nabayad nira so igin na kaiba ko kanyang ina na si Maria. Dinnapla sira sagkud sinamba so igin. Pangala, binoksan nira so daradarang bubutangan sagkud iinatang kanya so manga regalo nirang bolawan, mamalun na kamangyan sagkud mira. ¹² Ko pabalik na sira pinataniran sira ka Diyos sa paagi sa pangatorogan na diri na sira magbalik ki Herodes. Kaya binnalik sira sadto banwaan nira sa iba ng aagyan.

So Pagdulag Paiyan Sadto Ehipto

¹³ Paggalin ko manga Mago, a anghel ka Kagorangnan biglang napabayad ki Jose sa pangatorogan sagkud sinabi kanya, “Bomangon ika, darawun mo ngowan tolos sadto Ehipto a igin sagkud a kanyang ina. Tominer kamo sadto anggan na sabiyun ko kanimo, ta aanapun ni Herodes a igin tanganing guranun.” ¹⁴ Kaya binnangon si Jose, pangala idinulag so mag-ina ko gab-ing adto paiyan sadto Ehipto, ¹⁵ sagkud sadto na sira innistar anggan sa magraan si Herodes. Nangyari adi tanganing maotob so sinabi ko Kagorangnan sa paagi ko propeta, “Binaoy ko a kanakung Igin galin sa Ehipto.”

¹⁶ Ko maisiyan ni Herodes na nausadan iya ko manga Mago, naungut iya saigo. Kaya pinagbutan niyang guranun so ngamin na manga lalaking igin na edad darwang taon pababa, sadto Bethlehem sagkud manga kaaraning logar, sigon sa naisiyan niya sadto manga Mago manungud ko oras na pagtonga ko bitoon. ¹⁷ Sa paaging adi naotob so sinabi ni Propeta Jeremias,

¹⁸ “So usad na boses narungug sadto banwaan ka Rama,

pagtangis sagkud pag-adrangay na makusug.

Pinagtatangisan ni Rachel so manga igin niya

sagkud abu ng magparanga,

ta guraan na sira.”

So Pagbalik Galin sadto Ehipto

¹⁹ Pagkagraan ni Herodes, a anghel ka Kagorangnan biglang napabayad sa pangatorogan ki Jose sadto Ehipto ²⁰ sagkud sinnabing, “Bomangon ika sagkud darawun mo a igin sagkud a kanyang ina sadto Israel, ta so manga nag-uumang guranun a igin, guraan na. ²¹ Kaya binnangon iya sagkud iinoli so mag-ina sadto Israel. ²² Alagad ko mabaretaan ni Jose na a naghahadi sadto Judea si Arquelo na igin ni Herodes, nakatakot iyang bomalik sadto. Holi ta pinataniran iya sa pangatorogan, dinnagos iya sadto probinsya ko Galilea. ²³ Innistar iya sadto banwaan ka Nazaret. Kaya naotob so sinabi ko manga propeta manungud ki Jesus, ‘Babaoyon iyang Nazareno.’ ”