Mateo 1

A Maraay na Bareta na isinorat ni

San Mateo

A Ginikanan ni Jesus

(Lk. 3:23-38)

¹ Amo adi a listaan ka ginikanan ni Jesu Cristo, na Erensiya ni David sagkud ni Abraham:

² Si Abraham a ama ni Isaac,

si Isaac a ama ni Jacob,

na ama ni Juda sagkud ko manga ngod niya,

³ nagin igin man ni Juda ki Tamar si Farez sagkud si Zera,

si Farez a ama ni Esrom,

sagkud si Esrom a ama ni Aram,

⁴ si Aram a ama ni Aminadab,

na ama ni Naason,

si Naason a ama ni Salmon.

⁵ Nagin igin ni Salmon ki Rahab si Boaz,

sagkud nagin igin man ni Boaz ki Ruth si Obed,

si Obed a ama ni Jesse,

⁶ na amo man a ama ni Hading David.

Si David a nagin ama ni Solomon, sadto dating agom ni Urias,

⁷ si Solomon a ama ni Roboam,

si Roboam a ama ni Abias,

na ama ni Asa,

⁸ si Asa a ama ni Josafat,

sagkud si Josafat a ama man ni Joram.

Si Joram a ginikanan ni Uzias,

⁹ si Uzias a ama ni Jotam,

na ama ni Acaz,

si Acaz a ama ni Ezikias,

¹⁰ na ama ni Manases.

Si Manases a ama ni Amon,

na ama ni Josias,

¹¹ si Josias a pakoapoon ni Jeconias sagkud ko manga ngod niya. Panawon kadto ko pagkasakup sagkud pagkaoripun ko manga Israelita sadto Babilonia.

¹² Pagkatapos ko pagkasakup kanda sadto Babilonia, amo man adi so manga ginikanan ni Jesus:

nagin igin ni Jeconias si Sealtiel,

si Sealtiel na ama ni Zorobabel,

¹³ si Zorobabel a ama ni Abiud,

na ama ni Eliakim,

si Eliakim a ama ni Azor,

¹⁴ na ama ni Zadok,

na ama ni Akim,

si Akim a ama ni Eliud,

¹⁵ si Eliud a ama ni Eleazar,

na ama ni Matan,

na ama ni Jacob,

¹⁶ sagkud si Jacob a ama ni Jose na nagin agom ni Maria, na ina ni Jesus, na binabaoy na Cristo.

¹⁷ Kaya agko katorseng henerasyon ngamin poon ki Abraham anggan ki David, katorse poon ki David anggan sa maoripun sagkud madara so manga Israelita sadto Babilonia sagkud katorse man pagkatapos na masakup sira sadto Babilonia anggan ki Cristo.

So Pagkapangigin ki Jesu Cristo’

(Lk. 2:1-7)

¹⁸ Arug kadi so pagkapangigin ki Jesu Cristo. So kanyang inang si Maria nakatagama ng ikasal ki Jose. Alagad bago sira nag-iba, naisiyan ni Maria na mabrus iya sa paagi ka Espirito Santo. ¹⁹ Alagad si Jose na kanyang mapangangagom malangraay, sagkud abu niyang mabutang sa kasusupgan si Maria, kaya nagdesisyon iyang sowayan si Maria sa ilum.

²⁰ Alagad pinag-uurup-urup niya kin paonong sowayan si Maria. Pangala napabayad kanya so usad na anghel ka Kagorangnan sa paagi sa pangatorogan sagkud sinnabing, “Jose, Erensiya ni Hading David, diri ika makatakot na agomon si Maria ta a ipinagmamabrus niya, sa paagi ka Espirito Santo. ²¹ Mingngigin iya sa lalaki, sagkud ngangaranan mo iyang Jesus, ta iya a lomiligtas ka manga tawo sa kandang manga kasalan.” ²² Nangyari adi ngamin tanganing maotob so sinabi ka Kagorangnan sa paagi ko propeta, ²³ “Migmabrus a usad na raraga sagkud mingngigin sa usad na lalaki, na babaoyon nirang Emmanuel,” na a buut sabiyun, “Kaiba ta a Diyos.” ²⁴ Ko magisung si Jose, kinoyog niya so sinabi ko anghel ka Kagorangnan kaya pinakasalan niya si Maria. ²⁵ Alagad diri niya adi inolod anggan na diri pa naipangingigin ni Maria so igin niyang lalaki, na nginaranan ni Jose sa Jesus.