4
So Pagtintar ki Jesus
(Mk. 1:12-13; Lk. 4:1-13)
1 Pangala, dinara si Jesus ko Espirito Santo sadto kalangtadan tanganing tintaran ni Satanas. 2 Pagkatapos niyang mag-ayono sa kwarentang alduw sagkud kwarentang gab'i, nag-alup iya. 3 Rinnapo kanya so Paratintar sagkud sinnabing, “Kin ika a Igin sa Diyos, sabiyun mo raw sa batong adi na magin tinapay.”
4 Sinnimbag si Jesus, “Nasosorat, ‘A tawo diri naboboway sa pagkaun sana, kindi sa kada oosipun na naggagalin saa Diyos.’ ”
5 Pangala dinara iya ni Satanas sadto Jerusalem, syodad na idinidikar sa Diyos sagkud pinatindug sadto pinakatoktok ko Templo. 6 Sagkud sinnabi kanya, “Kin ika a Igin sa Diyos, tomalon raw ika. Ta nasosorat,
‘Imamanda niya a manga anghel tanganing ingatan ika,
Sasalowon ika ka kandang manga kamut,
Tanganing diri magtama a kanimong manga tiil sa bato.b’ ”
7 Sinnimbag si Jesus, “Nasosorat man, ‘Diri mo pagporbaran a Kagorangnan mong Diyos.c’ ” 8 Pangala, dinara iya otro ni Satanas sadto toktok ko bokid sagkud ipinabayad kanya so ngamin na kahadian sa kinaban sagkud so ngamin na kamorawayan kadi. 9 Sagkud sinnabi kanya, “Ngamin na adi itatao ko kanimo kin domapla ika sadi atobangan ko sagkud somamba kanaku.”
10 Sinnimbag si Jesus, “Lomayas ika Satanas! Ta nasosorat, ‘Sambawun mo a Kagorangnan mong Diyos, sagkud iya sana a pagsirbiyan mo.’ ”
11 Kaya binayaan na iya ni Satanas, pangala innabot man so manga anghel sagkud pinagsirbiyan iya.
Pinonan ni Jesus so Pangangadal sadto Galilea
(Mk. 1:14-15; Lk. 4:14-15)
12 Ko mabaretaan ni Jesus na ipriniso si Juan na Parabunyag, binnalik iya sadto Galilea. 13 Imbes na omiyan sa Nazaret, innistar iya sa Capernaum na kaabay ko Ranuw Galilea sa karagaan ka Zebulun sagkud Neftali. 14 Holi kadi naotob so isinabi ni Propeta Isaias,
15 “Sa karagaan ka Zebulun sagkud karagaan ka Neftali,
aagyan paiyan sa dagat, sadto loyo ka Salog Jordan,
Galilea, na karagaan ko manga bukung Judio!
16 Sa manga tawong namomoway sa kangitngitan
makababayad sira sa grabing kaliwanggan,
sagkud sa manga tawo na naboboway na nakatatakot na magraan
sinnilaw so liwanag kanda.”
17 Poon kadto pinnoon si Jesus na mangadal, “Magsulsul na kamo, ta arani na a paghahadi ka Diyos!”
Binaoy ni Jesus so onang manga Disipolo
(Mk. 1:16-20; Lk. 5:1-11)
18 Mantang nag-aagi si Jesus sadto pangpang ko Ranuw Galilea, nabayad niya so magngod, si Simon na binabaoy na Pedro sagkud so ngod niyang si Andres. Nag-aapon sira ko laya sadto ranuw ta sira manga paraisura. 19 Sinabiyan niya sira, “Somonod kamo kanaku sagkud totottoroan ko kamo na makadarad sa manga tawo tanganing magin disipolo ko.” 20 Kadto tolos binayaan nira so kandang manga laya sagkud sinnonod kanya.
21 Nagpadagos iya sa pag-agi, sagkud nabayad man niya so magngod na Santiago sagkud Juan na manga igin ni Zebedeo. Sadto sira bangka na nag-oosay ko manga laya nira kaiba so kandang ama. Binaoy man sira ni Jesus.
22 Binayaan nira tolos so bangka sagkud so kandang ama, saka sinnonod kanya.
Nangadal sagkud Nagparaay si Jesus
(Lk. 6:17-19)
23 Linibot ni Jesus so bilog na Galilea, nagtottoro sadto manga sinagogae ipinangadal so maraay na bareta ka paghahadi ka na Diyos, sagkud nagparaay ko manga manlainlain na kamatian sagkud ka'ilangan ko manga tawo. 24 Linnuyap so bareta manungud kanya sadto bilog na Siria, kaya dinara kanya ko manga tawo so ngamin na agko manlainlain na ilang, sagkud grabing kamatian, manga sinasaniban sa demonyo, so agko sobisobi sagkud so manga paralisado, sagkud sira ngamin pinaraay. 25 Dakul na manga tawo galin sadto Galilea, Decapolis, Jerusalem, Judea, sagkud galin sadto loyo ko Salog Jordan so sinnonod kanya.