A Maraay na Bareta sigon ki
San Juan
1
A Oosipun na Nagtatao sa Boway na Uda Kasagkuran
1 Bago pa lalangun a kinaban a oosipuna isan na. A Oosipun kaiba ka Diyos, sagkud a Oosipun amo a Diyos. 2 Poon pa sa kapinonan, kaiba na iya ka Diyos.
3 Linalang ka Diyos a ngamin na bagay sa paagi niya, sagkud uda onoman na nalalang na bukung sa paagi niya. 4 A Oosipun amo a pinaggagalinan ka boway na uda kasagkuran, sagkud a boway na adi bagana solo, ta amo adi a nagtatao sa liwanag sa manga tawo. 5 A solo na adi nagliliwanag sa kangitngitan, sagkud diri adi nadaug kono pa man ka kangitngitan.
6 Agko usad na tawong isinobol a Diyos a kanyang mamandaan, na a ngaran Juanb. 7 Inniyan iya tanganing magpamatood manungud ka solo, tanganing a ngamin makarungug ka mensayi sagkud makatobod. 8 Bukung si Juan a solo, alagad inniyan iya sadi tanganing magpamatood manungud ka solo. 9 A matood na solo, na amo a nagtatao sa matood na liwanag sa ngamin na tawo, innabot na sadi kinaban.
10 A Oosipun sadi na kinaban, sagkud dawa ngani linalang ka Diyos a kinaban sa paagi niya, diri pa nanggayud na iya binisto kadi. 11 Inniyan iya sa sadiri niyang banwaan, alagad diri iya inako ko manga kabanwaan niya. 12 Alagad a ngamin na innako sagkud nagtiwala kanya, tinawan niya sira sa poder na magin igin ka Diyos. 13 Nagin igin sira ka Diyos, bukung holi sa paagi ka pagkapangigin sa laman o kaya sa kabutan ka tawo, kindi holi sa kabutan ka Diyos. 14 Nagin tawo a Oosipun sagkud namoway na kaiba ta. Nabayad namu a kanyang kamorawayan, kamorawayan na naako niya sa Ama bilang nagsosolong Igin. Pono iya sa karayan na buut sagkud kamatoranan.
15 Nagpamatood si Juan manungud kanya, sagkud nagkakagrat na sinnabi, ?Iya a sinabi ko kaninyong omaabot na kasonod ko na mas orog kisa kanaku, ta iya isan na bago pa ako ipangigin.?
16 Holi ta pono iya sa karayan na buut, innako kita ngamin sa ambondang biyaya. 17 Ta itinao kanatu ka Diyos a Layi sa paagi ni Moises, alagad a karayan na buut sagkud kamatoranan innabot kanatu sa paagi ni Jesu Cristo. 18 Uda ni usad na nakabayad sa Diyos. Alagad ipinabisto iya kanatu ka nagsosolo niyang Igin na si Jesus, na nabubutan niya saigo.
A Pagpamatood ni Juan manungud ki Jesus
(Mt. 3:1-12; Mk. 1:1-8; Lk. 3:1-18)
19 Nagsobol so manga namomoon ko manga Judio sadto Jerusalem sa nagkapirang padi sagkud manga Levita tanganing ongaun si Juan kin siisay iya. 20 Diri iya nagdorodarwa sa pagsimbag, alagad malinaw niyang sinabi, ?Bukung ako a Cristo!?
21 Kaya inonga nira iya, ?Ya siisay palan ika, ika si Elias??
?Buku tabi,? simbag niya.
?Ya ono, ika a Propetac??
?Buku man,? simbag niya.
22 Kaya sinnabi sira, ?Siisay palan ika, sabiyun mo kanamu tanganing agko man kami sabiyun sadto manga nagsobol kanamu. Ono a masasabi mo manungud ka sadiri mo??
23 Sinnimbag si Juan sa paagi ko oosipun na galin sa libro ni Propeta Isaias.
?Ako a tawong nagkakagrat sa kalangtadan,
?Tolidun ninyo a aagyan ka Kagorangnan!? ?
24 So manga nag-onga ki Juan isinobol ko manga Pariseo. 25 Kaya nag-onga otro sira ki Juan, ?Kin buku ika a Cristo o si Elias o Propeta, ngata ika ta nagbubunyag? ?
26 Sinnimbag si Juan, ?Nagbubunyag sana ako sa tobig, alagad agko usad na nakatindug sa kaibaan ninyo na diri ninyo nabibisto. 27 Iya a sinasabi ko na omaabot na kasonod ko, alagad buku basang akong angay na magin mamandaan niya.?
28 Nangyari adi ngamin sadto Betania, sadto loyo ko salog Jordan na pinagbubunyagan ni Juan.
Si Jesus a Kordero ka Diyos
29 Kinaudmaan, nabayad ni Juan si Jesus na paiyan kanya, kaya sinnabi iya, ?Bayda ninyo, taadi a Kordero ka Diyos na migpatawad ka kasalan ka kinaban! 30 Iya a sinasabi ko, ko sabiyun kong, ?A omaabot na kasonod ko, mas orog kanaku ta iya isan na bago pa ako ipangigin.? 31 Diri ko man iya bistado kadto, alagad inniyan ako sading nagbubunyag sa tobig tanganing ipabisto iya sa Israel.?
32 Pangala sinnabi si Juan, ?Nabayad ko a Espiritong binnababa galin sa langit arug sa usad na kalapati, sagkud pomipirmi adi kanya. 33 Buku ko iyang bisto, kindi a nagmanda kanakung magbunyag sa tobig sinabiyan ako, ?Mababayad mo a Espirito na bomababa sagkud pomipirmi sa usad na tawo, iya a migbunyag sa Espirito.? 34 Nabayad ko adi sagkud pinamamatoranan kong iya a Igin sa Diyos.?
So Onang manga Disipolo ni Jesus
35 Kinaudmaan, tinnindug otro sadto si Juan sagkud so darwa niyang disipolo. 36 Ko mabayad niyang linnalabos si Jesus, sinnabi iyang, ?Taadi na a Kordero ka Diyos!?
37 Ko marungug ko darwang disipolo so sinabi niyang adto, sinnonod sira ki Jesus. 38 Paglilili ni Jesus, nabayad niyang sinnosonod sira kanya, kaya innonga iya, ?Ono a inaanap ninyo? ?
Sinnimbag sira, ?Rabbi, (na a buut sabiyun Maestro) sari po ika nakaistar? ?
39 ?Mosna kamo tanganing mabayad ninyo,? sabi ni Jesus.
Kaya inniba sira sagkud nabayad nira kin sari iya nakaistar sagkud nakidagos na sira sadto ko alduw na adto. Nasa alas kwatro na kadto sa apon. 40 Usad sadto darwang lalaking nakarungug ki Juan na sinnonod ki Jesus amo si Andres na ngod ni Simon Pedro. 41 So onang ginibo ni Andres, inanap niya so ngod niya sagkud sinabiyan niyang, ?Natorakan na namu a Mesias!? Na a buut sabiyun, a Cristo. 42 Kaya ipinag-iba iya ni Andres ki Jesus.
Sinilngan iya ni Jesus sagkud sinnabi, ?Ika si Simon na igin ni Juan. Babaoyon ikang Cefas.? Kapareyo ka ngaran na an sa Griego ?Pedro? na a buut sabiyun bato.
Binaoy ni Jesus si Felipe sagkud Natanael
43 Kinaudmaan, nagdisisyon si Jesus na omiyan sadto Galilea. Nabayad niya sadto si Felipe sagkud sinabiyan niya, ?Somonod ika kanaku.?
44 Si Felipe taga Betsaida man, arug nira Andres sagkud Pedro. 45 Inanap ni Felipe si Natanael sagkud sinabiyan niyang, ?Natorakan na namu a sinasabi ni Moises na isinorat sa Libro ka Layi, sagkud sinorat man ko manga propeta, si Jesus na taga Nazaret, na igin ni Jose.?
46 Nag-onga si Natanael, ?Agko raw maraay na galin sa Nazaret??
Sinnimbag si Felipe, ?Mosna tanganing mabayad mo.?
47 Ko mabayad ni Jesus si Natanael na nagrarapo kanya sinnabi iya, ?Amo adi a matood na Israelita, buku iyang madaya.?
48 ?Ngata ta bistado mo ako?? onga ni Natanael.
?Bago pa ika baoyon ni Felipe, nabayad ko na ika sadto poon ko kawoy sa igos, ? simbag ni Jesus.
49 Sinnabi si Natanael, ?Rabbi, ika po a Igin ka Diyos, ika a Hadi ka Israel!? 50 Sinabi ni Jesus kanya, ?Nagtotobod ika kanaku holi ta sinabi kong nabayad ko ika sadto irarum ko kawoy sa igos? Makababayad pa ika sa mas orog pa kisa kadi.? 51 Sagkud sinnabi pa si Jesus kanda, ?Sinasabi ko kaninyo a kamatoranan, mababayad ninyong bokas a langit, sagkud mababayad man ninyo a manga anghel ka Diyos na pataas pababa paiyan kanaku na Igin sa Tawod.?