A Maraay na Bareta sigon ki
San Juan
Kapinonan
Ipinapabisto ka Maraay na Bareta sigon ki San Juan na si Jesus amo a uda kasagkuran na Oosipun ka Diyos, ?nagin tawo sagkud innistar sa kaibaan namu.? Sinorat a librong adi tanganing a manga bomabasa makatobod na si Jesus a ipinanogang Paraligtas, a Igin sa Diyos, sagkud sa paagi niya migkaagko sira boway na uda kasagkuran (20:13).
A onang parte ka librong adi nagprepresentar ko manga manlainlain na milagro na nagpapamatood na si Jesus talaga a ipinanogang Paraligtas, na Igin sa Diyos. Kasonod kadi a manga pag-iisplikar manungud ko manga milagro. Sa parteng adi sinasabi kin paonong agko nagtobod ki Jesus sagkud nagin parasonod niya. Agko man nagkapira na abung magtobod, sagkud kinontra pa iya. Nakasorat sa kapitolo 13 anggan 17 so oring gab'i ni Jesus kaiba so manga disipolo niya sagkud so kakaiba niyang pakikiiba kanda. Ko gab-ing adto, pinakusug niya so buut nira tanganing magin andam sira sa manga omaaboton na mingyari. Sa manga oring kapitolo man naisorat so pagrakup, sagkud pag-imbestigar, so pagpako kanya sa kros sagkud pagkaboway otro, sagkud so pagpapabayad niya sadto manga disipolo pagkatapos niyang maboway otro.
So istorya manungud ko babaying narakup na nakikiolod (8:1-11) uda sadto manga naonang kasoratan.
Tinawan sa importansiya ka Maraay na Bareta sigon ki Juan a boway na uda kasagkuran sa paagi ni Jesu Cristo, usad na regalo na ngowan pa sana pinnopoon na sagkud naaako na ka manga sinnisimbag ka pagbaoy ni Jesus, a Aagyan, a Kamatoranan sagkud a Boway. Naiiba a librong adi sa paggamit ka manga simpleng bagay alagad marararum a buut sabiyun arug ka tobig, tinapay, solo, pastor sagkud a kanyang manga karnero, poon sa obas sagkud a bonga kadi, tanganing maipabayad sagkud maitottoro a manga kamatoranan espiritwal.
Manga Luug
A Oosipun na Nagin Tawo (1:1-18)
Si Juan na Parabunyag sagkud so Onang manga Disipolo ni Jesus (1:19-51)
Tinottoroan ni Jesus so Malakadakul na Tawo (2:1-12:50)
So manga Oring Alduw ni Jesus sa Jerusalem (13:1-17:26)
So Pagkagraan ni Jesus (18:1-19:42)
So Pagkaboway Otro sagkud Pagpabayad ni Jesus (20:1-21:25)