24
So Pagkaboway Otro ni Jesus
(Mt. 28:1-10; Mk. 16:1-8; Jn. 20:1-10)
1 Ko onang alduw sa simana, malapakasaki nag-iyan so manga kababaiyan sadto linubngan, dara so paamot na inanda nira. 2 Nabayad nira na pinaligid na so batong iginukup sadto lulubngan. 3 Alagad ko sira magluug, diri nira nabayad so bangkay ko Kagorangnan na si Jesus. 4 Abang nagngangalas sira manungud kadi, pagkangumunngumun darwang lalaki na nakabado sa makintab so biglang binnotwa sadto kaabay nira. 5 Sa grabing katakotan, so manga babayi tinniklod na ruta so lalawgun sadto raga, alagad sinabiyan sira ko manga lalaki, “Ngata ta inaanap ninyo a boway sa manga guraan? 6 Uda na iya sadi, naboway na iya otro! Narurumruman ninyo so sinabi niya kaninyo ko iya sadto pa Galilea, 7 ‘A Igin sa Tawo kaipowan na itao sa manga makasalan sagkud ipako sa kros sagkud sa ikatolong alduw maboboway iya otro’ . ” 8 Saka narumruman ko manga babayi so manga sinabi niya.
9 Ko nag-oli na sira galin sadto linubngan, binaretaan nira so Onse saka so iba pa ko ngamin na nangyari. 10 So manga babaying adi amo si Maria Magdalena, Juana, Maria na ina ni Santiago; sagkud iba pang manga babayi na kaiba nira so nagbareta kadi ko manga apostol. 11 Kindi diri sira tinnobod sadto manga babayi, ta so manga sinasabi nira uda kamutangan para kanda. 12 Alagad si Pedro tinnindug sagkud nagdalagan paiyan sadto lulubngan. Innokrong iya sagkud sinnilung sadto luug, alagad uda iya ibang nabayad kindi so telang ipinotos ko bangkay, kaya nag-oli iya na nagngangalas kin ono so nangyari.
So Raran Paiyan sa Emaus
(Mk. 16: 12-13)
13 Ko alduw man sanang adto, darwa sa manga disipolo ni Jesus so nag-iyan sa usad na baryo na a ngaran Emaus, na manga onseng kilometro so rayo galin sa Jerusalem. 14 Nag-ooroistorya sira manungud ko ngamin na nangyari. 15 Mantang nag-ooroistorya sira sagkud nag-oongaan manungud ko nangyari, rinnapo kanda si Jesus sagkud nakisabay kanda, 16 alagad diri nira nabidbiran si Jesus. 17 Inonga niya sira, “Ono pinag-oosipan ninyo?”
Pangala nagpondo sirang namumundu. 18 So usad kanda na a ngaran Cleofas, sinnimbag, “Ika sana po sa manga bisita sadi Jerusalem a diri nakakaisi kin ono so manga nangyari ko manga nakaaging alduw?”
19 “Onong manga bagay?” onga niya.
“Manungud ki Jesus na tagaNasaret,” simbag niya: “Usad na propetang makapangyariyan sa oosipun sagkud manga gibo sa atobangan ka Diyos sagkud manga tawo. 20 So manga padi sagkud so manga namomoon kanamu isinombong iya tanganing sintensyaan sa kagranan sagkud ipinako sa kros. 21 Iya kintana so linalaoman namu na lomiligtas ka Israel. Buku sana yan, ngowan ikatolong alduw poon na mangyari adi. 22 Kaya nabigla kami sadto nagkapirang babayi na kaiba namu, na malapakasaki nag-iyan na sadto lulubngan, 23 alagad diri nira natorakan so bangkay. Innabot sira sagkud sinabing nakabayad sira sa usad na kapaayagan ko manga anghel, na nagsasabing naboway si Jesus. 24 Agko man nagkapira sadto manga pag-iriba namu na nag-iyan sadto lulubngan sagkud arug man ko manga sinabi ko manga babayi so naabotan nira, ta di na nira nabayad si Jesus.”
25 Sinnabi si Jesus kanda: “Mga pangul, sagkud manga maloya a pagtobod! Ngata ta diri ninyo tinobod so sinabi ko manga propeta? 26 Bukung si Cristo migsakit ngona ka manga bagay na adi bago iya makaluug sa kamorawayan?” 27 Sagkud inisplikar ni Jesus kanda kin ono so nasasabi sadto Kasoratan manungud kanya poon pa sa libro ni Moises anggan sa sinorat ko manga propeta. 28 Ko arani na sira sadto baryo na iiyanan nira, so iwag-iwag ni Jesus bagana na baga so migpadagos pa sa pag-agi. 29 Alagad pinugulan iya ko darwa: “Domagos na ngona po ika sadi ta pasulnud na alduw sagkud nagngingitngit na.” Kaya inniba man iya kanda. 30 Ko iya sadto na lamesa kaiba nira, kinoko niya so tinapay, nagpasalamat sagkud binaak pagkakowa itinao kanda. 31 Pangala naboksan so manga mata nira sagkud nabidbiran nira si Jesus, kindi bigla iyang nauda sa pagsilung nira. 32 Nag-osip-osip sira sa kada usad: “Kaya palan arug kadto so namamatian ta, mantang kinakaosip niya kita sadto aagyan sagkud mantang inisplikar so manga Kasoratan.” 33 Kadto tolos binnowat sira sagkud binnalik sadto Jerusalem. Naabotan nira sadto na nagtitipon-tipon so Onse sagkud so iba pa nirang kaiba, 34 sagkud nagsabi: “Matood! So Kagorangnan naboway otro sagkud nagpabayad ki Simon!” 35 Kaya so darwa iinistorya man kin ono so nangyari kanda sadto aagyan, sagkud kin paono nira nabisto si Jesus ko pagbaak-baakun niya so tinapay.
Nagpabayad si Jesus sadto manga Disipolo Niya
(Mt. 28:16-20; Mk. 16:14-18; Jn. 20:19-23; Mga Gibo 1:6-8)
36 Abang padagos pa sirang nag-oosip manungud kadi, nagtindug si Jesus sadto bitnga nira sagkud sinabing: “Mapakaninyo a katoninungan!” 37 Nasindakan sagkud nakatakot sira ngamin, sa pag-unang nakabayad sira sa molto. 38 Kaya sinabi niya kanda: “Ngata kamo ta nariribaraw, sagkud ngata ta innabot a pagdododa sa isip ninyo? 39 Bayda ninyo a kamut sagkud manga tiil ko. Ako adi! Kap'tan ninyo 'ko sagkud silngan, a molto uda laman sagkud tolang, ako agko pareyo ka nababayad ninyo.”
40 Ko pagkasabi niya kadi, ipinabayad niya kanda so kamut sagkud tiil niya. 41 Diri pa sira nagtotobod holi ko grabing kaogmaan sagkud pagkangalas, inonga niya sira, “Agko kamo sadi pagkaun?” 42 Tinawan iya nira sa iniyuw na isura, 43 sagkud kinoko niya adto sagkud kinaun sa atobangan nira. 44 Sinabi ni Jesus kanda: “Amo 'di so sinasabi ko kaninyo ko kaiba pa 'ko ninyo: kaipowan na mangyari so ngamin na nasosorat manungud kanaku sa Layi ni Moises, sagkud sadto manga libro ko Propeta sagkud libro ko manga Salmo.”
45 Binoksan nira so kandang manga pag-iisip tanganing maintindiyan nira so Kasoratan. 46 Sinabi niya kanda: “Amo adi a nasosorat: si Cristo migsakit sagkud maboboway otro sa ikatolong alduw, 47 sagkud pagsulsul sagkud kapatawaran ka kasalan a dapat na itottoro sa ngaran niya sa ngamin na tawo, magpoon sa Jerusalem, 48 kamo a manga testigo ko ka manga bagay na adi. 49 Ipadadara ko kaninyo kin ono a ipinanoga ka kanakung Ama, alagad diri kamo maggalin sadto syodad anggan na diri kamo napopospos ka kapangyariyan galin sa itaas.
So Pagtaas ni Jesus sa Langit
(Mt. 16:19-20; Mga Gibo 1:9-11)
50 Pagkatapos iniba sira ni Jesus sadto lowas ko banwaan, sagkud pag-abot nira sa Betania, itinaas niya so kanyang kamut sagkud benindisyonan sira. 51 Abang benibendisyonan niya sira, iya man nagrarayo na paitaas sa langit. 52 Kaya nagsamba sira sagkud napaoli sa Jerusalem na agko dakulung kaogmaan. 53 Sagkud nagtiner sira sadto templo, na nag-oomaw sa Diyos.