23
Dinara si Jesus sa Atobangan ni Pilato
(Mt. 27:1-2; 11:14; Mk. 15:1-5; Jn. l8:28-38)
1 Nagpantindug so bilog na konsehoa sagkud dinara si Jesus ki Pilato. 2 Sagkud pinonan nirang akosaran iya, sagkud sinabing, “Natorakan namu a lalaking adi na nanonolsol sa manga tawong lomaban sa kanatung banwaan. Ipinagbawal niya a pagbayad sa bowis ki Ceasar sagkud sinabi niyang iya a Cristo, usad na hadi.”
3 Kaya inonga ni Pilato si Jesus, “Ika a hadi ka manga Judio?
‘Amo, arug ka pagkasabi mo’ , simbag ni Jesus.
4 Pangala inanonsiyo ni Pilato sadto namomoon ko manga padi sagkud sadto manga tawo, ‘Uda ako nakokong kasalan kontra sa tawong adi’ . ”
5 Alagad nagpipirit sira, sagkud sinnabi, “Tinintaran niya so manga tawo sa bilog na Judeab sa manga katottoroan niya. Nagpoon iya sa Galilea sagkud naka-abot na sadi ngowan!”
6 Sa pag-iirungug kadi, si Pilato nag-onga kin si Jesus tagaGalilea. 7 Ko maintindiyan niya na si Jesus nasa irarum ko pamamaala ni Herodes, ipinadara niya adi ki Herodes, na nasa Jerusalem man ko panawon na adto.
8 Ko mabayad ni Herodes si Jesus, naogma iya sa maraay, ta sa mauban ng panawon gosto niyang mabayad iya. Poon sadto manga narungug niya manungud ki Jesus, naglalaom iya na mabayad si Jesus na naggigibo sa milagro. 9 Kaya inongaonga niya si Jesus, alagad di basang sinnimbag. 10 So namomoon ko manga padi sagkud so manga paratottoro sa layi na nakatindug sadto, diri nagpopondo sa pagsawut kanya. 11 Pangala si Herodes sagkud so manga soldados niya inampak iya sagkud pinagtoyatoya, binadoan sa magayon sagkud ibinalik ki Pilato. 12 Ko panawon na adto si Pilato sagkud si Herodes nagin mag-amigo, na dati magkasogot.
13 Ipinabaoy ni Pilato so namomoon ko manga padi, so manga namomoon ko banwaan sagkud so manga tawo, 14 sagkud sinabi kanda, “Dinara ninyo kanaku a lalaking adi sa kasalan na panonolsol sa manga tawong lomaban. Pinag-adalan ko iya sa atobangan ninyo sagkud nasompongan ko na uda iya kasalan oyon sa manga isinosombong ninyo. 15 Magin si Herodes, kaya ibinabalik niya si Jesus sadi atu; arug ka nababayad ninyo, ta uda iya naginibong maraut para guranun. 16 Kaya ipapopokpok ko sanayya pagkatapos palilibriyun na.” 17 Kada Piyesta ka Paskowa kinakaipowan na magpalowas iya sa usad na nakapriso na pinipili ka manga tawo.
18 Alagad sabaysabay sirang nagkagrat, “Guranun a tawong an! Palibriyun si Barabas para kanamu!” 19 (Napriso si Barabas holi sa karibokan na nangyari sa banwaan sagkud pagguraan.)
20 Sa kagostowan ni Pilato na palibriyun si Jesus, nakiosip iya otro kanda. 21 Alagad padagos sirang nag-iiyak, “Ipako iya sa kros! Ipako iya sa kros!”
22 Sa ikatlong beses, sinabi ni Pilato otro kanda, “Ngata? Ono a kasalan na naginibo ka tawong adi? Uda ako mabayad na rason ngani iyang guranun. Kaya, ipapopokpok ko sanayya pagkatapos palilibriyun na.”
23 Alagad sa makusug na iyak pinipirit nira na ipako iya, sagkud so manga ipinag-iiyak nira nangyari. 24 Kaya si Pilato nagdesisyon na itao a kandang kamawutan. 25 Pinalowas niya so lalaki na inaayat nira, na nakapriso sa pangriribok sagkud pagguraan, sagkud itinao niya si Jesus tanganing gibowun so kamawutan nira.
Ipinako si Jesus sa Kros
(Mt. 27:32-44; Mc. 15:21-32; Jn.19:17-27)
26 Ko dara na nira si Jesus, pinugul ko manga soldados si Simon na tagaCirene na nasabat nira galin sa bokid, sagkud ipinapas'an kanya so kros kasonod ni Jesus. 27 Dakul na tawo so nagsosonod ki Jesus, kaiba so manga babaying nagtatangis sagkud nagmumundu para kanya. 28 Linilili sira ni Jesus sagkud nagsabi kanda, “Mga babaying tagaJerusalem, diri ninyo ako pagtangisan, tangisan ninyo a kaninyong sadiri sagkud a kaninyong manga igin. 29 Ta a panawon omaabot na sasabiyun ninyo, ‘Paladan a baog na babayi, a boros na diri nangidam, sagkud a diri nagpasoso’ ! ” 30 Pangala,
sasabiyun nira sa manga bokid, “Rugmaan ninyo kami!”
sagkud sa manga kolod, “Tambonan ninyo kami!”c
31 Ta kin a manga tawo gibowun a manga bagay na adi sa kawoy na berde pa, ono raw mingyari kin a kawoy mara na?”d
32 Agko pa sira dinarang darwang lalaki pareyo kriminal, na guguranun kaiba ni Jesus. 33 Ko makaabot na sira sadto logar na binabaoy na Bongo, ipinako nira sa kros si Jesus, kaiba ko manga kriminal, so usad sa too niya, so usad sa wala. 34 Sinnabi si Jesus, “Ama, patawarun mo po sira, ta diri nira isi a ginigibo nira.” Sagkud pinagbangabanga nira so bado ni Jesus sa paagi sa tawo gila.
35 So manga tawong nakatindug sadto nagmamasid, sagkud so manga namomoon pinagtoyatoya iya. Sinabi nira, “Iniligtas niya so iba; iligtas man niya a sadiri niya kin iya a Cristo na pinili ka Diyos.”
36 So manga soldados nag-abot man sadto sagkud pinagtoyatoya man iya. Pagkatapos tinangroan iya nira sa soka 37 sagkud sinabi, “Kin ika a Hadi ka manga Judio, iligtas mo sadiri mo.
38 Sagkud agko nakasorat sa pamaywan niya na mababasa sa, ‘ADI A HADI KA MGA JUDIO’ . ”
39 Usad sa manga kriminal na nakabitin tinoyatoya iya, “Bukung ika a Cristo? Iligtas mo a sadiri mo sagkud kami!”
40 Alagad so usad na kriminal dinawuy iya. “Diri ika nakatatakot sa Diyos, sabi niya, ‘na ika man sinintensyaan arug niya?’ 41 Tama sanang kita sinintensyaan holi ka manga ginibo ta. Alagad a lalaking adi uda naginibong sala.”
42 Pangala sinabi niya, “Jesus, rumruma man ako kin sadto nayka kahadian mo.”
43 Sinnimbag kanya si Jesus, “Sinasabi ko kanimo a kamatoran, ngowan tolos makaiibay ka kanaku sa paraiso.”
So Kagranan ni Jesus
44 Ko mig-alas dose na sa modto, nagngitngit so bilog na karagaan anggan sa alas tres sa apon, 45 ta so alduw nagpondo sa pagliwanag. Sagkud so kortina ko templo nabanga. 46 Kinnagrat sa makusug si Jesus, “Ama, sa kamut mo itinotogon ko a kanakung Espirito.” Ko masabi na niya adi, naotsan na iya.
47 So kapitan na nakabayad ko nangyari, nag-omaw sa Diyos sagkud nagsabi, “Matood na a lalaking adi matanos.” 48 So manga tawo na nagtitipon tanganing magsilung kadi, ko mabayad so nangyari, napaoli sirang tinotobtob so kandang ruruggan. 49 Alagad so ngamin na nakabibisto kanya, kaiba so manga babayi na nagsonod kanya poon sa Galilea, na nakatindug sa arayo, nabayad a manga bagay na adi.
Ilinubung si Jesus
(Mt. 27:57-61; Mk. 15:42-47; Jn. 19:38-42)
50 Ngowan agko usad na lalaki na a ngaran Jose, miyembro ko konseho, maraay sagkud matanos na lalaki, 51 na diri innoyon ko kandang desisyon sagkud manga ginibo. Galin iya sa Arimatea, usad na banwaan sa Judea sagkud nag-uulat ka pag-abot ka kahadian ka Diyos. 52 Nag-iyan iya ki Pilato sagkud inayat so bangkay ni Jesus. 53 Pangala, ibinaba niya so bangkay sadto kros, pinotos sa telang lino sagkud ibinutang sa lulubngan na diri pa basang nagagamit na inokit sa bato. 54 Alduw kadto sa Pag-aanda, ta so Alduw sa Pagpapaingalo migpoon na.
55 So manga babayi na nagsonod ki Jesus poon sa Galilea nagsonod man ki Jose, sagkud nabayad so linubngan sagkud kin paono ilinubung so bangkay ni Jesus. 56 Pangala nag-oli na sira sagkud nag-anda sa manga paamot na ipapayid sadto bangkay. Sagkud ko omabot so Alduw sa Pagpapaingalo, nagpaingalo sira sa pagsonod ko layi.