Gibo 1

Manga Gibo

ko manga Apostol

¹ Sadto naona kong libro, nabubutan kong Teofilo, isinorat ko so manungud ko ngamin na ginibo sagkud itinottoro ni Jesus ² anggan sa alduw na iya tinnaas sadto langit. Bago iya tinnaas tinottoroan niya sa paagi ko Espirito Santo so manga apostol na pinili niya. ³ Pagkatapos ko kagranan niya, nagpabayad iya sadto manga apostol sagkud nagtao sa makabibinser na proweba na iya boway. Nagpabayad iya kanda sa luug sa kwarentang alduw sagkud tinottoroan sira manungud ka kahadian ka Diyos. ⁴ Mantang iya kaiba nira, tinogon niya sira, ?Diri kamo maggalin sa Jerusalem, kindi ulatun ninyo a regalo na Espirito Santo na ipinanoga ka kanakung Ama, na narungug ninyo kanaku. ⁵ Ta si Juan nagbunyag sa tobig, alagad diri mig-uban kamo mabubunyagan sa Espirito Santo.?

⁶ Ko so manga apostol sagkud si Jesus nagkaiba-iba otro, inonga nira iya, sagkud sinnabi, ?Kagorangnan, ono, ibabalik mo na ngowan sa Israel a kahadian?? ⁷ Alagad sinnabi iya kanda, ?Diri na ninyo kaipowan na maisiyan a manga panawon o alduw na itinalaan ka Ama holi ka sadiri niyang kapangyariyan. ⁸ Alagad, omaako kamo sa kapangyariyan kin a Espirito Santo omabot kaninyo, sagkud kamo a migpatonay ko manga ginibo ko sa Jerusalem, sagkud sa bilog na Judea sagkud Samaria, anggan sa kaporoporowan ka kinaban.?

⁹ Pagkasabi niya kadi, itinaas na iya palangit mantang nakasilung sira kanya, anggan sa nalingdan na iya sa panganoron.

¹⁰ Biyo sirang nakatiurung sadto langit mantang inniitaas iya. Biglang agko darwang lalaking nakapoti na tinnindug sadto kaabay nira. ¹¹ ?Manga tagaGalilea,? sabi nira, ?Ngata ta nakatindug kamo sadi sagkud nakasilung sa langit? A Jesus na adi na kinoko kaninyo sagkud itinaas sa langit, bomabalik arug ko pagkabayad ninyo na inniitaas iya.?

Si Matias so Napiling Kasalida ni Judas

¹² Pangala, binnalik sira sadto Jerusalem galin sa Bokid ka manga Olibo, na agko usad na kilometro so rayo galin sadto syodad. ¹³ Ko omabot na sira, tinnaas sira sadto kwartong pinagdadagosan nira. So manga isadto amo si Pedro, Juan, Santiago sagkud Andres, Felipe sagkud Tomas, Bartolome sagkud Mateo, Santiago na igin ni Alfeo, sagkud Simon na makabayan sagkud si Judas na igin ni Santiago. ¹⁴ Nagkauusad sira sa pangangadyi, kaiba so manga kababayiyan sagkud si Maria na ina ni Jesus, sagkud so manga ngod niya.

¹⁵ Pagkaagi sa pirang alduw, nagkatitipon so sentobente katawo na manga paratobod. Tinnindug si Pedro sadto atobangan nira ¹⁶ sagkud sinnabi, ?Manga ngod, a Kasoratan kinakaipowan na mangyari arug sa sinasabi ka Espirito Santo mauban ng panawon sa paagi ni David manungud ki Judas, na nagsirbing giya sadto manga rinnakup ki Jesus. ¹⁷ Ta iya usad sa manga kaiba ta sagkud kadamay sa pagmiministeryo.?

¹⁸ (So bayad ko kanyang karatan, ibinakal sa raga, sadi iya pasowing naolog, pinnotok so boros sagkud linnowas so kanyang bitoka). ¹⁹ Naisiyan adto ko ngamin na tagaJerusalem, kaya sa sadiri nirang oosipun, binaoy nirang Akeldama a ragang adto, na a buut sabiyun, ?Bokid na binayaran sa Rogo.?

²⁰ Ta sinnabi si Pedro, ?Nasosorat sa libro ka manga Salmo,

?A istaran niya padagos ng pabayaan;

sagkud diri na iistaran dawa kiisay pa man,?

sagkud,

?Koonon sa iba a kanyang katungran.?

²¹ Kaya, kaipowan tang pomili sa usad na lalaki na galin sa manga kaibaiba ta ko bilog na panawon na a Kagorangnan na si Jesus kaiba ta pa, ²² poon ko bunyagan iya ni Juan anggan ko panawon na itinaas na iya sadto langit. Usad na makaiiba tang migpatonay ko pagkaboway niya otro.?

²³ Sagkud darwang lalaki so pinagpilian nira: si Jose na binabaoy na Barsabas (na binabaoy man na Justo) sagkud si Matias. ²⁴ Pangala nangadyi sira, ?Kagorangnan, isi mo a poso ka kada usad. Ipabayad mo kanamu kin siisay sa darwang adi a pipiliun mong ²⁵ magin apostol na gomigibo ko katungran na binayaan ni Judas na inniyan sadto logar na bagay kanya.? ²⁶ Pangala, nagtawo o gila sira, sagkud si Matias so nanggana, kaya iya so nakarogang sadto onseng apostol.