2
So Pag-abot ko Espirito Santo
1 Ko omabot so alduw ko Pentecostes, nangagtitipon sira ngamin sa usad na logar. 2 Pagkangumunngumun biglang nakarungug sira sa nagsasagobsob na angin galin sa langit sagkud napono kadto so baluy na pinagtitiponan nira. 3 Nabayad nira so bagana rirang kalayo na tinnogpa sa kada usad kanda. 4 Sagkud sira ngamin napospos sa Espirito Santo sagkud pinnoon ng mag-osip sa manlainlain na oosipun base sa itinao ko Espirito Santo.
5 Agko manga Judiong debotado na galin sa manlainlain na nasyon na nakaistar sadto Jerusalem. 6 Ko marungug nira so sagobsob, nangagtipon so manga tawo. Nangalas sira ngamin ko marungug nira so manga disipolong nag-oosip ko sadiri nirang oosipun. 7 Nangalas sira saigo sagkud sinnabi, ?Bukung manga tagaGalilea sira ngamin? 8 Ngata ta nakapag-oosip sira ka manga oosipun ta? 9 Agko sadi manga tagaPartia, Media sagkud Elam, tagaMesopotamia, Judea, saka Capadocia, tagaPonto sagkud Asya, 10 tagaFrigia sagkud Pamfilia, tagaEhipto sagkud manga taga rehiyon sa Libya arani sa Cirene. So ibang manga bisita tagaRoma, 11 manga Judio sagkud bukung manga Judio na innako sa Judaismo, sagkud so iba manga tagaCreta sagkud Arabia. Alagad, narungug ta ngamin na nag-oosip sira sa sadiri tang manga oosipun manungud ka manga ngangalasan na ginibo ka Diyos!? 12 Nagngangalas sagkud nalilibungan na nag-iinongaan sira, ?Ono a buut sabiyun kadi?? 13 Alagad, tinoyatoya sira ko iba sagkud sinnabing, ?Borat a manga tawong an!?
So Sermon ni Pedro
14 Pangala tinnindug si Pedro kaiba so onseng apostol, sagkud nag-osip sa makusug, ?Manga kapareyo kong Judio sagkud kamong manga nakaistar sa Jerusalem, irunggun sagkud intindiyun ninyo a sasabiyun ko. 15 Bukung borat a manga tawong adi na arug ka pag-una ninyo, ta alas nowebe pa sana sa ramrag! 16 Buku, ta amo adi so sinabi ni Propeta Joel,
17 ?Sa manga oring alduw, sabi ko Diyos,
itatao ko a kanakung Espirito sa ngamin na tawo.
A manga igin ninyong lalaki sagkud babayi migpropesiya,
a manga soltero makababayad sa kapaayagan galin sa Diyos,
a manga gorang na lalaki migkaagko manga pangatorogan.
18 Pati a manga mamandaan ko, lalaki man o babayi,
tatawan ko man ka kanakung Espirito ka manga alduw na an,
sagkud sira migpropesiya.
19 Migpabayad ako sa manga ngangalasan sa langit
sagkud manga tanda sa raga,
rogo, kalayo, saka maib-ug na aso.
20 A alduw migngitngit
sagkud a bolan migpolang bagana rogo
bago omabot a dakulu sagkud mamorawayun na Alduw ka Kagorangnan.
21 Sagkud a ngamin na bomaoy
sa ngaran ka Kagorangnan maliligtas.?
22 ?Manga Israelita, irungga ninyo adi: si Jesus na tagaNazaret ipinadara ka Diyos para kaninyo. Pinamatoranan adi ko manga milagro, ngangalasan sagkud manga tanda na ginibo ka Diyos sa paagi niya. Isi ninyo adi ta a ngamin na adi ginibo niya sa bitnga ninyo. 23 Iya a itinao kaninyo oyon sa katoyowan sagkud kadonongan ka Diyos, alagad ipinapako ninyo iya sagkud ipinaguraan sadto manga parakasala. 24 Alagad binoway iya otro ka Diyos, ilinibri sa kagranan ta imposibleng mapairarum iya sa kapangyariyan ka kagranan. 25 Si David sinnabi manungud kanya,
?Nabayad ko a Kagorangnan na pirmi kong kaabay,
kaya diri ako natatanyug ta iya kaiba ko.
26 Kaya a poso ko naoogma sagkud a rira ko nag-oomaw;
sagkud naboboway ako sa paglaom;
27 ta diri mo ako pinababayaan sa kinaban ka manga guraan,
sagkud diri mo totogotan na malupa a Banal mong Mamandaan.
28 Itinottoro mo kanaku a raran paiyan sa boway;
holi ka kanimong presensiya mapopono ako sa kaogmaan.?
29 ?Manga ngod, sigorado kong sinasabi kaninyo na a patriyarkang si David nagraan sagkud ilinubung, sagkud a kanyang lulubngan isadi pa anggan ngowan. 30 Alagad, iya propeta na nakaiising a Diyos agko panoga kanya, na usad sa erensiya niya a magigin hadi na omuula sa trono niya. 31 Nabayad niya so mingyariyun, kaya isinabi niya so pagkaboway otro ni Cristo, ko sabiyun niyang: Diri iya pababayaan sa lulubngan, ni malupa a kanyang awak. 32 A Jesus na adi binoway otro ka Diyos sagkud kami ngamin migpatonay ka manga bagay na adi. 33 Ko itinaas iya sa too ka Diyos, rinisibi niya sa kanyang Ama so ipinanogang Espirito Santo sagkud ipinadara kanamu arug ka nababayad sagkud narurungug ninyo ngowan. 34 Diri tinnaas sa langit si David, alagad sinnabi iya,
?A Kagorangnan sinnabi sa kanakung Kagorangnan:
Omula ika sadi too ko
35 anggan na a manga kasogot mo gibowon kong
tongtongan ka manga tiil mo.?
36 Kaya kinakaipowan na maisiyan ka ngamin na tagaIsrael adi: A Jesus na ipinapako ninyo sa kros ginibo ka Diyos na Kagorangnan sagkud Cristo.a
37 Ko marungug adto ko manga tawo, naporisaw sira sagkud sinabi ki Pedro sagkud sadto ibang manga apostol, ?Manga ngod, ono a kaipowan namung gibowon??
38 Sinnimbag si Pedro, ?Magsulsul sagkud magpabunyag a kada usad kaninyo, sa ngaran ni Jesu Cristo tanganing mapatawad a kaninyong manga kasalan. Sagkud maririsibi ninyo a regalo ka Espirito Santo. 39 Ta a panoga para kaninyo, sa manga igin ninyo sagkud para sa ngamin na nasa arayo, sa ngamin na binabaoy ka Kagorangnan na Diyos.?
40 Dakul pang manga oosipun na patanid so sinabi niya kanda sagkud nakiosip, ?Rayoan ninyo a maraut na henerasyon na adi tanganing makaligtas kamo.? 41 So ngamin na innako ko manga sinabi niya nagpabunyag, sagkud nasa tres mil so nakarogang kanda ko alduw na adto.
So Pagtitipon ko manga Paratobod
42 Idinidikar nira so kandang panawon sadto manga katottoroan ko manga apostol sagkud sa pakikipagtipon, sa pagbabangabanga ko tinapay sagkud sa pangangadyi. 43 Holi ko dakul na manga milagro sagkud ngangalasan na ginibo ko manga apostol, so kada usad nakamati sa katakotan sagkud paggalang. 44 So ngamin na paratobod nag-ibaiba sagkud so manga pagsorosadiri nira pinag-usad para sa ngamin. 45 Ipinabakal nira so kandang pagsorosadiri, sagkud ipinanao oyon sa pangangaipo ko kada usad. 46 Oroalduw, padagos sirang nagtitipontipon sadto templo; nagbabangabanga ko tinapay sagkud nangagkakaun na agko kaogmaan sagkud sinserong poso, 47 na nag-oomaw sa Diyos, sagkud namumuya kanda so ngamin na tawo. Kada alduw, irinorogang kanda ka Kagorangnan so manga naliligtas.