3
Pinaraay ni Pedro so Pobreng Lopog
1 Usad na alduw, si Pedro sagkud si Juan inniyan sadto templo alas tres sa apon oras sa pagpapangadyi. 2 Agko lalaking lopog poon pa sa pagkainigin niya na dinadara sadto trangkaan ko templo na binabaoy na Magayon, ibinubutang iya sadto oroalduw tanganing makilimos sadto manga inniiyan sadto templo. 3 Ko mabayad niya si Pedro sagkud si Juan na paluug na, innayat iya sa limos. 4 Sinilngan iya ni Pedro sagkud ni Juan. Pangala sinabiyan iya ni Pedro, ?Somilung ika kanamu!? 5 Kaya sinnilung kanda so lalaki, sa paglaom na iya lilimosan.
6 Pangala sinnabi si Pedro, ?Uda ako pirak sagkud uda ako bolawan, alagad kin ono a agko ako itatao ko kanimo. Sa ngaran ni Jesu Cristo na tagaNazaret, omagi ika!? 7 Sagkud kinabit iya ni Pedro sa toong kamut, tinabangan na makatindug, sagkud kadto tolos so tiil sagkud pagsokmolan ko lalaki, kinnusug. 8 Naglokso iya sagkud nagpoon ng mag-agi. Pangala inniyan iya sadto templo kaiba nira, nag-aagi sagkud nagloloksong nag-oomaw sa Diyos. 9 Ko mabayad adto ko ngamin na tawo na nakaaagi na iya sagkud nag-oomaw sa Diyos, 10 nabidbiran nira na iya so lalaking nakaula sagkud nakikilimos sadto trangkaan, nangalas sira ngamin ko nangyari kanya.
Nangadal si Pedro
11 Mantang nakakaput so pobre ki Pedro sagkud ki Juan, so ngamin na tawo nangalas sagkud dinnalagan paiyan kanda sadto logar sa templo na binabaoy na Asotiya ni Solomon. 12 Ko mabayad adi ni Pedro, sinnabi iya kanda, ?Manga Israelita, ngata kamo ta nagngangalas ka nangyaring adi? Ngata ta tinitiurungan ninyo kami na bagana baga sa sadiri namung kapangyariyan sagkud kabanalan kaya nagibo namung makaagi a lalaking adi? 13 A Diyos ni Abraham, Isaac sagkud Jacob, a Diyos kana kanatung ginikanan, amo nagpapamoraway ka kanyang oripun na si Jesus. Alagad iya itinao ninyo tanganing magraan, pinagnigaran sa atobangan ni Pilato, dawa ngani nagdesisyon na adi na palibriyun na iya. 14 Pinaindaan ninyo a usad na Banal sagkud Matanos, sagkud inayat na so paraguraan sa tawo amo palibriyun para kaninyo. 15 Ginuraan ninyo a pinaggagalinan ka boway, alagad binoway iya otro ka Diyos. Kami migpatonay ka manga bagay na adi. 16 Sa kapangyariyan ka ngaran ni Jesus, ading lalaki na nababayad sagkud bistado ninyo nagin makusug. Nangyari adi holi sa pagtobod sa ngaran niya. A pagtobod ki Jesus amo nagtao sa kompletong kapaomayan kanya, pareyo ka nababayad ninyo.
17 ?Ngowan manga ngod, isi ko na diri ninyo naiintindiyan so ginibo ninyo, arug ko manga ginibo ko manga namoon kaninyo. 18 Alagad sa ginibo ninyong adi nangyari so sinabi kadto ka Diyos sa paagi ko manga propeta na si Cristo kaipowan na magtius. 19 Kaya magsulsul kamo, sagkud manombalik sa Diyos, tanganing patawarun kamo ka manga kasalan ninyo, sagkud tawan kamo sa kakusugan na galin sa Kagorangnan, 20 sagkud ipadadara niya si Jesu Cristo, na pinili niya para kaninyo. 21 Kaipowan ngona iyang magtiner sadto langit anggan sa omabot na a panawon na bagowon ka Diyos a ngamin na bagay, arug ko ipinanoga niya uban ng panawon sa paagi ko manga banal na propeta. 22 Ta sinnabi si Moises, ?A Kagorangnan ninyong Diyos migpili sa usad ninyong kaerensiya sagkud gigibowon na propetang arug ko. Irunggun ninyo a ngamin na sasabiyun niya kaninyo. 23 Ta a siisay man na diri mag-irungug kanya, isosoway sa banwaan ka Diyos sagkud padodosaan sa uda kasagkuran.?
24 ?Sagkud a ngamin na propeta magpoon pa ki Samuel, sagkud sa manga sinnonod pa kanya, kadakul man ko sinabi manungud ka manga alduw na adi. 25 Para kaninyo a manga panoga ka Diyos na sinabi niya sa paagi ko manga propeta, sagkud ko kasondoan na ginibo niya sa kaninyong manga ginikanan ko magsabi iya ki Abraham, ?Holi ka kanimong manga erensiya, bebendisyonan a ngamin na tawo sa kinaban.? 26 Kaya pinili ka Diyos a kanyang mamandaan, sagkud kamo a onang pinaiyanan kanya, tanganing bendisyonan sagkud tabangan kamong tomalikod sa karatan.?