Sorat ni Pablo sa manga
TagaRoma
Kapinonan
Usad sa nangongonang katoyowan ka Sorat ni Pablo sa manga tagaRoma amo na makapag-anda a manga Cristiyano sadto Roma sa pagbisita niya.
Plano niyang makapagsirbi sadto sa gatikot na panawon, pangala sa tabang nira, makadagos iya sa Espanya. Nagsorat si Pablo sa pag-isplikar ka kanyang pagkaintindi sa Cristiyanong pagtobod sagkud kin ono a buut sabiyun kadi sa pamomoway ka manga Cristiyano. Sa librong adi makokoko a kabilogan ka mensayi ni Pablo.
Pagkatapos na komostawun ni Pablo so manga Cristiyano sadto Roma sagkud sabiyun na ipinapangadyi niya sira, sinabi ni Pablo so katowoyan ka sorat na adi, ?Ipinapaayag ka Maraay na Bareta kin paonong ginibong matanos ka Diyos a tawo arug niya: adi sa paagi ka pagtobod magpoon pa sa kapinonan anggan sa kataposan.? (1:17)
Pangala a katoyowan na adi inisplikar niya. Na a ngamin na tawo, Judio man o bukung Judio, kaipowan magin matanos sa atobangan ka Diyos, ta a ngamin nasa irarum ka kapangyariyan ka kasalan sagkud adi mingyari sana kin a manga tawo magtobod ki Cristo. A bagong boway san ki Cristo amo a iriniritrato ni Pablo sagkud amo adi a bonga ka bagong relasyon ka tawo sa Diyos. A paratobod nagkakaagko ka katoninungan na galin sa Diyos, sagkud makalilibri iya sa kapangyariyan ka kasalan sagkud kagranan holi sa Espirito ka Diyos. Sa kapitolo 5-8 inisplikar ni Pablo a katoyowan ka Layi ka Diyos sagkud a kapangyariyan ka Espirito Santo sa boway ka manga paratobod. Pangala inisplikar man ni Pablo kin ono a logar ka manga Judio sagkud ka manga bukung Judio sa plano ka Diyos para sa ngamin na tawo. Sa kataposan ka sorat niya, sinabi niya na a pagtalikod ka manga Judio ki Jesus kaiba sa plano ka Diyos na sa paagi ka pagtalikod na adto, a pagligtas ka Diyos nakaabot sa ngamin na tawo, dawa sa manga bukung Judio. Alagad nagtotobod si Pablo na diri mig-uban a pagtalikod na adi ka manga Judio ki Jesus.
Sa oring parte ka sorat, sinabi niya a kinakaipowan na pamomoway ka usad na Cristiyano, orog na a manungud sa pagkakabinutan. Inisplikar man sadi ni Pablo a manungud ka pagsisirbi sa Diyos, a obligasyon ka manga Cristiyano sa kandang gobyerno sagkud sa kada usad. Sinabi man niya so manga kaongaan manungud sa pagkaun sagkud a manungud ka Alduw ka Pagpapaingalo, na nagigin sidsiran ka ibang manga kangoran sadto Roma. Nagtapos so sorat niya sa pangongomosta sagkud pag-omaw sa Diyos.
Manga Luug
Kapinonan (1:1-17)
Kaipowan ka tawo a kaligtasan (1:18-3:20)
A paagi ka pagligtas ka Diyos (3:21-4:25)
A bagong boway ki Cristo (5:1-8:39)
A Israel sa plano ka Diyos (9:1-11:36)
A ogaling Cristiyano (12:1-15:13)
Kataposan sagkud personal na pangongomosta (15:14-16:27)