9
A Pagkapili ka Diyos sa Israel
1 Nagsasabi ako sa matood ta ako parasonod ni Cristo. Diri ako nagbobotig. A konsensiya ko sa pangongona ka Espirito Santo nagpapamatood na a sinasabi ko matood. 2 Grabi a kamunduan ko sagkud diri maalin a kulug ka poso ko, 3 holi sa manga kapareyo kong Judio. Mas gogostowon ko pang isompa sagkud masoway ki Cristo, kin adi makararaay kanda. 4 Manga Israelita sira sagkud ibinilang ka Diyos na manga igin niya. Ipinabayad niya kanda a maliwanag na tanda na nagpapabistong iya kaiba nira. Nakipagkasondo kanda a Diyos sagkud kanda man itinao a Layi, a matood na pagsamba sagkud a manga panoga. 5 So manga ginikanan nira manga importanteng tawo kadto, sagkud gikan man kanda si Cristo ko iya nagpakanitawo, na amo a Diyos na makapangyariyan sa ngamin. Omawun iya anggan pa man! Amen.
6 Diri ko sinasabi na a panoga ka Diyos diri naotob, ta bukung ngamin na Israelita kaiba sa pinili ka Diyos. 7 Sagkud diri man ibinilang na erensiya ni Abraham a ngamin na gikan kanya. Arug kadi a sinabi ka Diyos, ?A miggikan sana ki Isaac a ibibilang na erensiya mo.a? 8 Buut sabiyun bukung ngamin na erensiya ni Abraham ibinilang na igin ka Diyos, kindi so manga igin sana na oyon sa panoga ka Diyos. 9 Ta arug kadi a panoga ka Diyos ki Abraham, ?Sa tamang panawon bomabalik ako, omaabot ako sagkud migkaigin si Sara sa usad na lalaki.b?
10 Sagkud buku sana yan. Sa paagi man ko magkarwang igin ni Rebeca sagkud ko ginikanan tang si Isaac, ipinabayad man ka Diyos na bukung ngamin na galin ki Abraham ibinilang na manga igin niya. 11 Alagad bago pa sira ipangigin, bago sira makagibo sa maraay o maraut, nakarisibi si Rebeca sa mensayi galin sa Diyos. A mensaying adi nagpapabayad na a Diyos nagpipili ka oyon sa sadiri niyang katoyowan, 12 bukung sa paagi ka kandang maraay o maraut na gibo. Ta sinabi niya ki Rebeca, ?Migsirbi a gorang mong igin sa oring igin.? 13 Oyon ngani sa nasosorat, ?Nabutan ko si Jacob, sagkud ikinaungut ko si Esau.c?
?Maeerak ako sa gosto kong kaerakan,
sagkud pigmakulgan ko a gosto kong pagmakulgan.?d
16 Kin arug kan, a pagpili ka Diyos diri nakabase sa kagostowan ka tawo o sa ginibo niya, kindi sa pagkaerak ka Diyos. 17 Ta oyon sa Kasoratan, sinabi ka Diyos ki Faraon na hadi ka Ehipto, ?Ginibo ta ikang hadi tanganing sa paagi mo maipabayad a kanakung kapangyariyan, sagkud maipaayag a kanakung ngaran sa bilog na kinaban.e? 18 Kaya ngani kinaeerakan ka Diyos a siisay man na gosto niyang kaerakan, sagkud ginigibo niyang kusung a gosto niyang magin kusung.
A Kaungtan sagkud Pagkaerak ka Diyos
19 Sasabiyun mo naman kanaku, ?Kin arug kan, ngata ta binabasol ka Diyos a tawo? Siisay a makakokontra ka kagostowan niya?? 20 Alagad siisay ika para magkusug buut na somimbag ka arug kan sa Diyos? Masasabi kaya ka usad na koron sa paragibo sa koron na, ?Ngata ta ginibo mo akong arug kadi?? 21 Uda raw poder a paragibo sa koron na gomibo sa pang-importanting okasyon sagkud pang-ordinaryo na koron galin sa uusad na tompok na lamod?
22 Arug man kan a Diyos. Dawa gosto na niyang ipabayad a kapangyariyan niya sagkud kaungtan sa manga makasalan, alagad bilog na tiyaga niyang tinius so manga tawo na kintana kaipowan ng padosaan. 23 Ginibo niya adto tanganing ipabisto a uda kapareyo niyang kapangyariyan sa manga tawong kinaerakan niya, na kadto pa iinanda na niya para sa kamorawayan. 24 Kita a manga binaoy ka Diyos, buku sanang galin sa manga Judio kindi so manga galin man sa manga bukung Judio. 25 Arug kadi a sinasabi niya sa sinorat ni Oseas,
?So dating buku kong banwaan, babaoyon kong ?banwaan ko,?
sagkud so dating diri ko nabubutan, babaoyon kong ?nabubutan ko.?
26 Sagkud sa mismong logar na pinagsabiyan sira ka, ?Buku ko kamong banwaan,f?
babaoyon sirang ?manga igin ka boway na Diyos.? ?
27 Amo man adi a ipinaayag ni Propeta Isaias manungud sa Israel,
?Dawa magin arug kadakul ka baybay sa dagat a bilang ka manga Israelita,
gatikot sana kanda a maliligtas. 28 Ta padadaliun ka Kagorangnan a sigoradong pag-osgar sa manga tawo sa kinaban.? 29 Si Isaias man a nagsabi,
?Kin a Makapangyariyan na Kagorangnan
diri nagtagak sa nagkapira sa kanatung erensiya,
naarug kintana kita sa Sodoma sagkud Gomorra.g?
A Israel sagkud a Maraay na Bareta
30 Ono ngowan a masasabi ta manungud kadi? So manga bukung Judio na diri nag-ingoa na maibilang na matanos amo ibinilang na matanos sa paagi ka pagtobod nira. 31 Alagad so manga Judio na nag-ingoa saigo na magin matanos sa Diyos sa paagi ka Layi, diri nakaotob ko layi. 32 Ngata ta diri? Ta so kandang pag-ingoa bukung holi sa pagtobod kindi sa manga gibong maraay. Kaya nasingkog sira sa ?batong kasisingkogan na uda iba amo si Cristo.? 33 Arug ka nasosorat,
?Migbutang ako sa Zion ka batong masisingkogan,
Usad na dakulung bato na migpadapla kanda.
Alagad a siisay man na magtobod kanya, diri mapasusupug.h?