8
Pamomoway Oyon sa Espirito Santo
1 Kaya ngowan, diri na oosgaran na mapadosaan a manga tawong nakipag-usad na ki Cristo Jesus. 2 Holi sa pakikipag-usad ta ki Cristo Jesus pinalibre na kita sa kapangyariyan ka kasalan sagkud kagranan sa paagi ka kapangyariyan ka Espirito Santo na nagtatao kanatu sa bagong boway. 3 Ginibo ka Diyos a diri nagibo ka Layi holi sa natoralesang kaloyaan ka tawo. Isinobol niya a sadiri niyang Igin na nagpakanitawo tanganing amo padosaan holi sa kanatung manga kasalan. Sa arug kadtong paagi, naalin so kapangyariyan ka kasalan na nag-ooripun kanatu. 4 Ginibo adi ka Diyos tanganing kitang nagkokoyog sa Espirito Santo, bukung sa sadiring kaisipan, magkaagko kapangyariyan na komoyog sa tamang kamandaan ka Layi. 5 A manga namomoway oyon sa gosto ka laman uda pinapaalagaan kindi a manga bagay na oyon sa laman, alagad a manga namomoway oyon sa Espirito Santo nagpapaalaga sa manga bagay na gosto ka Espirito Santo. 6 A kamawutan ka manga bagay na para sa laman, nagbobonga sa uda kasagkuran na pagkasoway sa Diyos, alagad a pag-iingoa sa manga bagay para sa Espirito, nagbobonga ka boway sagkud katoninungan. 7 Kin kinokoyog ka tawo a gosto ka makasalan niyang pagkatawo, magigin kasogot iya ka Diyos ta diri niya kinokoyog a layi ka Diyos, sagkud diri niya adi kayang koyogon. 8 Kaya a manga namomoway na nagkokoyog sa gosto ka makasalan niyang pagkatawo diri pwedeng kamuy'an ka Diyos. 9 Alagad kamo, diri na kamo namomoway oyon sa laman kindi oyon sa Espirito Santo, kin talagang a Espirito isan kaninyo. A siisay man na uda Espirito ni Cristo bukung sadiri ni Cristo. 10 Alagad kin si Cristo isan kaninyo, dawa magraan a awak ninyo holi sa kasalan, boway man a espirito ninyo ta ginibo kamong matanos ka Diyos. 11 Usad pa, a Diyos a binnoway otro ki Cristo, kaya kin isan kaninyo a Espirito Santo, iya man a migtao ka boway sa kaninyong awak na migraan sa paagi ka kanyang Espirito na isan kaninyo.
12 Kaya manga ngod, buku na kitang oripun ka natoralesa ka kamawutan ka laman, kaya diri na kita kaipowan na mamoway oyon sa laman. 13 Ta masosoway kamo sa Diyos anggan pa man kin namomoway kamo oyon sa laman, alagad kin tinalikokoran ninyo a manga gibo ka laman sa tabang ka Espirito Santo, maboboway kamo anggan pa man. 14 A ngamin na pinangongonaan ka Espirito ka Diyos, manga igin ka Diyos. 15 Ta a Espiritong itinao kanatu ka Diyos, diri kita ginibong oripun tanganing makatakot, imbes ginibo kitang manga igin ka Diyos. Kaya holi sa Espirito Santo agko na kita poder na bomaoy sa Diyos ka, ?Ama! Ama ko!? 16 A Espirito Santo ngani a nagpapamatood, kaiba ka kanatung espirito, na kita manga igin ka Diyos. 17 Sagkud mantang kita manga igin niya, kita manga tagapagmana ka Diyos sagkud kaibang tagapagmana ni Cristo. Holi ta kin magsakit kitang kaiba ni Cristo, makaiiba man kita sa kamorawayan niya.
A Omaaboton na Kamorawayan
18 Ibinibilang ko na a manga kadipisilan na namamatian ta ngowan na panawon diri maipapareyo sa kamorawayan na ipababayad kanatu sa omaaboton. 19 Nagmamawut saigo a ngamin na linalang na iayag ka Diyos a manga tonay niyang igin. 20 Ta diri nangyari so katoyowan ka Diyos para sa manga linalang niya, bukung sa kagostowan nira, kindi ta amo adi a kabutan ka Diyos. Alagad agko pa paglaom, 21 na a ngamin na linalang palilibriyun ka Diyos tanganing diri na malupa, sagkud tanganing makaparte sa mamorawayun na pagkalibre ka manga igin ka Diyos. 22 Isi ta na anggan ngowan a ngamin na linalang, nag-aadrangay sa pagsakit. 23 Buku sanang sira! Kita man na manga nag-ako ka Espirito Santo bilang onang regalo ka Diyos, nag-aadrangay man mantang inuulat a pag-ampon kanatu ka Diyos, a pagtobos ka kanatung manga awak. 24 Ta amo adi linalaoman ta ko kita maligtas. Ta kin adi nangyari na, maglaom pa raw kita kadi? Ta uda naglalaom sa bagay na nangyari na. 25 Alagad kin naglalaom kita sa diri ta nababayad, inuulat ta adi sa bilog na pagtitiyaga. 26 Arug man kan, tinatabangan kita ka Espirito Santo sa manga kaloyaan ta. Diri kita tattaong mangadyi sa tama alagad a Espirito Santo na mismo a nangangadyi sa Diyos para kanatu sa manga inadrangay na diri ta naipaaayag sa manga oosipun. 27 Sagkud naiintindiyan ka Amang nakarururup ka kanatung manga poso sagkud nakaiintindi ka sinasabi ka Espirito Santo, ta iya a nangangadyi para sa manga ginibong matanos, oyon sa kabutan ka Diyos.
28 Isi ta na sa ngamin na bagay a Diyos naggigibo para sa ikararaay ka manga nabubuut kanya, sa manga binaoy niya oyon sa kanyang kabutan. 29 Ta poon pa kadto isi na ka Diyos kin siisay a sadiri niya, sagkud itinagama niya sira tanganing magin arug ka kanyang Igin. Holi kan, nagin gorang ta iyang ngod. 30 Sagkud a manga itinagama niya kadto pa na magin arug ka kanyang Igin, manga binaoy man niya. A manga binaoy niya, kanya man na pinatawad, sagkud a manga pinatawad niya tinawan man niya ka kamorawayan arug ka kanyang Igin.
A Pagkabuut ka Diyos
31 Ono pa a masasabi ta manungud kadi? Kin a Diyos sorog kanatu, siisay a makalalaban kanatu? 32 Diri niya ipinangimut a sadiri niyang Igin, kindi itinao niya para kanatu ngamin. Kin naitao niya kanatu a Igin niya, diri raw niya itatao kanatu a ngamin na bagay? 33 Siisay a omaakosar kontra kanatu na pinili ka Diyos, mantang a Diyos a nagpapatawad kanatu? 34 Siisay man a mig-osgar kanatu? Si Cristo Jesus raw na nasa toong parte ka Diyos? Iya pa ngani a nagraan sagkud naboway otro, sagkud ngowan tagapag-ultanan para kanatu. 35 Ono a makapagsoway kanatu sa pagkabuut ni Cristo? A pagsakit raw, a kamunduan, a kadipisilan, pag-alup, kapobreyan, peligro, o a kagranan? 36 Oyon sa nasosorat,
?Alang-alang kanimo, pirmi kaming arani sa kagranan.
Bagana kami manga karnerong bobonoon.a?
37 Alagad dawa namatian ta a ngamin na klase ka kadipisilan na adi, diri kita kayang daugun kadi kindi, nanggana kita holi ki Cristo na nabubuut kanatu. 38 Ta sigorado ako na uda kanatu makasosoway sa pagkabuut ni Cristo. Dawa a kagranan o a boway, manga anghel o maraut na espirito, o iba pang kapangyariyan, o ono man na mangyari ngowan o sa omaaboton, 39 sagkud ono man na kapangyariyan sa itaas o sadi ibaba. Uda siisay man o ono man na linalang, a makasosoway kanatu sa pagkabuut ka Diyos na isan ki Cristo Jesus na kanatung Kagorangnan.