7
Uda na sa Irarum ka Layi
1 Manga ngod, nakaiintindi kamo ka Layi, kaya naiintindiyan ninyo na a usad na tawo sakup sana ka Layi mantang iya naboboway. 2 Kaya a usad na babayi sakup ka kanyang agom mantang adi naboboway. Alagad kin a agom niya magraan, buku na iyang sakup ka layi ka mag-agom. 3 Kaya kin makiusad iya sa ibang lalaki na boway pa man a agom niya, migkasala iya sa pagpapasambay. Alagad kin magraan na a agom niya, buku na iyang sakup ka laying an. Sagkud kin mag-agom iya otro, diri iya migkasala sa pagpapasambay. 4 Arug man kan kamo, manga ngod, buku na kamong sakup ka Layi ta parte na kamo ka awak ni Cristo. Kaya ngowan kaiba na kamo sa manga nakipag-usad kanya sa pagkaboway otro, tanganing magbonga sa maraay na gibo para sa Diyos. 5 Ko naboboway pa kita sa dating pagkatawo, a manga mararaut tang pagmawut na ginisung ka Layi a nagboboyo kanatu na gomibo ka manga bagay na omaabot sa uda kasagkuran na pagkasoway sa Diyos. 6 Alagad ngowan nakalibre na kita sa kapangyariyan ka Layi na dating nag-ooripun kanatu. Kaya ngowan nagsisirbi kita sa Diyos oyon sa bagong boway na galin sa Espirito Santo sagkud bukung sa pagsonod sa dating paagi na ginibo para kanatu ka nakasorat na Layi.
A Layi sagkud a Kasalan
7 Ono a buut sabiyun kadi, a Layi maraut? Buku! Holi ta kin uda Layi, diri ko kintana naisiyan kin ono a kasalan. Kin diri sinabi ka Layi, ?Diri ika maibug,? diri ko kintana maiisiyan kin ono a pagkaibug. 8 Alagad holi sa Layi, nagkaagko oportonidad a kasalan, ginisung ako kadi sa ngamin na klase sa pagkaibug. Ta kin uda Layi, uda kasalan. 9 Kadto, naboway akong uda pakaintindi sa Layi alagad ko maintindiyan ko a Layi, nagkaagko kapangyariyan kanaku a kasalan 10 sagkud kadto ko naisiyan na arug ako sa guraan sa pagsilung ka Diyos. Kaya a Layi na kaipowan magtottoro kanaku paiyan sa boway na uda kasagkuran, holi ko diri ko pagkoyog sa laying an, naosgaran ako ka kagranan sagkud nasoway sa Diyos. 11 Ta ginamit ka kasalan a Layi tanganing dayaun ako, sagkud holi kadi naosgaran ako na masoway sa Diyos anggan pa man.
12 Kaya a Layi mismo, banal sagkud a kada kamandaan banal, tama sagkud maraay. 13 Buut sabiyun raw kadi kaya kita nasoway sa Diyos holi ka kanyang maraay na layi? Diri basang! Ta a rason amo a kanatung kasalan. Alagad a plano ka Diyos manungud ka Layi niya amo na a karatan ka kanatung kasalan maayag. Kaya holi ka kanyang Layi nabayad na talagang malangraut ka kasalan.
A Natoralesa ka Laman sagkud ka Isip
14 Isi ta na a Layi galin sa Diyos, alagad tawo sana ako na madaling magkasala. 15 Diri ko maintindiyan a sadiri ko. Ta diri ko ginigibo a maraay na bagay na gosto kong gibowon, imbes a bagay na abu kong gibowon, amo a ginigibo ko. 16 Ngowan, kin ginigibo ko a diri ko gosto, buut sabiyun inooyonan ko na maraay talaga a Layi. 17 Kaya buku na ako a agko kagigibowan kan, kindi a kasalan na isan kanaku. 18 Ta isi kong uda maraay na bagay san natoralesa ko bilang tawo. Ta dawa gosto kong gomibo sa maraay diri ko adi maginibo. 19 Kaya imbes na gibowon ko a maraay na bagay na gosto ko, a maraut logod na abu kong gibowon, amo a ginigibo ko. 20 Ngowan, kin nagigibo ko a abu kong gibowon, buku nang ako a naggigibo kan kindi a kasalan na isan kanaku.
21 Amo adi a nadiskobre ko: kin gosto kong gomibo sa maraay, arani kanaku a maraut. 22 Sa tuduk ka poso ko, naoogma ako sa Layi ka Diyos. 23 Alagad namangno ko na agko ibang nagkokontrol kanaku. Amo a kasalan na isan kanaku, na kontra sa Layi ka Diyos na naiisiyan ko kaya ako nagkakasala; kasalan na amo a nag-ooripun kanaku. 24 Makaeerak a kamutangan ko! Siisay makaliligtas kanaku sa makasalan kong pagkatawo na nagtatao kanaku sa kagranan? 25 Nagpapasalamat ako saigo sa Diyos ta iya a lomiligtas kanaku sa paagi ni Jesu Cristo na kanatung Kagorangnan!
Kaya, amo adi a kamutangan ko: A isip ko nagpapasakup sa Layi ka Diyos, alagad a makasalan kong pagkatawo padagos na nagkakasala.