6
Guraan sa Kasalan alagad Boway ki Cristo
1 Ono ngowan a sasabiyun ta? Migpadagos raw kita na migkasala tanganing orog na magdakul kanatu a karayan na buut ka Diyos? 2 Diri basang pwede! Ta ngowan bagana kita manga guraan na tawo na diri na nagkakasala. Kaya diri na kita nagpapadagos sa pagkakasala. 3 Sigoradong isi ninyo na ko mabunyagan kita, kin sari nakaiba kita ki Cristo Jesus, bagana man sana kita nakaibang magraan sa kagranan niya.a 4 Kaya guraan na kita sagkud nalubung na kaiba niya sa paagi ka bunyag tanganing kin paonong binoway otro si Cristo sa paagi ka dakulung kapangyariyan ka Ama, kita man magkaagko ka panibagong boway.
5 Holi ta kin matood na nakaiba kita niya sa kagranan niya, matood man an na makakaiba kita kanya sa pagkaboway niya otro. 6 Isi ta na a dati tang pagkatawo naipako na sa kros kaiba niya, tanganing magraan a kanatung makasalan na pagkatawo sagkud tanganing diri kita maoripun pa ka kasalan. 7 Ta a nagraan na, pinalibre na galin sa kapangyariyan ka kasalan. 8 Kin kita nagraan na kaiba ni Cristo, naniniwala kitang maboboway man kitang kaiba niya. 9 Ta isi ta na si Cristo binoway otro sagkud diri na kono pa man migraan, sagkud uda na kapangyariyan kanya a kagranan. 10 Holi ta nagraan iya minsan sana. Diri na niya dadarawun otro a kasalan. Sagkud a boway niya ngowan amo na makapagsirbi sa Diyos. 11 Kaya kita man, kaipowan na ibilang a sadiri ta bilang guraan sa kasalan, alagad boway tanganing makapagsirbi sa Diyos, holi ka pakikipag-usad ta ki Cristo Jesus.
12 Diri na ninyo pagtogotan na maghadi a kasalan sa kaninyong awak na nagraraan, tanganing diri kamo magkoyog ka manga kamawutan kadi. 13 Diri na ninyo ipasairarum a onoman na parte ka kaninyong awak sa kapangyariyan ka kasalan bilang kasangkapan sa paggibo sa karatan, kindi itao ninyo a kaninyong boway sa Diyos bilang manga tawong nagraan alagad binoway otro. Itao ninyo kanya a bilog ninyong boway bilang kasangkapan sa paggibo sa katanosan. 14 Diri kamo kaipowan na magpasakup sa kasalan, holi ta diri na kamo naboboway sa irarum ka Layi kindi sa irarum ka karayan na buut ka Diyos.
Manga Oripun ka Katanosan
15 Kin arug kan, ono palan? Migkasala raw kita holi ta uda na kita sa irarum ka Layi kindi nasa irarum na ka karayan na buut ka Diyos? Diri basang! 16 Diri ninyo isi na kin magpasakup kamo sa kiisay man na sinosonod ninyo, nagigin oripun kamo kadi, magin adi kasalan na omaabot sa kagranan, o sa pagsonod sa Diyos na omaabot sa katanosan? 17 Alagad salamat sa Diyos, kamong dating manga oripun ka kasalan tuduk sa buut na nagsonod sa katottoroan na itinottoro kaninyo. 18 Pinalibre na kamo sa kasalan sagkud kamo manga oripun na ka katanosan. 19 Naggagamit ako sa ordinaryong oosipun holi ka kaninyong kaloyaan. Kin paonong ipinasairarum ninyo kadto a kaninyong sadiri sa kadostaan sagkud nagin maraut kamo saigo, ngowan kaipowan ninyong itao a kaninyong awak sa katanosan para sa manga banal na katoyowan.
20 Ko oripun pa kamo ka kasalan, diri kamo sakup ka katanosan. 21 Ono a nakoko ninyo sa manga bagay na adto na ikinasusupug ninyo ngowan? Kagranan a ibinobonga ka manga adto. 22 Alagad ngowan na pinalibre na kamo galin sa kasalan sagkud nagin oripun na ka Diyos, naako ninyo a usad na boway na banal sagkud a ibinobonga kadi boway na uda kasagkuran. 23 Ta uda kasagkuran na pagkasoway sa Diyos a kabayaran ka kasalan, alagad a libreng regalo ka Diyos boway na uda kasagkuran, sa paagi ni Cristo Jesus na kanatung Kagorangnan.