Sorat ni Pablo sa manga
TagaGalacia
Kapinonan
Ko maipangadal na so Maraay na Bareta manungud ki Jesus sagkud maako adi ko manga bukung Judio, nagkaagko kaongaan na magigin matood na Cristiyano raw a usad na tawo kin magkoyog ka Layi ni Moises. Sinabi ni Apostol Pablo na diri adi kaipowan. Ta sa kamatoranan a matibay na pondasyon ka boway na isan ki Cristo amo a pagtobod. Ta sa paagi sa pagtobod ki Cristo, ginibong matanos ka Diyos a tawo. Alagad sa manga simbaan sa Galacia, usad na banwaan na sakup ka manga Romano sa Asya Minor, agko manga nagkokontra ki Pablo sagkud nagtotottorong kaipowan pang magkoyog a manga tawo sa Layi ni Moises tanganing magin matanos sa atobangan ka Diyos.
A katoyowan ka Sorat ni Pablo sa manga tagaGalacia amo a mapabalik sa matood na pagtobod so manga nadaya ka manga salang katottoroan na adi. Nagpoon si Pablo sa paagi ko pagdepensa ko poder niyang mabaoy na apostol ni Jesu Cristo. Tinawan niya sa ruun na a pagkabaoy kanya bilang apostol, sagkud so kanyang misyon sa manga bukung Judio, galin sa Diyos sagkud bukung sa tawo. Pagkatapos kadi, iinisplikar niya na sa paagi ka pagtobod magigin angay sa Diyos a manga tawo. Sa manga oring kapitolo ipinababayad ni Pablo na a pamomoway ka usad na Cristiyano bonga sa pagkabuut na naggagalin sa pagtobod ki Cristo.
Manga Luug
Kapinonan 1:1-10
A kapangyariyan ni Pablo bilang apostol 1:11-2:21
A Maraay na Bareta manungud sa karayan na buut ka Diyos (3:1-4:31)
A pagkalibre sagkud responsibilidad ka usad na Cristiyano 5:1-6:10
Kataposan 6:11-18