3
A Layi sagkud a Pagtobod ki Cristo
1 Bagana man sana kamo kapay manga tagaGalacia! Siisay a nakalumay kaninyo? Bukung malinaw na ipinaayag kaninyo a pagkagraan ni Jesu Cristo sa kros? 2 Amo adi ngowan a gosto kong ionga kaninyo: Inako ninyo a Espirito ka Diyos holi sa pagsonod ka Layi, o holi ta nagtobod kamo ka Maraay na Bareta na narungug ninyo? 3 Talagang manga patal kamo! Nagpoon kamo sa pagtobod ninyo ki Cristo sa kapangyariyan ka Espirito Santo, sagkud ngowan pinoporbaran ninyong taposon sa paagi sa sadiri ninyong pag-iingoa! 4 Naudaan na raw sa kaologan so ngamin na nangyari kaninyo? Mauudaan na raw sana adi sa kamutangan? 5 Bukung itinao kaninyo ka Diyos a Espirito niya, sagkud sa paagi niya, naggigibo kamo ka manga milagro? Inako sana adi ninyo holi sa pagsonod ninyo ka Layi o holi ta nagtobod kamo ka Maraay na Bareta na narungug ninyo?
6 Rumrumun ninyo a nangyari ki Abraham. Oyon sa Kasoratan, ?Nagtobod iya sa Diyos, sagkud holi ka pagtobod niya inako iya ka Diyos na matanos.? 7 Kaya ngani, malinaw na a manga nagtotobod sa Diyos amo a matood na igin ni Abraham. 8 Kadto pa man, sinasabi na sa Kasoratan na ibibilang na matanos ka Diyos a manga bukung Judio sa paagi ka pagtobod. Sagkud a Maraay na Baretang adi na ipinaayag ka Diyos ki Abraham kadto pa. Sinabi niya, ?Sa paagi mo, bebendisyonan ka Diyos a ngamin na tawo sa ngamin na nasyon.? 9 Kaya ngani, ngamin na manga nagtotobod sa Diyos, bebendisyonan man arug ni Abraham.
10 A manga nakadepende sa pagkoyog ka Layi, padodosaan anggan pa man. Holi ta sinasabi sa Kasoratan, ?A siisay man na diri nagkokoyog ka ngamin na nakasorat sa libro ka Layi, padodosaan anggan pa man.? a 11 Malinaw na uda tawong nagigin matanos sa atobangan ka Diyos sa paagi ka pagsonod sa Layi, holi ta sinasabi sa Kasoratan, ?A nagigin matanos sa Diyos sa paagi ka pagtobod, agko boway na uda kasagkuran.? 12 Alagad a Layi diri nakabase sa pagtobod, ta sinasabi sa Kasoratan, ?A tawong naggigibo ka ngamin na ipinagbubuut ka Layi, agko boway na uda kasagkuran sa paagi kan.?
13 Alagad holi ta diri ta masonod a ngamin na iminamanda ka Layi, pinadosaan kita anggan pa man. Alagad ngowan, binalokat na kita ni Cristo sa padosang adi. Ta sinasabi sa Kasoratan, ?A siisay man na ibinitin sa kawoy, padodosaan anggan pa man.?b 14 Ginibo adi ka Diyos tanganing a biyayang itinao niya ki Abraham, maako man ka manga bukung Judio sa paagi ni Cristo Jesus, sagkud maako ta a ipinanoga ka Diyos na Espirito sa paagi ka pagtobod.
A Layi sagkud a Panoga ka Diyos
15 Manga ngod, tatawan ko kamo sa arugan. Diri pwedeng basta na sana magrogang o mag-alin sa ono man na napagkasondoan na. Amo man sa manga panoga ka Diyos. 16 Ngowan, nanoga a Diyos ki Abraham sagkud sa erensiya niya. Diri niya sinabi na, ?Sa kanimong manga erensiya,? na a buut sabiyun dakul na tawo, kindi ?Sa erensiya mo,? na buut sabiyun usad sanang tawo, sagkud adi uda iba kindi si Cristo. 17 Amo adi a buut kong sabiyun: Agko napagkasondoan na ginibo a Diyos ki Abraham, sagkud ipinanoga niyang gigibowon adi. A panogang adi, itinao niya bago pa man innabot a Layi pagkaagi sa kwatro syentos trentang taon. Kaya a panogang adto, diri na mauudaan sa kamutangan holi ka Layi. 18 Ta kin a panoga niya nakabase sa pagsonod ka Layi, uda kamutangan a kanyang panoga. Alagad a kamatoranan, itinao ka Diyos a panoga niya ko uda pa a Layi.
19 Kin arug kan, ono a katoyowan ka Layi? Itinao adi tanganing maipabayad sa manga tawo na makasalan sira. Alagad anggan sana adi sa pag-abot ka ipinanogang erensiya ni Abraham na amo si Cristo. Itinao ka Diyos a Layi ki Moses sa paagi ka manga anghel, sagkud iya man a nagtao kadi sa manga tawo.
20 Alagad a panoga bukung arug kadi. Holi ta ko itinao adi ka Diyos ki Abraham, diri na iya naggamit sa tagapag-ultanan o manga anghel kindi iya na mismo a nagsabi ka panoga.
21 Kin arug kan, a Layi soway sa manga panoga ka Diyos? Buku basang! Ta kin a Layi nakapagtatao sa boway na uda kasagkuran, amo na kintana adi nagin paagi ka Diyos na ibilang kitang matanos. 22 Alagad, sinasabi sa Kasoratan na a ngamin na tawo oripun ka kasalan, kaya a regalong ipinanoga ka Diyos maaako sana sa paagi ka pagtobod ki Jesu Cristo na itatao sa ngamin na nagtotobod.
23 Bago mag-abot so panawon na makatobod a manga tawo ki Cristo, nasa irarum kita ka Layi sagkud priso kadi anggan sa alduw na iayag a kaligtasan, ta nagtobod kita kanya. 24 A Layi arug sa usad na paraataman na nag-ataman kanatu anggan sa pag-abot ni Cristo, tanganing kita maibilang na matanos sa paagi ka pagtobod kanya. 25 Sagkud ngowan na nagtotobod na kita ki Cristo, uda na kita sa irarum ka Layi.
Manga Igin ka Diyos sa Paagi ka Pagtobod
26 Kamo ngamin manga igin sa Diyos holi ka pagtobod ninyo ki Cristo Jesus. 27 Ta binunyagan kamo sa pakikipag-usad ki Cristo sagkud namoway kamong arug niya. 28 Ngowan, uda na pagkakaiba a Judio sagkud bukung Judio, oripun sagkud bukung oripun, a lalaki sagkud a babayi. Kamo ngamin uusad na holi ta isan na kamo ki Cristo. 29 Sagkud holi ta kamo isan na ki Cristo, kaiba kamo sa erensiya ni Abraham sagkud manga tagapagmana sa panoga ka Diyos.