Galacia 4

¹ Amo adi buut kong sabiyun: Anggan na a usad na tagapagmana uda pa sa tamang edad, uda iya ipinagkaiba sa manga oripun dawa kanya pa ngamin a pagsorosadiri. ² Itinotogon iya sa manga tawong nag-aataman sagkud namamaala ka manga pagsorosadiri niya anggan sa alduw na tinalaan ka kanyang ama. ³ Arug man kan a kamutangan ta bago innabot si Cristo: nagin oripun kita ka manga patakaran ka kinaban na adi. ⁴ Alagad ko omabot so tamang panawon, ipinadara ka Diyos a kanyang Igin sadi kinaban. Ipinangigin iya ka usad na babayi sagkud namoway sa irarum ka Layi, ⁵ tanganing palibriyun a manga nasa irarum ka Layi, para magin igin kita ka Diyos. ⁶ Holi ta kita manga igin na ka Diyos, itinao kanatu ka Diyos a Espirito ka kanyang Igin tanganing mabaoy ta iyang ?Ama, Ama ko!? ⁷ Ngowan, buku na kitang manga oripun kindi manga igin na ka Diyos. Sagkud holi ta kita manga igin, ginibo man kita ka Diyos na manga tagapagmana ka manga panoga niya.

A Pagmakulug ni Pablo sa manga TagaGalacia

⁸ Ko diri pa ninyo bistado a Diyos, nagin oripun kamo ka manga diyosdiyosan. ⁹ Alagad ngowan na bistado na ninyo a Diyos (o mas tamang sabiyun na bistado na kamo ka Diyos bilang manga igin) ngata ta binnabalik pa kamo sa diri makatabang sagkud uda kamutangan na manga patakaran ka kinaban? Ngata ta gosto ninyong magpaoripun kanda otro? ¹⁰ Agko pa kamo pinapaalagaan na alduw, manga bolan, manga panawon sagkud manga taon! ¹¹ Napoporisaw ako na baka naudaan sana sa kamutangan so ngamin na pagmaigut ko kaninyo.

¹² Nakikiosip ako kaninyo, manga ngod, na arugun ninyo ako, holi ta dawa ako usad na Judio, binayaan ko so pagsonod sa Layi ka manga Judio sagkud nagin arug ninyong bukung Judio. Uda kamo nagibong maraut kanaku. ¹³ Isi man ninyo na itinottoro ko kaninyo kadto a Maraay na Bareta, dawa nagkailang ako. ¹⁴ Dawa ngani nagin pagporbar kaninyo so ka'ilangan ko, diri ninyo ako inamak o isinobol. Imbes, inako pa ngani ninyo ako na bagana usad na anghel ka Diyos o bagana si Jesu Cristo mismo a inako ninyo. ¹⁵ Malang-ogma ninyo kadto. Ono nangyari? Ako mismo a makapagtestigo na kin pwede sana kadto, inilwat na ninyo a manga mata ninyo tanganing itao kanaku. ¹⁶ Ngowan, kasogot na raw ninyo ako holi ta sinasabi ko kaninyo a kamatoranan?

¹⁷ Agko manga tawo siton na nagpapabayad sa pagmakulug kaninyo, alagad bukung maraay a katoyowan nira. A gosto sana nira rautun kami, tanganing sira a koyogon ninyo. ¹⁸ Bukung maraut na magpabayad sira sa pagmakulug dawa uda ako sa kaibaan ninyo, basta maraay sana a katoyowan nira. ¹⁹ Nabubutan kong manga igin, anggan na diri nababayad kaninyo a boway ni Cristo, migsakit akong arug sa usad na babaying nangingigin. ²⁰ Kin pwede na sanang makaiyan ako san sagkud makaosip kamo sa maraay, ta grabi a pagkaporisaw ko kaninyo.

A Parabola manungud ki Agar sagkud ki Sara

²¹ Ngowan, kamong manga nagmamawut na pasairarum sa Layi, diri ninyo isi a sinasabi ka Layi? ²² Ta sinasabi sa Kasoratan na agko darwang igin si Abraham. A usad, igin niya sadto oripun niyang si Agar, sagkud a usad man, igin niya sa agom niyang si Sara. ²³ So igin niya sadto oripun, ipinangigin sa natoral na paagi. Alagad so igin niya sadto agom niya, ipinangigin sigon sa panoga ka Diyos.

²⁴ A darwang babaying adi, pwede tang silngan bilang usad na manga parabola. Nagrerepresentar sira ka darwang kasondoan. Si Agar a nagrerepresentar ka panoga na itinao ka Diyos ki Moises sadto Bokid ka Sinai. A manga igin niya, manga oripun. ²⁵ Si Agar na nagrerepresentar ka Bokid ka Sinai sa Arabia, amo man nagrerepresentar ka Jerusalem ngowan. Ta a manga tawo sa Jerusalem, oripun ka Layi. ²⁶ Alagad a agom na si Sara, bukung oripun, sagkud iya a nagrerepresentar ka Jerusalem na sadto langit, sagkud iya a kanatung ina holi ta buku kitang oripun ka Layi. ²⁷ Ta sinasabi sa Kasoratan,

?Mag-ogma ika, baog na babayi,

ika na diri nagkaigin!

Magkagrat ika sa kaogmaan,

ika na diri nakamamati sa kulug ka pangingigin.

Ta dawa ika binayaan ka agom mo,

migkaagko ika dakul na igin kisa babaying agko agom.?

²⁸ Manga ngod, manga igin na kamo ka Diyos sigon sa panoga niya, arug ni Isaac na ipinangigin sa panoga ka Diyos. ²⁹ Kin a ipinangigin oyon sa Espirito ka Diyos, pinirsigir kadto ko ipinangigin oyon sa natoral na paagi, arug man kan ngowan. ³⁰ Alagad ono a sinasabi sa Kasoratan? ?Palayasun mo a oripun na babayi sagkud a igin niya. Ta a igin ka oripun diri kaipowan makiparte sa mamanawun ka igin ka babaying bukung oripun.? ³¹ Kaya, manga ngod, buku kitang igin ko babaying oripun kindi ko babaying bukung oripun.