5
A Pagkalibre ta ki Cristo
1 Sa kamatoranan pinalibre na kita ni Cristo sa irarum ka Layi. Kaya manindugan kamo sa kaninyong pagtobod sagkud diri na magpaoripun otro.
2 Tandaan ninyo a sinasabi ko. Ako mismo, si Pablo, a nagsasabi kaninyo na kin migpatori kamo tanganing magin matanos sa atobangan ka Diyos, mauudaan sa kamutangan a ginibo ni Cristo para kaninyo. 3 Inootro ko: A siisay man na gostong magpatori tanganing magin matanos sa atobangan ka Diyos, kaipowan na koyogon a ngamin na Layi. 4 Kamong manga nag-iingoang maibilang ka Diyos na matanos sa paagi ka Layi, napasoway na ki Cristo. Inabuan ninyo a karayan na buut ka Diyos. 5 Alagad para kanamu naglalaom kami na sa paagi ka Espirito Santo sagkud ka kanamung pagtobod, ibibilang kami ka Diyos na maimbod. 6 Ta sa manga nakipag-usad na ki Cristo Jesus, buku nang importante kin tori o buku. A importante amo a pagtobod na nababayad sa paagi ka pagkabuut ta sa iba.
7 Maraay na kintana a ginigibo ninyo! Siisay a pinnugul kaninyo sa pagkoyog ka kamatoranan? 8 Diri an gigibowon ka Diyos ta iya a binnaoy kaninyo tanganing kamo makatobod. 9 Arug ka sinasabi, ?A gatikot na lebadoraa nakapaaalsa sa bilog na minasang arina.? 10 Naglalaom ako na omooyon kamo kanaku sa bagay na adi, holi sa pakikipag-usad ta sa Kagorangnan. Sagkud nasisigoro ko na padodosaan ka Diyos a siisay man na nangriribok kaninyo. 11 Alagad para kanaku, manga ngod, kin talagang nagtotottoro pa ako na kaipowan a pagtori, ngata ta pinipirsigir pa ako anggan ngowan? Kin matood adi, diri na kintana nira ikinaungut a pagtottoro ko manungud ka pagkagraan ni Cristo sa kros. 12 Maraay pang deretso nang magpakapon a manga nangriribok kaninyo sagkud buku sanang magpatori!
13 Para kaninyo, manga ngod, binaoy kamo na magin libre. Alagad diri ninyo paggamitun a pagigin libre ninyo tanganing oyonan a kamawutan ka laman, imbes magtinabangan kamo sa kada usad holi sa pagkabuut. 14 Ta a bilog na Layi, nasomaryo sa usad sanang kamandaan, ?Mabutan mo a kapwa mo arug ka pagkabuut mo sa sadiri mo.? b 15 Alagad kin padagos kamong migkasogot na bagana manga ayup, baka madagosan ninyong maraut a boway ka kada usad.
A Espirito Santo sagkud a Natoralesa ka Tawo
16 A sinasabi ko amo adi: Magpasakup kamo sa Espirito Santo sagkud diri kamo magigin oripun ka kamawutan ka laman. 17 Ta a manga kamawutan ka laman kabaliktaran sa kamawutan ka Espirito Santo, sagkud a kamawutan ka Espirito Santo, kabaliktaran sa kamawutan ka laman. Magkasogot a darwang adi, kaya diri ninyo maginibo a gosto ninyong gibowon. 18 Alagad kin nagpasakup na kamo sa Espirito Santo, buku na kamong sakup ka Layi.
19 A manga tawong nagsosonod sa kamawutan ka laman, mabibisto sa gibo nira: pananambay, pakikiolod sa bukung agom, paggibo sa kadostaan, 20 pagsamba sa manga diyosdiyosan, pangkokolam, pagkaungut, pagkakasogot, pagkamakasadiri, pagkamaimut, pagkaoyam, pagkakabangabanga, 21 pag-ori, pagboboborat, sobrang pag-ogma, sagkud iba pang klase sa karatan. Pinatataniran ko kamo otro: A namomoway ka arug kadi, diri pighadian ka Diyos.
22 Alagad amo adi a mababayad sa tawong namomoway sa kapangyariyan ka Espirito Santo: pagkabuut, kamuy'an, katoninungan, pagkatius, kabuutan, karayan na buut, kaimbodan, 23 kahoyoan, sagkud pagpupugul sa sadiri. Uda ibang kamandaan na kontra sa manga bagay na adi. 24 Sagkud ginuraan na ka manga nakipag-usad ki Cristo Jesus a makasadiri nirang pagkatawo, pati a manga mararaut na nakatuuran na kadi. 25 A Espirito Santo a nagtao kanatu sa bagong boway, kaya iya naman a gibowon tang giya. 26 Diri na kita magin mapagpalangkaw, diri ta pagpaungtun a kapwa ta, sagkud diri naman kita mag-inoriyan.