6
Magtinabangan Kamo
1 Manga ngod, kin agko kamo naisiyan na naggigibo sa ono man na sala, kamong manga ginigiyaan ka Espirito Santo a kaipowan na magtabang kanya na magbago. Alagad gibowon ninyo adi sa bilog na kahoyoan, sagkud magmaan kamo, ta tibaad kamo man a matintaran. 2 Magtinabangan kamo sa kada usad, sagkud sa arug kading paagi, makokoyog ninyo a kamandaan ni Cristo. 3 Kin agko kaninyo nag-uuna na iya nakalalamang sa iba na dawa diri man, dinadaya sana niya a kanyang sadiri. 4 Kaipowan na mangnowon ka kada usad a ginigibo niya. Sagkud kin maraay a ginigibo niya, kaipowan iyang mamuya. Alagad diri niya ipagkompara a sadiri niya sa iba. 5 Ta a kada usad, amo a minnimbagan ka manga ginigibo niya.
6 Kaipowan na erasan ka ngamin na biyayang nakokoko ka manga tinotottoroan a manga nagtotottoro ka oosipun ka Diyos.
7 Diri ninyo pagdayaun a sadiri ninyo: A Diyos diri madadaya ka siisay man. Kin ono a itinanum ka tawo, amo man niya aaniyun. 8 Kin a kinokoyog ka usad na tawo, a kamawutan ka laman, aaniyun niya a kapadosaan na uda kasagkuran. Alagad kin a kinokoyog ka usad na tawo, amo a Espirito Santo, maaako niya galin sa Espirito a boway na uda kasagkuran. 9 Kaya diri kita mapagal sa paggibo sa karayaan, ta sa tamang panawon aaniyun ta a biyaya kin diri kita somoko. 10 Kaya ngani, sa kada oportonidad na agko kita, gomibo kita sa maraay, orog na sa manga kangoran ta sa pagtobod.
A Oring Togon
11 Silngi ninyo kin gaomno kadakulu a manga litra na nakasorat sadi. Ako mismo a nagsorat kadi. 12 A manga namimirit kaninyong magpatori, sira so manga gostong maomaw ka kapwa nira. Ginigibo nira adi tanganing diri sira pagpirsigirun holi sa kros ni Cristo. 13 Sira mismo na manga tinori, diri man nagkokoyog sa Layi, alagad pinagpipiritan nirang magpatori kamo tanganing maipag-orgolyo nira na nagkokoyog kamo ka seremonyang adi. 14 Alagad para kanaku, uda ako ibang ipinag-oorgolyo kindi a pagkagraan sa kros ka kanatung Kagorangnan na si Jesu Cristo. Sagkud holi sa kagranan niya sa kros, a manga bagay sadi kinaban, uda na saysay para kanaku, sagkud ako man uda na saysay para sa manga bagay sa kinaban. 15 Bukung importante kin tori kita o buku. A importante, kin binago kita ka Diyos. 16 Sa ngamin na namomoway na oyon sa patakaran na adi, sagkud sa bilog na banwaan ka Diyos, mapakaninyo logod a katoninungan sagkud pagkaerak ka Diyos. A katoninungan sagkud biyaya maiyan sa manga nagkokoyog ka patakaran na adi, magin sa manga pinili ka Diyos.