2
A Pag-ako ki Pablo bilang Apostol
1 Pagkaagi sa katorseng taon nag-iyan ako otro sa Jerusalem. Kaiba ko si Bernabe sagkud si Tito. 2 Binnalik ako ta ipinaayag kanaku ka Diyos na omiyan ako sadto. Nakipagbayadan ako sa personal sadto manga namomoon ko manga kangoran, sagkud itinottoro ko kanda a Maraay na Bareta na itinotottoro ko sa manga bukung Judio. Ginibo ko adi tanganing masigoro na diri nasayang so manga pinagpagalan ko kadto sagkud ngowan. 3 Dawa usad na Griego a kaiba kong si Tito, diri nira adi pinirit na magpatori. 4 Kinaosip ko sira personal ta agko nagkapirang tawo na nagsasaginsagin na manga ngod na nakiiba kanatu tanganing rautun a pagigin libre na naako ta ki Cristo Jesus, sagkud gibowon kitang oripun otro ka Layi ni Moises. 5 Alagad dawa gatikot, diri kami innoyon sa gosto nira, tanganing maingatan namu para kaninyo a manga kamatoranan na itinotottoro ka Maraay na Bareta.
6 Alagad uda na irinogang sa manga itonotottoro ko a manga binibistong namomoon, sagkud bukung importante kanaku kin siisay man sira, ta uda pinapaboran a Diyos. 7 Imbes, binisto nira na ako a pinagkatiwalaan ka Diyos, tanganing magtottoro ka Maraay na Bareta sa manga bukung Judio, arug ni Pedro na pinagkatiwalaan man na magtottoro ka Maraay na Bareta sa manga Judio. 8 Ta sa kapangyariyan ka Diyos, ginibo akong apostol sa manga bukung Judio, na amo man a nagtao ka kapangyariyan ki Pedro na magin apostol sa manga Judio. 9 Kaya naintindiyan nira Santiago, Pedro sagkud Juan, manga bistadong namomoon sa simbaan na adto, na a Diyos amo a nagtao ka espesyal na gibong adi. Kaya kami ni Bernabe inako nira bilang kaiba. Pinagkasondoan namu na kami sa manga bukung Judio sagkud sira man sa manga Judio. 10 A pakiosip sana nira, diri namu paglingawan na tabangan a manga pobreng Cristiyano sadto Jerusalem, sagkud amo man talaga yan a gosto kong gibowon.
Pinagsabiyan ni Pablo si Pedro
11 Ko omabot si Pedro sa Antiokia, pinagsabiyan ko iya sadto atobangan ko manga tawo holi ta sala so ginibo niya. 12 Ta bago pa innabot so gropo ko manga Judio galin ki Santiago, nakikikaun si Pedro sadto manga kangoran na bukung Judio. Alagad ko omabot sira, pinnoon na iyang omiwas sagkud diri na nakiiba kanda. Ta nakatakot iya sadto manga gropo ko Judio na pinagpipiritan na so Layi ni Moises kaipowan na koyogon. 13 Pati logod so manga ibang paratobod na Judio, sinonod so ginibo ni Pedro, magin si Bernabe sinnonod man.
14 Ko mabayad kong buku nang oyon sa kamatoranan ka Maraay na Bareta so ginigibo nira, sinabi ko ki Pedro sa atobangan nira ngamin, ?Ngata ta ginibo mo adto? Bagana man sana pinipirit mo a manga bukung Judio na mamoway na bagana Judio. Ika ngani mismong usad na Judio, namomoway na bagana bukung Judio. ?
A Kaligtasan Para sa Ngamin
15 Kaya sinabi ko kanda ngamin, ?Kami na ipinangigin na Judio, iba sa manga bukung Judio na ibinibilang namung makasalan. 16 Alagad isi namu na a tawo ibinibilang ka Diyos na matanos sa paagi ka pagtobod ki Jesu Cristo sagkud bukung sa pagsonod sa Layi. Kaya ngani, kami man na manga Judio, nagtotobod ki Cristo Jesus tanganing maibilang na matanos sa paagi ka pagtobod, bukung sa pagkoyog ka Layi. Ta uda siisay man a maibibilang na matanos sa paagi sa pagsonod ka Layi.?a
17 Linalaoman ta na magigin matanos kita sa atobangan ka Diyos holi ka pakikipag-usad ta ki Cristo. Alagad kin ibinibilang kitang makasalan na tawo sa pagsilung ka manga Judio holi ka pagtobod ta ki Cristo, buut sabiyun raw kadi na si Cristo a nagigin rason na magkasala a tawo. 18 Alagad kin babalikan ko man so pagsonod ka Layi na iniiwasan ko na, ako na mismo a migpatonay na ako makasalan, holi sa diri ko pagsonod kadi. 19 Holi ka layi na diri ko kayang koyogon, naisiyan ko na kinondenar ako na magraan sagkud makasoway sa Diyos. Kaya ipinamutang ko na nagraan ako manungud sa Layi tanganing maboway ako para sa Diyos. 20 Holi ta ibinilang ko na nagraan ako kaiba ni Cristo sadto kros, kaya para kanaku buku ng ako a naboboway ngowan, kindi si Cristo na a naboboway kanaku. Holi ta a boway ko ngowan, nakabase sa pagtobod ko sa Igin ka Diyos na nagpabayad ka kanyang pagkabuut kanaku sa pagtao ka boway niya kanaku. 21 Diri ko binabaliwala a karayan na buut ka Diyos, arug ko iba na nagtiwala sa Layi, ta kin a tawo maibibilang na matanos sa Diyos holi ka pagsonod nira ka Layi, uda kamutangan so pagkagraan ni Cristo!