Sorat ni Pablo sa manga
TagaGalacia
1
1 Para sa manga kangoran na kaiba ko, sagkud sa ngamin na simbaan sa Galacia: 2 Mapakaninyo logod a bendisyon sagkud katoninungan galin sa Diyos na kanatung Ama sagkud Kagorangnan na si Jesu Cristo, 3 na nagtao ka sadiri niya para sa manga kasalan ta, tanganing makaligtas kita sa karatan na nangyayari sa kinaban na adi oyon sa kabutan ka kanatung Diyos sagkud Ama. 4 Sa Diyos a kaomawan anggan pa man. Amen.
5 Akong si Pablo, piniling apostol bukung ka tawo o sa paagi ka tawo, kindi ni Jesu Cristo sagkud ka Diyos Ama na nagboway otro kanya, nangongomosta kaninyo.
Uusad sana a Maraay na Bareta
6 Nagngangalas ako ta malangdali ninyong tinalikokoran a Diyos na binnaoy kaninyo holi sa karayan na buut ni Cristo sagkud sinnonod sa ibang katottoroan na sinasabi ka iba na maraay na bareta man. 7 A matood uda na ibang maraay na bareta. Riniribok sana kamo ka ibang tawo siton, sagkud gosto nirang bagowon a Maraay na Bareta manungud ki Cristo. 8 Alagad dawa kami o anghel na galin sa langit a magtottoro ka maraay na bareta na iba man ko onang itinottoro namu kaninyo, kondenarun logod iya anggan pa man. 9 Arug ko sinabi na namu kadto, sagkud ngowan sasabiyun ko otro: Kin agko kaninyo magtottoro ka maraay na bareta pwera ko inako na ninyo, kondenarun logod iya anggan pa man!
10 Diri ninyo pag-isipun na minamawut ko na omawun ako ka tawo. A minamawut ko amo a mamuya kanaku a Diyos. Kin minamawut ko a pag-omaw ka tawo, diri na kintana ako nagin oripun ni Cristo.
A Pagkaapostol ni Pablo
11 Gosto kong maisiyan ninyo, manga ngod ko sa Kagorangnan, na a Maraay na Bareta na itinotottoro ko kaninyo bukung manga gibogibo sana sa tawo. 12 Sagkud diri ko man adi inako galin sa manga tawo o naturan kanda, kindi ipinaayag adi mismo kanaku ni Jesu Cristo.
13 Ta isi ninyo so gibo ko kadto ko maimbod pa ko sa Judaismo. Pinirsigir ko saigo so manga simbaana ka Diyos na nagtotobod ki Jesu Cristo sagkud iningoa kong rautun adi. 14 Sagkud manungud man sa pagsonod sa relihiyon namung manga Judio, nalamangan ko a dakul na manga kaedad ko, ta maigut kong sinonod so manga nakaogalian na ko manga ginikanan namu. 15 Alagad holi sa karayan na buut ka Diyos, binaoy niya ako tanganing magin mamandaan niya, bago pa man ako ipangigin. 16 Ko ipaayag niya kanaku a kanyang Igin tanganing maitottoro ko a Maraay na Bareta manungud kanya sa manga bukung Judio, diri ako nag-onga sa kiisay man. 17 Diri man ako nag-iyan sa Jerusalem tanganing makipagbayadan sa manga apostol na naona kanaku. Imbes, nag-iyan tolos ako sa Arabia sagkud pagkatapos, binnalik ako sa Damasco. 18 Pagkatapos ko tolong taon, nag-iyan ako sa Jerusalem tanganing makipagbayadan ki Pedro. Nagtiner ako sadto sa luug sa kinseng alduw. 19 Alagad diri ko na nabayad so ibang apostol pwera ki Santiago na ngod ka Kagorangnan.
20 Matood a ngamin na sinasabi ko sa sorat na adi, sagkud isi ka Diyos na diri ako nagbobotig.
21 Pagkatapos ko pagbisita ko ki Pedro, napaiyan ako sa Siria sagkud Cilicia. 22 Ko panawon na adto, diri pa ako bistado saigo ko manga paratobod ni Cristo sadto Judea. 23 Nabaretaan na sana nira na so dating nagpipirsigir kanda, nagtotottoro na ngowan ka pagtobod na iningoa niyang rautun kadto. 24 Kaya inomaw nira a Diyos holi sa ginibo niya kanaku.