16
Manga Pangongomosta
1 Ngowan, itinotogon ko kaninyo sa paagi ka sorat na adi, a ngod tang babayi na si Febe. Nagsisirbi iya sa simbaan sa Cencrea. 2 Akoon ninyo iya bilang ngod sa Kagorangnan arug ka kaipowan na gibowon ka manga ginibong matanos ka Diyos. Tabangan ninyo iya sa onoman na pangangaipo niya holi ta dakul iyang natabangan sagkud usad na ako sadto.
3 Ikomosta ninyo ako kanda ki Priscila sagkud Aquila, na manga kaiba kong nagsisirbi ki Cristo Jesus. 4 Itinaya nira a boway nira holi kanaku. Dakulu a otang na buut ko kanda, sagkud buku sanang ako kindi so ngamin na simbaan ko manga bukung Judio. 5 Ikomosta man ninyo ako sa manga paratobod na nagtitipon sa baluy nira.
Ipaabot man ninyo a pangongomosta ko sa nabubutan kong amigo na si Epeneto. Iya a onang nagtobod ki Cristo Jesus sadto probinsiya ka Asyaa. 6 Ikomosta man ninyo ako ki Maria na matiyagang nagsirbi para kaninyo. 7 Komosta man kanda ki Andronico sagkud Junias, manga pareyo kong Judio sagkud nakaiba ko sadto prisowan. Naona sirang nagin Cristiyano kisa kanaku, sagkud bistado sira saigo ka manga apostol.
8 Ikomosta man ninyo ako sa nabubutan kong amigo sa Kagorangnan na si Ampliato. 9 Komosta man ki Urbano, na pareyo kong nagsisirbi ki Cristo, sagkud pati man sa nabubutan kong amigo na si Estaquis. 10 Komosta man ki Apeles na napamatoranan na maimbod na parasirbi ni Cristo. Komosta man sa pamilya ni Aristobulo, 11 sa kapareyo ko Judio na si Herodion, sagkud sa manga ngod sa Kagorangnan sa pamilya ni Narciso.
12 Ikomosta ako ninyo kanda ki Trifena sagkud ki Trifosa, na maiigut na nagsisirbi sa Kagorangnan, amo man ki Persida na nabubutan kong ngod na dakul ng nagibo para sa Kagorangnan. 13 Komosta man ki Rufo, usad na maraay na nagsisirbi sa Kagorangnan. Sagkud sa kanyang ina na bagana man sana kag-igin ko na. 14 Ikomosta man ninyo ako kanda ki Asincrito, Flegonte, Hermes, Patrobas, Hermas sagkud so iba pang manga ngod na kaiba nira. 15 Kinokomosta ko man sira si Filologo, Julia, Nereo sagkud so manga ngod niyang babayi, amo man si Olimpas sagkud sa ngamin na kangoran na kaiba nira.
16 Magkinomostaan kamo bilang manga magngongod ki Cristo. Kinokomosta kamo ka ngamin na simbaan ni Cristo sadi.
Oring Katottoroan
17 Manga ngod, nakikiosip ako kaninyo, magmaan kamo sa manga tawong pinagpoponan ka pagkakabangabanga sagkud nagigin rason sa pagtalikokod ka katottoroan na inako ninyo. Kaya likayan ninyo sira. 18 A manga arug kan na tawo, diri nagsisirbi ki Cristo na kanatung Kagorangnan, kindi a sadiri nirang kamawutan, sagkud dinadaya nira a manga maloloya a isip sa paagi ka manga magagayon sagkud matatam'is na oosipun. 19 Ta dawa isi ka ngamin a pagkoyog ninyo ki Cristo, gosto kong magin madonong kamo sa manga bagay na maraay, sagkud magin inosente sa manga bagay na maraut. 20 Diri na mig-uban, a Diyos na nagtatao sa katoninungan, dadaugun saigo a kapangyariyan ni Satanas sagkud pigtom'akan ta iya.
Mapakaninyo logod a bendisyon ka kanatung Kagorangnan na si Jesus.
21 Kinokomosta kamo ni Timoteo na pareyo kong nagsisirbi sa Kagorangnan, sagkud kanda ki Lucius, Jason sagkud Sosipater na manga kapareyo ko Judio.
22 Akong si Tercio, a pinasorat ka sorat na adi, nangongomosta man kaninyo sa ngaran ka Kagorangnan.
23 Kinokomosta man kamo ni Gayo. Akong si Pablo, nakikidagos sadi baluy niya, sagkud sadi nagtitipon so manga paratobod sa logar na adi. Kinokomosta man kamo ni Erasto na tresorero ka syodad sagkud ka kanatung ngod na si Cuarto. 24 Mapakaninyo logod a bendisyon ka kanatung Kagorangnan na si Jesu Cristo. Amen.b
Pag-omaw sa Diyos
25 Omawun ta a Diyos na amo a makapagpapakusug ka pagtobod ninyo oyon ka Maraay na Bareta manungud ki Jesu Cristo na itinotottoro ko kaninyo. A Maraay na Baretang adi, inilum sa uban na panawon. 26 Alagad ngowan, ipinaayag na sa ngamin na tawo sa paagi ka manga isinorat ko manga propeta. Sigon adi sa kamandaan ka uda kasagkuran na Diyos, tanganing magtobod sagkud somonod kanya a ngamin na tawo.
27 Sa uusad na Diyos na madonong, a ngamin na kamorawayan sa paagi ni Jesu Cristo anggan pa man! Amen.