15
Mamoway kita para sa Ikararaay ka Iba
1 Kitang makukusug a pagtobod, kaipowan na tabangan a manga maloloya a pagtobod. Buku sanang a sadiri tang karayan a kaipowan na isipun, 2 kindi a karayan man ka ngamin, tanganing mapakusug man a pagtobod nira. 3 Ta magin si Cristo, diri nagmawut ka sadiri niyang ikaoogma, holi ta agko nakasorat sa Kasoratan manungud kanya na nagsasabi, ?A manga tawo pigtoyatoyaun a Diyos, alagad ako a pinagtoyatoya.?a 4 A ngamin na nasa Kasoratan, isinorat tanganing tottoroan kita. Sagkud sa paagi ka Kasoratan, kita magigin matibay sagkud makusug a buut, sagkud migkaagko paglaom. 5 Logod a Diyos na nagtatao sa pagkatius sagkud karangaan, tabangan kitang mamoway na agko pagkauusad bilang parasonod ni Cristo Jesus, 6 tanganing sa arug kan, magkauusad kamong mig-omaw sa Diyos sagkud Ama ka kanatung Kagorangnan na si Jesu Cristo.
A Maraay na Bareta para sa manga Bukung Judio
7 Kaya akoon ninyo a kada usad arug ka pag-ako ni Cristo kaninyo tanganing maomaw a Diyos. 8 Ta sinasabi ko kaninyo na isinobol ka Diyos si Cristo tanganing magsirbi sa manga Judio sagkud tanganing ipabayad na a Diyos maimbod sa pag-otob ka kanyang manga panoga sadto kandang manga ginikanan. 9 Isinobol man si Cristo tanganing ipabayad a pagkaerak ka Diyos sadto manga bukung Judio, tanganing omawun man nira a Diyos. Arug ka nasosorat,
?Pasasalamatan ta ika sa kaibaan ka manga bukung Judio,
sagkud migkanta ako sa manga pag-omaw kanimo.?b
10 Sagkud sinabi pa sa Kasoratan,
?Kamong manga bukung Judio, makiogma kamo sa manga tawong pinili ka Diyos.?c
11 Sagkud sinabi pa,
?Kamo ngamin na manga bukung Judio, omawun ninyo a Kagorangnan.
A ngamin na tawo, mag-omaw kanya!?d
12 Sinabi man ni Isaias,
?Omaabot galin sa erensiya ni Jessee a usad na mimmoon sa manga bukung Judio,
sagkud iya a kandang paglaom.?f
13 Logod a Diyos na nagtatao kanatu ka paglaom amo man a magtao kaninyo ka bilog na kaogmaan sagkud katoninungan holi ka kaninyong pagtobod kanya, tanganing padagos na magtalobo a kaninyong paglaom sa paagi ka Espirito Santo.
A Rason ka Pagsorat ni Pablo
14 Manga ngod, nagtotobod ako saigo na pono kamo sa karayan, agko tamang pagkaintindi, sagkud tattaong magparumrum sa kada usad. 15 Alagad, nagsorat pa nanggayud ako na uda pagdorodarwa manungud ka manga bagay na kaipowan na iparumrum kaninyo, holi sa karayan na buut na itinao kanaku ka Diyos, 16 na magin parasirbi ni Cristo Jesus para sa manga bukung Judio. Nagsisirbi ako kanda arug sa usad na padi sagkud itinotottoro ko a Maraay na Bareta ka Diyos. Ginigibo ko adi tanganing magin atang sira na kaakoako sa Diyos, holi ta ginibo na sirang banal ka Espirito Santo. 17 Kaya, bilang parasirbi ni Cristo Jesus, maipag-oorgolyo ko a manga naginibo ko para sa Diyos. 18 Sagkud uda ako ibang ipinag-oorgolyo kindi a ginibo ni Cristo tanganing makombinsir ko a manga bukung Judio na magkoyog sa Diyos sa paagi ko, sa paagi ka kanakung manga oosipun sagkud gibo, 19 sa tabang ka manga milagro sagkud manga makangangalas na gibo sa kapangyariyan ka Espirito Santo. Kaya naitottoro ko a Maraay na Bareta manungud ki Cristo poon sa Jerusalem anggan sa banwaan ka Ilirico. 20 An sanang mawut ko, maitottoro a Maraay na Bareta sa manga logar na diri pa naitotottoro a manungud ki Cristo tanganing diri ako makapagtottoro sadto logar na agko na nagtottorong iba.g 21 Ta arug ka nasosorat,
?Mabibisto iya ka manga diri pa nasasabiyan manungud kanya,
makaiintindi a manga diri nakarurungug manungud kanya.?h
A Plano ni Pablo na mag-iyan sadto Roma
22 A pagtottoro ko sa manga logar sadi a rason kin ngata ta diri ako makadagos sa pag-iyan siton kaninyo. 23 Alagad ngowan natapos ko na so manga trabawo ko sadi, sagkud holi ta mauban ko ng gostong makaiyan siton, 24 linalaoman kong migkabinaydan kita pagramgot ko siton paiyan sa Espanya. Sagkud linalaoman ko man na tatabangan ninyo akong makapagpadagos ka kanakung pagbyayi matapos na magkaiba kita siton sa gatikot na panawon. 25 Alagad ngowan, kaipowan ko ngonang mag-iyan sadto Jerusalem tanganing iatud a tabang sa manga kangoran sadto. 26 Ta minaraay ko manga kangoran sadto Macedonia sagkud Acaya na magtao sa tabang para sa manga pobreng kangoran sadto Jerusalem. 27 Maogma nirang ginigibo adi, sagkud amo adi a tama, holi ta agko sira otang na buut sa manga kangoran sadto Jerusalem. Kin a manga bukung Judio, nakaiba sa biyayang espiritwal ka manga Judio, kaipowan sanang tabangan nira a manga Judio sa biyayang materyal. 28 Pagkatapos kong maiatud a tabang sa manga kangoran sadto Jerusalem, migramgot ako siton kaninyo bago ako omiyan sa Espanya. 29 Nagtotobod ako na pag-abot ko siton inyo, dara ko a ambondang biyaya para kaninyo galin ki Cristo.
30 Kaya nakikiosip ako kaninyo, manga ngod, alang-alang sa Kagorangnan na si Jesu Cristo sagkud sa pagkabuut na itinao ka Espirito Santo, na maigut kamong mangadyi sa Diyos para kanaku. 31 Ipangadyi ninyo na magin ligtas ako sa manga bukung paratobod sadto Judea, sagkud maogmang akoon ko manga kangoran sadto Jerusalem a pagsirbi ko para kanda. 32 Tanganing sa kabutan ka Diyos, maogma ako saigong omaabot siton kaninyo, sagkud makapagpaingalo sa kaibaan ninyo. 33 Logod a Diyos na nagtatao ka katoninungan mapakaninyo ngamin. Amen.