14
Diri Mag-osgar sa Pareyo Paratobod
1 Akoon ninyo a ngod na maloya sa pagtobod sagkud diri makipagdiskotir sa manga paniniwala niya. 2 Alimbawa, agko ngod na naniniwala na ngamin na pagkaun pwedeng kaunun. Agko man maloya a pagtobod sagkud para kanya, golay sana a kaipowan na kaunun. 3 Diri kaipowan na toyatoyaun ka tawong nagkakaun sa dawa ono a tawong nagkakaun sa golay sana. Sagkud diri man pag-osgaran ka tawong nagkakaun sa golay sana a tawong nagkakaun sa dawa ono, ta pareyo sirang inako ka Diyos. 4 Siisay ika para mag-osgar sa mamandaan ka iba? A among sana niya a makaoosgar kin iya angay o buku. Sagkud aakoon man iyang angay holi ta kayang gibowon an kanya ka Kagorangnan.
5 Agko manga tawong nag-iisip na mas importante a usad na alduw kisa ibang manga alduw. Mantang agko man tawo na poropareyo sana para kanya a ngamin na alduw. A kada usad magdesisyon sa kanyang sadiri manungud sa bagay na an. 6 A nagpapaalaga sa usad na alduw, nagpapaalaga kadi alang-alang sa Kagorangnan. A nagkakaun ka onoman, nagkakaun kadi alang-alang sa Kagorangnan, ta nagpapasalamat iya sa Diyos. A diri nagkakaun ka ono man na klase sa pagkaun, naggigibo kan para man sa Kagorangnan sagkud nagpapasalamat man iya sa Diyos. 7 Uda siisay man kanatu a naboboway o nagraraan para sa sadiri sana niya. 8 Kin kita naboboway, naboboway kita para sa Kagorangnan, sagkud kin kita migraan, migraan kita para kanya. Kaya maboway man kita o magraan, kita nasa Kagorangnan. 9 Ta si Cristo nagraan sagkud naboway otro tanganing magin Kagorangan ka manga boway sagkud manga guraan.
10 Alagad ika, ngata ta inoosgaran mo a ngod mo? Sagkud ika man, ngata ta tinotoyatoya mo a ngod mo? Kita ngamin omaatobang sa hokoman ka Diyos tanganing osgaran. 11 Ta sinasabi sa Kasoratan, ? ?Mantang ako naboboway,? sabi ka Kagorangnan, ?a ngamin na tood tomitiklod sa atobangan ko sagkud a kada rira mig-omaw sa Diyos.? ?a
12 Kaya kita ngamin minnimbagan sa Diyos ka ngamin tang manga ginibo.
Diri magin Rason ka Pagkakasala ka Iba
13 Kaya diri ta na pag-osgaran a kapwa ta. Kindi, ingowaun ta na buku kita a magin rason ka pagkakasala ka ngod ta. 14 Holi ta nakipag-usad na ako sa Kagorangnan na si Jesus, nasisigoro ko na uda talaga maating pagkaun. Alagad kin inuuna ka usad na tawo na a usad na klase sa pagkaun maati, a pagkaun na an maati para kanya. 15 Kin nakukulgan a buut ka ngod mo holi sa kinakaun mo, buku ng oyon sa pagkabuut a ginigibo mo. Diri mo ipagpaamak a ngod mo ki Cristo holi sana sa pagkaun, holi ta nagraan man si Cristo para kanya. 16 Maanan mo na a inuuna mong tama para kanimo, diri pagmarautun ka iba. 17 Ta a paghahadi ka Diyos, bukung manungud sa pagkaun o inomon; manungud adi sa matanos na pamomoway, matoninung na relasyon sa kada usad, sagkud kaogmaan na regalo ka Espirito Santo. 18 A nagsisirbi ki Cristo sa arug kading paagi, kaakoako sa Diyos sagkud iginagalang ka manga tawo.
19 Kaya ingowaun tang gibowon pirmi a manga bagay na nakapagtatao sa katoninungan sagkud nakapagpapakusug ka pagtobod ka kada usad. 20 Diri ta pagrautun a ginibo ka Diyos holi sana sa pagkaun. Ngamin na pagkaun malinig sagkud pwedeng kaunun. Alagad nagkakasala man kita, kin nagkakasala a iba holi ka kinakaun ta. 21 Maraay pang diri na magkaun sa karne o mag-inom sa alak o maggibo sa ono man na bagay na magigin rason ka pagkakasala ka ngod mo. 22 Kaya onoman a pagtobod mo sa manga bagay na adi, ika na sana sagkud a Diyos a kaipowan na makaisi. Paladan a tawong diri riniribok ka konsensiya niya holi sa paggibo ka manga bagay na isi niyang tama. 23 Alagad a siisay man na nagkakaun na agko pagdorodarwa, kasalan an kanya, holi ta buku ading oyon sa pagtobod niya. Ta kasalan a onoman na bagay na ginigibo ta na diri nakabase sa tinotobod ta.