Roma 13

Katungran sa manga Namomoon ka Banwaan

¹ Kaipowan magpasakup kamo ngamin sa manga namomoon ka banwaan. Ta a ngamin na namomoon, galin sa Diyos, sagkud iya a nagbutang ka manga namomoon sadi. ² Kaya a manga nagkokontra sa namomoon, nagkokontra sa ibinutang ka Diyos, sagkud padodosaan niya sira. ³ A manga namomoon, diri kaipowan na katakotan ka manga naggigibo sa maraay. Kindi a manga naggigibo sana sa maraut a kaipowan na makatakot kanda. Kin abu mong makatakot sa manga namomoon, gibowon mo a maraay sagkud oomawun pa ika nira. ⁴ Ta a manga namomoon ka banwaan, manga mamandaan ka Diyos na nagsisirbi para sa ikararaay mo. Alagad kin miggibo ika sa maraut, kaipowan ikang makatakot holi ta agko sira poder na padosaan ika. Manga parasirbi sira ka Diyos na nagpapadosa sa manga naggigibo sa maraut. ⁵ Kaya ngani, kaipowan kamong magpasakup sa manga namomoon, buku sanang holi sa kaungtan ka Diyos kindi holi ka kaninyong malinig na konsensiya.

⁶ Amo man an a rason kin ngata ta nagbabayad kita ka bowis. Ta a manga namomoon, nagsisirbi sa Diyos sagkud itinao na nira a ngamin na panawon sa pag-otob ka kandang katungran. ⁷ Kaya itao ninyo sa kada usad a kaipowan na itao kanya. Magbayad kamo ka manga kaipowan na bayadan sagkud bowisan ninyo a kaipowan na bowisan. Igalang ninyo a kaipowan na igalang sagkud tawan ninyo sa onra a kaipowan na tawan kan.

Obligado kitang Mabutan a kada Usad

⁸ Diri kita magkaotang sa kiisay man, pwera ka otang sa pagkakabinutan sa kada usad, ta a nabubuut sa kapwa, nag-ootob sa Layi. ⁹ A manga laying arug ka, ?Diri ika manambay, diri ika mangguraan, diri ika magtaban, diri ika maibug,? sagkud a iba pang manga layi, nakapaluug sa uusad na layi, ?Mabutan mo a kapwa mo arug ka pagkabuut mo sa sadiri mo.? ¹⁰ A nabubuut, diri naggigibo ka maraut sa kiisay man. Kaya a pagkabuut amo a kaotoban ka Layi.

¹¹ Kaipowan tang gibowon adi holi ta isi tang panawon na tanganing maggisung na kita. Ta mas arani na ngowan a oras ka kanatung kaligtasan kisa ko kita onang magtobod sa Kagorangnan. ¹² Migraramrag na sagkud madali ng magliwanag. Kaya pondowon ta na a manga gibo sa kangitngitan sagkud isopong ta a armas na ginagamit sa kaliwanggan. ¹³ Mamoway kitang matanos bilang manga tawong namomoway na sa liwanag. Diri ta pagsayangun a oras ta sa maribok na pag-oogma sagkud irinoman, paggibo sa kadostaan, pagkakasogot o pagkaori. ¹⁴ Arugun ta a pamomoway ni Jesu Cristo tanganing magin arug iya ka armas na isinopong ta, sagkud magmaan kita tanganing diri ta matawan sa oportonidad a sadiri ta sa mararaut na kamawutan ka kanatung laman.