Manga Gibo
ko manga Apostol
Kapinonan
A libro ka Gibo amo a pangarwang libro na isinorat ni Lukas, katogbong ko Maraay na Bareta na naisorat na niya. Sa librong adi, binilang ni Lukas kin ono so manga naginibo ko manga parasonod ni Jesus bago pa iya naboway otro sagkud tinnaas sadto langit. Agko darwang apostol a Kagorangnan na si Jesus na ginamit saigo sa librong adi: A ona amo si Pedro na mababasa ta sa kapitolo 1-12 sagkud si Pablo na mababasa ta man sa kapitolo 13-28. Mababayad ta man sadi a manga importanteng katottoroan ko manga parasonod ni Jesus arug ka: Si Jesus ipinako sa kros, pagkatapos binoway otro sagkud ginibo ka Diyos na Kagorangnan sagkud Cristo sagkud a siisay man na magsulsul ka kandang manga kasalan, tomobod sagkud magpabunyag sa ngaran ni Jesu Cristo patatawarun sagkud maliligtas. Ta ono man na kasalan diri naipapatawad sa paggibo ka Layi ni Moises.
Bago pa tinnaas si Jesus sadto langit, sinabiyan niya so kanyang manga apostol, ?Makaaako kamo sa kapangyariyan kin a Espirito Santo omabot kaninyo. Kaya ka panawon na an kamo a migpatonay ko manga ginibo ko sa Jerusalem, sa Judea, Samaria, sagkud sa kaporoporowan ka kinaban.? So manga parasonod ni Jesus na innako ko Espirito Santo tinawan sa kapangyariyan tanganing mangadal sagkud iluyap a Maraay na Bareta sa manga baryo ko Jerusalem, pangala sadto karagaan ko Judea sagkud Samaria, sagkud sadto manga logar ko manga bukung Judio, anggan sa makaabot sadto Roma.
Ko ona so manga parasonod ni Jesus ngamin sana Judio. Alagad kadaklan ko manga Judio diri nagtobod ko Maraay na Bareta. Kaya naipangadal adi sadto ngamin na tawo.
Sa librong adi mababayad ta a maispid na pagluyap sagkud pagkusug ka Cristiyanismo galin sa Jerusalem paiyan sa Roma sa padagos na pakikiiba ka Espirito Santo na amo a nagpapakusug ka manga simbaan. Sa paagi ka manga istorya na nakasorat sa librong adi ipinababayad a kapangyariyan ka Maraay na Bareta sa boway ka manga paratobod sagkud a pakikipagtipon ka manga simbaan.
Manga Luug
So pag-anda ko manga apostol para magin testigo 1:1-26
So pagpatonay sadto Jerusalem 2:1-8:3
So pagpatonay sa Judea sagkud Samaria 8:4-12:25
So ministeryo ni Pablo 13:1-28:31
a. So onang pagbyayi ni Pablo tanganing mangadal 13:1-14:28
b. So pagtitipon sadto Jerusalem 15:1-35
k. So pangarwang pagbyayi ni Pablo 15:36-18:22
d. So pangtolong pagbyayi ni Pablo 18:23-21:16
e. So pagkapriso ni Pablo sadto Jerusalem, Cesarea sagkud sa Roma 21:7-28:3