21
Nagpabayad si Jesus sadto Pitong Disipolo
1 Pagkatapos kadi, nagpabayad otro si Jesus sadto manga disipolo niya sadto Ranuw ko Tiberias. Arug kadi so nangyari. 2 Magkaiiba si Simon Pedro, Tomas na binabaoy na Kambal, si Natanael (na tagaCana sa Galilea), so manga igin ni Zebedeo, sagkud so darwa pang disipolo ni Jesus. 3 Sinnabi si Simon Pedro kanda, ?Minggaisura ako.? Sinnabi man sira, ?Omiiba kami kanimo.? Kaya linnonad sira sadto bangka, alagad uda sira narakup anggan na magramrag.
4 Ko mararamragun na, tinnindug si Jesus sadto pangpang, alagad diri iya nabisto ko manga disipolo.
5 Pangala inonga sira ni Jesus, ?Manga igin, nakarakup kamo sa isura??
?Diri po,? simbag nira.
6 Sinabi niya kanda, ?Iitsa ninyo a kaninyong layaa sa toong parte ka bangka sagkud makararakup kamo.? Kaya iinitsa nira so laya sagkud diri nira adi mabutung pabalik, holi ta kadakul ko narakup nirang isura.
7 So disipolo na nabubutan ni Jesus sinnabi ki Pedro, ?Amo adto so Kagorangnan!? Ko marungug ni Pedro na amo adto so Kagorangnan, nagbado iya holi ta okas iya sagkud linnokso sadto tobig. 8 So ibang disipolo nakaabot sadto pangpang lonad sadto bangka, butungbutung so laya na pono sa isura, ta buku man sirang malangrayo sadto pangpang manga nobenta metros sana. 9 Pag-awas nira sadto pangpang nabayad nira so baga sa oring sagkud iniiyuw na isura, sagkud nagkapirang tinapay.
10 Pangala sinnabi si Jesus kanda, ?Magdara kamo sa nagkapirang isura na narakup ninyo.?
11 Kaya linnonad si Simon Pedro sadto bangka sagkud binutung sadto pangpang so laya na pono sa daddakulung isura, sento singkwenta etres ngamin so narakup nira. Alagad dawa kadakul ko isura, so laya diri nagasi. 12 Sinnabi si Jesus kanda, ?Mayna kamo ta mamawuw kita.? Ni usad sadto manga disipolo diri nagkusug buut na mag-onga kin siisay iya, ta isi man nira na iya a Kagorangnan. 13 Kaya rinnapo si Jesus, kinoko so tinapay sagkud itinao kanda, amo man ginibo niya sa isura. 14 Amo adi so pangtolong beses na nagpabayad si Jesus sadto manga disipolo niya poon na maboway iya otro.
Si Jesus sagkud si Pedro
15 Pakapamawuw nira, inonga ni Jesus si Simon Pedro, ?Simon, igin ni Juan, nabubutan mo ako na mas orog ka manga adi??
Sinnimbag iya, ?Amo po, Kagorangnan, isi mo po na nabubutan ko ika.?
Sinabiyan iya ni Jesus, ?Atamanun mo a manga karnero ko.?b 16 Inonga iya otro ni Jesus, ?Simon, igin ni Juan, nabubutan mo ako??
Sinnimbag si Pedro, ?Amo po Kagorangnan, isi mong nabubutan ko ika.? Sinabiyan iya ni Jesus, ?Atamanun mo a manga karnero ko.? 17 Tolong beses iyang inonga ni Jesus, ?Simon, igin ni Juan, nabubutan mo ako??
Namundu si Pedro ta tolong beses iyang inonga ni Jesus, ?Nabubutan mo ako.? Kaya sinnabi iya, ?Kagorangnan, isi mo po a ngamin, isi mo po na nabubutan ko ika.?
Sinnabi si Jesus, ?Atamanun mo a manga karnero ko. 18 Sinasabi ko kanimo a kamatoranan, ko hobin pa ika, nagsadiri ikang magsangli sagkud inniiyan ika kin sari mo gostong omiyan. Alagad paggorang mo, iuunat mo a kanimong kamut sagkud iba a migsangli kanimo sagkud dadarawun ika sadto logar na diri mo gosto.? 19 Sinabi niya adi tanganing ipaayag kin paono migraan si Pedro sagkud kin paono niya pamomorawayan a Diyos. Pangala sinabi kanya ni Jesus, ?Somonod ika kanaku!?
Si Jesus sagkud so Ibang Disipolo
20 Linnilili si Pedro sagkud nabayad niya so disipolo na nabubutan ni Jesus na sinnosonod kanda. Amo adi so disipolo na sinnandig sadto ruruggan ni Jesus ko nanggagab-i sira sagkud innonga kanya, ?Kagorangnan, siisay migtraydor kanimo?? 21 Ko mabayad iya ni Pedro, inonga niya si Jesus, ?Kagorangnan, ono man po a mingyari kanya??
22 Sinnimbag si Jesus, ?Kin gostowon ko na boway pa iya anggan sa pagbalik ko, ono man kanimo? Somonod ika kanaku.? 23 Holi kadi, so bareta linnuyap sadto manga parasonod ni Jesus na a disipolong adi diri na migraan. Alagad diri sinabi ni Jesus na diri iya migraan. So sinabi niya, ?Kin gostowon ko na boway pa iya anggan sa pagbalik ko, ono man kanimo??
24 Iya a disipolo na nagpapatonay ka manga bagay na adi sagkud iya man a sinnorat kadi. Isi namu na matood a sinasabi niya.
Kataposan
25 Kadakul pang manga bagay na ginibo si Jesus. Na kin isosorat ngamin usad-usad, sa pag-una ko diri migkaigo sa bilog na kinaban a manga libro na maisosorat manungud kadi.