20
Naboway Otro si Jesus
(Mt. 28:1-8; Mk. 16:1-8; Lk. 24:1-12)
1 Malapakasaki ko alduw sa Domingo, inniyan si Maria na tagaMagdala sadto lulubngan, sagkud naabotan niyang naalin na so batong nakagukup sadto pwertaan ko lulubngan. 2 Holi kadi, padalagan iyang inniyan ki Simon Pedro sagkud sadto disipolo na nabubutan ni Jesus, sagkud sinnabi kanda, ?Agko kinnoko ko Kagorangnan sadto lulubngan sagkud diri namu isi kin sari iya dinara!? 3 Pangala si Pedro sagkud so disipolo inniyan sadto lulubngan. 4 Pareyo sirang nagpandalagan alagad so usad na disipolo maispid na dinnalagan kaya naonaan si Pedro. 5 Innokrong adi sagkud sinnirang sadto luug. Nabayad niyang nakabutang so manga telang lino, alagad diri iya linnuug. 6 Nakasonod na innabot si Simon Pedro sagkud doroderetso ading linnuug sadto lulubngan. Nabayad niya so manga telang lino na nakabutang sadto, 7 sagkud so panyong ipinotos sadto payo ni Jesus. Buku ading kaiba ko manga telang lino, kindi soway na nakatipig sadto gilid. 8 Linnuug man so disipolong naonang innabot, nabayad niya adi sagkud naniwala. 9 Diri pa nanggayud na nira naiintindiyan a kasoratan na nagsasabing si Jesus kaipowan na maboway otro. 10 Pangala napaoli na so manga disipolo.
Nagpabayad si Jesus ki Maria na TagaMagdala
(Mt. 28:9-10; Mk. 16:9-11)
11 Alagad si Maria nakatindug na nagtatangis sadto lowas ko lulubngan. Mantang nagbobora iya innokrong iya sagkud sinnirang sadto lulubngan. 12 Sagkud nakabayad iya sa darwang anghel na nakabado sa poti, nakaula sadto binutangan ko bangkay ni Jesus, usad sadto pamaywan sagkud so usad sadto paniilan.
13 Inonga nira iya, ?Manay, ngata ika ta nagtatangis??
Sinnimbag iya, ?Kinoko po nira so Kagorangnan ko, sagkud diri ko isi kin sari iya dinara.? 14 Pangala nangalagkalag iya sagkud nabayad niya si Jesus na nakatindug sadto, alagad diri niya nabisto na amo adto si Jesus. 15 Inonga iya ni Jesus, ?Igin, ngata ika ta nagtatangis? Siisay a inaanap mo??
Sa pag-unang iya so hardinero, sinnabi si Maria kanya, ?Kin kinoko mo iya, sabiyun mo kanaku kin sari mo iya dinara ta kokoon ko.?
16 Sinnabi si Jesus kanya, ?Maria!?
Innatobang iya ki Jesus pangala sinnabi sa oosipun na Hebreo: ?Rabboni!?a
17 Sinabiyan iya ni Jesus, ?Diri mo ako pagkaptan ta diri pa ako nakababalik sa kanakung Ama. Alagad omiyan ika sadto manga ngod ko sagkud sabiyun mo kanda na bomabalik na ako sa kanakung Ama sagkud kaninyong Ama, sa kanakung Diyos sagkud kaninyong Diyos.?
18 Kaya inniyan si Maria na tagaMagdala sadto manga disipolo sagkud sinnabi, ?Nabayad ko a Kagorangnan!? Sagkud sinabi man niya kanda kin ono so sinabi ni Jesus.
Nagpabayad si Jesus sa manga Disipolo Niya
19 Kinagab`iyan ko alduw man sanang adto, so manga disipolo nangagtitipon. Nakasarado so pwertaan ko baluy nirang pigtitiponan ta nakatatakot sira ko manga namomoon kanda. Pangala innabot si Jesus sagkud tinnindug sadto bitnga nira sagkud sinnabi, ?A katoninungan mapakaninyo.? 20 Pagkatapos niyang sabiyun adi, ipinabayad niya kanda so kanyang kamut sagkud iris. Napono sa kaogmaan so manga disipolo ko mabayad nira a Kagorangnan. 21 Sinabi kanda otro ni Jesus, ?A katoninungan mapakaninyo. Kin paonong isinobol ako ka Ama, arug man kan, isinosobol ko kamo.? 22 Pangala inangusan niya sira sagkud sinnabing, ?Akoon ninyo a Espirito Santo. 23 Kin patawarun ninyo a manga kasalan ka manga tawo, pinatawad na sira, kin diri ninyo sira patawarun, diri sira pinatawad.?
Nagpabayad si Jesus ki Tomas
24 Ngowan si Tomas na binabaoy na Kambal, usad sadto doseng disipolo, bukung kaiba nira ko omabot si Jesus. 25 Kaya sinabi kanya ko ibang disipolo, ?Nabayad namu a Kagorangnan!?
Alagad sinnimbag si Tomas kanda, ?Anggan na diri ko mabayad so pinakoan ko kamut niya sagkud diri ko mailuug a manga goramuy ko, sagkud diri ko mailuug a kamut ko sadto iris niya, diri ako miniwala.?
26 Makalabos so usad na simana, nagtipon otro sadto luug ko baluy so manga disipolo sagkud kaiba na nira si Tomas. Nakasarado so manga pwertaan, alagad linnuug si Jesus sagkud tinnindug sadto bitnga nira sagkud sinnabi, ?A katoninungan mapakaninyo.? 27 Pangala sinnabi iya ki Tomas, ?Silngan mo a manga kamut ko sagkud ibutang mo a manga goramuy mo. Iluug mo a kamut mo sa iris ko. Diri na ika magdorodarwa, sagkud maniwala na ika.? 28 Sinnimbag si Tomas, ?Kagorangnan ko sagkud Diyos ko!?
29 Sinnabi si Jesus kanya, ?Naniniwala na ika holi ta nabayad mo ako? Paladan a manga naniniwala kanaku dawa diri ako nabayad.?
A Katoyowan ka Librong Adi