19
1 Pangala ipinakoko ni Pilato si Jesus sagkud ipinaampak. 2 Sagkud so manga soldados ginnibo sa korona galin sa manga sanga na agko todok sagkud ikinorona ki Jesus, pangala sinopongan nira iya sa badong lila, 3 sagkud rinnapo kanya sagkud sinnabing, ?Maboway a Hadi ka manga Judio!? Pangala pinagparasampaling iya.
4 Linnowas otro si Pilato sagkud sinabi sadto manga tawo, ?Iaatobang ko iya kaninyo tanganing maisiyan ninyo na uda ako mabayad na kasalan kontra kanya.? 5 Kaya ilinolowas si Jesus sopong so koronang todok sagkud so lilang bado, sagkud sinabi ni Pilato kanda, ?Silngi ninyo, taadi so lalaki.?
6 Ko mabayad iya ko namomoon ko manga padi sagkud ko manga bantay, kinnagrat sira, ?Ipako iya sa kros! Ipako iya sa kros!?
Alagad sinnimbag si Pilato, ?Koonon ninyo iya sagkud ipako sa kros, ta uda ako mabayad na kasalan kanya.?
7 Sinnimbag so manga tawo, ?Agko kita Layi na nagsasabi na kaipowan iyang magraan, holi ta inaako niya na iya a Igin sa Diyos.?
8 Ko marungug adi ni Pilato, mas orog iyang nakatakot, 9 kaya binnalik iya sadto luug ko palasyo. ?Sari ika galin?? onga niya ki Jesus, alagad diri sinnimbag si Jesus. 10 Kaya sinabiyan iya ni Pilato, ?Diri ika somisimbag kanaku? Diri mo isi na agko ako kapangyariyan na pomalibri o pomapako kanimo sa kros??
11 Sinnimbag si Jesus, ?Agko ika kapangyariyan kanaku holi ta tinawan ika ka Diyos. Kaya a manga tawong nagdara kanaku sadi mas magubat a kasalan.?
12 Ko marungug adi ni Pilato, mas orog iyang innanap sa paagi na mapalibre si Jesus. Alagad kinnagrat so manga tawo, ?Kin palilibriyun mo iya buku ikang amigo ka Emperador! Sagkud a siisay man na sinnasabing hadi iya kasogot ka Emperador.?
13 Ko marungug adi ni Pilato, dinara niya sadto lowas si Jesus sagkud innula iya sadto korte sa logar na binabaoy na Platapormang Bato (sa oosipun na Hebreo a ngaran Gabatha). 14 Alduw kadto sa Pag-aanda ko Paskowa, sagkud modto na.
Sinnabi si Pilato sadto manga Judio, ?Taadi a kaninyong hadi!?
15 Alagad kinnagrat sira, ?Guranun iya! Guranun iya! Ipako iya sa kros!?
Inonga sira ni Pilato, ?Gosto ninyong ipako ko sa kros a hadi ninyo??
Sinnimbag so manga namomoon ko manga padi, ?Uda kami ibang hadi kindi a Emperador!?
16 Pagkatapos, itinao ni Pilato si Jesus kanda tanganing ipako sa kros.
Ipinako si Jesus sa Kros
(Mt. 27:32-44; Mk. 15:21-32; Lk. 23:26-43)
Kaya kinoko nira si Jesus. 17 Sagkud linnowas iya na pas-an so kros niya paiyan sadto logar na binabaoy na Bongo, (sa oosipun na Hebreo, Golgota). 18 Pag-abot sadto, ipinako iya sa kros, kaiba so darwa pa, usad sa too sagkud usad sa wala. 19 Sinnorat si Pilato sa usad na paisi sagkud ipinabutang sadto taas na parte ko kros na nagsasabing, ?Si Jesus na tagaNazaret, a Hadi ka manga Judio.? 20 Dakul na manga Judio a nakabasa kadi, ta so logar kin sari ipinako si Jesus arani sadto syodad. So paisi isinorat sa oosipun na Hebreo, Latin sagkud Griego. 21 So manga namomoon ko manga padi sinabiyan si Pilato, ?Diri mo pagsorat na ?Hadi ka manga Judio,? kindi a tawong adi sinnasabing, ?Ako a Hadi ka manga Judio.? ?
22 Alagad sinnimbag si Pilato, ?A sinorat ko, sinorat ko na.?
23 Ko maipako na ko manga soldados si Jesus, kinoko nira so pang-alikbuy niya sagkud pinagbangabanga sa upat. Kinoko man nira so pang-irarum na bado. A badong adi uda tayi sagkud inabul na bilog galin sa itaas pababa.
24 So manga soldados nag-osip-osip, ?Diri ta pagbangaun adi, magtawo gila na sana kita tanganing maisiyan ta kin kiisay maiiyan ading bado.? Nangyari adi tanganing maotob so sinasabi sa kasoratan,
?Pinagbangabanga nira so pang-alikbuy ko
sagkud nagtawo gila ko bado ko.?
Sagkud amo adi ginibo ko manga soldados.
25 Arani sadto kros ni Jesus nakatindug so kanyang ina, so ngod ko kag-igin niyang si Maria na agom ni Cleopas, sagkud si Maria Magdalena. 26 Ko mabayad ni Jesus so kanyang ina sadto, sagkud so disipolo na nabubutan niya na nakatindug, sinnabi iya sadto kanyang ina, ?Nabubutan kong ina, taadi a kanimong igin,? 27 sagkud sadto disipolo, ?Taadi a kanimong ina.? Poon kadto, iniba ko disipolo so ina ni Jesus sadto baluy niya.
So Pagkagraan ni Jesus
(Mt. 27:45-56; Mk. 15:33-41; Lk. 23:44-49)
28 Isi ni Jesus na natapos na a ngamin na bagay. Kaya tanganing maotob a kasoratan sinabi niya, ?Napapaa ako.?
29 Agko sadto usad na tasa na pono sa soka. Kaya idinotdot nira sadto soka so espongha, ibinutang sa sanga ko isopo sagkud irinuta sadto nganga ni Jesus. 30 Ko masupsup na ni Jesus so alak sinnabi iya, ?Tapos na!? Pangala innokrong iya sagkud nagraan na.
31 Disperas kadto sa Paskowa kaya abu ko manga Judio na matagak sadto kros so guraan sa Alduw sa Pagpapaingalo holi ta banal na alduw adi. Kaya inayat nira ki Pilato na ipabari kadi so bitduk ko manga ipinako pangala ibaba sadto kros so guraan. 32 Kaya inniyan so manga soldados saka binari so manga bitduk ko darwang ipinakong kasabay ni Jesus. 33 Alagad pagrapo nira ki Jesus sagkud mabayad na guraan na adi, diri na nira binari so manga bitduk niya. 34 Alagad usad kanda tinosok si Jesus sadto iris, kaya binnolos tolos so rogo sagkud tobig. 35 So lalaking nakabayad kadi amo a nagpatonay, tanganing makatobod man kamo. Matood so kanyang ipinaayag sagkud isi niya na kamatoranan so sinabi niya. 36 Nangyari adi tanganing maotob so sinasabi sa kasoratan na, ?Uda mababari ni usad ka manga tolang niya.? 37 Sagkud agko pa parte ka kasoratan na sinnasabing, ?Babaydun nira so tinosokan nira ko espada.?
Ilinubung si Jesus
(Mt. 27:57-61; Mk. 15:42-47; Lk. 23:50-56)
38 Pagkatapos kadi, si Jose na tagaArimatea nakiosip ki Pilato na togotan iyang koon so bangkay ni Jesus. (Si Jose disipolo ni Jesus, alagad tago sana ta nakatakot iya ko manga Judio.) Tinogotan iya ni Pilato, kaya inniyan iya sagkud kinoko so bangkay. 39 Inniba kanya si Nicodemo, so lalaki na rinnapo ki Jesus usad na gab'i kadto, na agko darang manga trenta e singko kilos na paamot na isinalak sa miraa sagkud aloeb. 40 Kinoko nira so bangkay ni Jesus, sagkud oyon sa nakaogalian, pinotos nira adi sa telang lino na sinalakan ko manga dara nirang paamot. 41 Agko sadto usad na tatamnan na arani sa logar na pinagpakoan ki Jesus, sagkud agko sadi bagong lulubngan na diri pa ginagamit. 42 Holi ta disperas na ko Alduw sa Pagpapaingalo, sagkud arani na a lulubngan na adi, sadi na nira ilinubung so bangkay ni Jesus.