Roma 12

Pamomoway bilang Cristiyano

¹ Kaya ngani, manga ngod, alang-alang sa ambondang pagkaerak ka Diyos kanatu, nakikiosip ako na itao ninyo a kaninyong sadiri bilang usad na boway na atang, banal, sagkud angay sa Diyos. Amo adi a kinakaipowan na pagsamba ninyo kanya. ² Diri kamo makiiba sa manga ginigibo ka manga tawo sa kinaban na adi. Magbago kamo sa paagi ka pagliwat ka kaninyong isip tanganing maisiyan ninyo a kabutan ka Diyos; kin ono a maraay, kaakoako sagkud kompletong kabutan niya.

³ Holi sa biyaya na itinao ka Diyos kanaku, sinasabi ko sa kada usad kaninyo, diri ninyo pagpaalagaan a kaninyong sadiri na mas orog sa kinakaipowan. Imbes, isipun ninyo sa maraay a matood ninyong kamutangan oyon sa sokol ka pagtobod na itinao ka Diyos sa kada usad kaninyo. ⁴ Kin paonong a awak, agko dakul na parte, sagkud agko kanyakanyang trabawo a kada usad, ⁵ arug man kita kan, dawa kita dakul nabibilog kita sa uusad na awak ni Cristo, sagkud kita ngamin parte ka kada usad. ⁶ Tinawan kita ka manlainlain na kakayanan oyon sa karayan na buut ka Diyos, kaya gamitun ta a manga an. Kin a kakayanan ta pagpapaayag ka mensaying galin sa Diyos, magpaayag kita oyon sa sokol ka kanatung pagtobod. ⁷ Kin pagsirbi a kakayanan ta, magsirbi kita. Magtottoro a agko kakayanan sa pagtottoro. ⁸ Kin pag-atol, mag-atol kita sa maraay; kin sa pagtatao, magin matinao; kin sa pamomoon, mamoon kita sa maigut; sagkud kin pagtabang sa nangangaipo, magtabang kita na agko kaogmaan.

⁹ Magkabinutan kamo na tuduk sa buut. Ikaungut ninyo a maraut sagkud pirming mabutan a maraay. ¹⁰ Magkabinutan kamo bilang matood na magngongod. Sagkud paalagaan ninyo a iba na mas orog pa kisa ka pagpapaalaga ninyo ka sadiri ninyo. ¹¹ Diri kamo mag-inogak kindi magin maigut sagkud tuduk sa poso kamong magsirbi sa Kagorangnan. ¹² Mag-ogma kamo holi ka kaninyong paglaom, magtius kamo sa manga kadipisilan sagkud pirming mangadyi. ¹³ Tabangan ninyo a manga kangoran sa kandang pangangaipo, sagkud padagoson ninyo sa baluy a manga tagaibang logar.

¹⁴ Ipangadyi ninyo a manga nagpapasakit kaninyo, ipangadyi ninyo sira sagkud diri pagsompaun. ¹⁵ Makiogma kamo sa manga nag-oogma, sagkud makibora kamo sa manga nagbobora. ¹⁶ Mamoway kamong matoninung sa kada usad. Diri magmataas, kindi makiiba kamo sa manga pobre. Diri kamo mag-isip na kamo madonong.

¹⁷ Diri ninyo pagbalusan sa maraut a manga naggigibo kaninyo ka maraut. Gibowon ninyo a maraay sa pagsilung ka ngamin. ¹⁸ Anggan sa makakaya ninyo, mamoway kamong matoninung sa ngamin na tawo. ¹⁹ Nabubutan kong manga ngod, diri kamo magbalus; pabayaan ninyong a kaungtan ka Diyos a magbalus, ta nasosorat, ?Ako a migbalus; ako a migpasakit.? ²⁰ Kaya, ?Kin nag-aalup a kasogot mo, pakaunun mo. Kin napapaa iya, painomon mo. Sa paggibo mo kadi kanya, mapasusupug iya sa kanyang sadiri.? ²¹ Diri kamo magpadaug sa maraut, kindi daugun ninyo a maraut sa paagi ka paggibo sa maraay.