11
Kinaerakan ka Diyos a Israel
1 Amo adi ngowan a onga ko: Isinikwal na raw ka Diyos a manga Judio na pinili niya? Diri basang! Usad man akong Israelita, galin sa erensiya ni Abraham sagkud kaiba sa tribo ni Benjamin. 2 Diri isinikwal ka Diyos a manga Judio na sa pagpoon pa pinili na niya. Ngata diri ninyo isi a sinasabi ka Kasoratan manungud ki Elias? Nag-adrangay iya sa Diyos kontra sa manga Israelita. 3 Sinabi niya, ?Kagorangnan, ginuraan nira so manga propeta mo sagkud rinugma a manga altar mo. Ako na sana a natutuda, sagkud gosto pa nira akong guranun!? 4 Alagad ono a simbag kanya ka Diyos? ?Nagtuda ako sa siyete mil na lalaking diri sinnamba sa diyosdiyosan na si Baal.a? 5 Arug man kan ngowan; agko pa manga Judiong natutuda na pinili a Diyos holi ka kanyang karayan na buut. 6 Pinili sira ka Diyos holi sa kanyang karayan na buut, bukung holi sa maraay nirang gibo; ta kin holi sa maraay na gibo, a karayan na buut ka Diyos diri na masasabing karayan na buut.
7 Ono ngowan? Diri natorakan ko kadaklan ko manga Judio so katanosan na inaanap nira. So gatikot sana na pinili ka Diyos so nakatorak kadi ta kusung so iba. 8 Amo adi a nasosorat sa Kasoratan,
?Tinawan sira ka Diyos ka maloyang pag-iisip,
manga matang diri makabayad
sagkud manga talingang diri makarungug,
anggan sa panawon na adi.b?
9 Sagkud sinnabi man si David,
?Magin paun sagkud siud man logod kanda a pagpipiyesta nira,
usad na singkogan sagkud padosa kanda.
10 Maarap man logod sira tanganing diri sira makabayad,
sagkud maboktot sa sakit mantang naboboway.c?
11 Amo man adi a onga ko ngowan: So pagkasingkog raw ka manga Judio, nangangaologan na kataposan na nira? Buku basang! Imbes, holi ko diri nira pag-ako ki Cristo a kaligtasan nakaabot sa manga bukung Judio tanganing maibug a manga Judio kanda. 12 Ngowan, kin a pagkakasala ka manga Judio nagtao sa dakulung karayan sa kinaban, sagkud kin so pagbagsak nira nagtao sa ambondang biyaya sa manga bukung Judio, gaomno pa kaya kin magbalik a ngamin na Judio sa Diyos? 13 Amo man adi a masasabi ko kaninyo manga bukung Judio. Holi ta ako apostol ninyo, pinaaalagaan ko a ministeryo ko 14 tanganing paibugun a manga kapareyo ko Judio sagkud tanganing mailigtas a iba kanda. 15 Kin a pagsikwal kanda nagin paagi tanganing maibalik ka Diyos a maraay na relasyon niya sa iba pang manga tawo sadi kinaban, a pag-ako otro kanda ka Diyos maipapareyo sa pagkaboway otro ka manga guraan!
16 Maipapareyo a manga Judio sa tinapay. Ta kin a onang pidaso ka tinapay naiatang sa Diyos, a kainterowan na tinapay naiatang na man kanya. Usad pang maipapareyo kanda amo a kawoy; ta kin a gamot kadi naiatang sa Diyos, amo man a sanga kadi. 17 Maipapareyo man a manga Judio sa olibo na itinanum sagkud pinotol so ibang manga sanga. Ngowan, kamong manga bukung Judio maipapareyo man kamo sa sanga ka layas na olibo na itinogbong sadto itinanum niya tanganing makaeras ka sostansiyang galin sa tonay na gamot. 18 Alagad, magmaan kamong diri magin mapagmataas sa manga sangang pinotol. Rumrumun ninyong bukung kamo a nagboboway ka ogat, kindi a ogat a nagboboway kaninyo.
19 Ngowan migsabi ika, ?Pinotol so manga sanga tanganing ako a maitogbong.? 20 Matood an. Pinotol sira ta diri sira nagtobod, alagad ika itinogbong holi ta nagtobod. Kaya diri ika magmataas, imbes magmaan ika. 21 Holi ta diri pinanganganognan ka Diyos na potolon a manga tonay na sanga, kaya diri man ika niya panganganognan. 22 Sadi ta mababayad kin gaomno kabuut sagkud kaisug a Diyos. Maisug iya sa manga nagkakasala, alagad mabuut iya kin padagos kamo sa kanyang karayan. Kin diri, popotolon man kamo. 23 Kin a manga Judio magtobod, itotogbong otro sira ta agko kapangyariyan a Diyos na itogbong sira otro. 24 Kin ika pinotol sa usad na olibong layas, pangala itinogbong sa tonay na olibo dawa buku ini a natoral na paagi, mas madali para sa manga tonay na sanga na itogbong otro sa dating poon nira.
Naeerak a Diyos sa Ngamin
25 Manga ngod, usad na misteryo a gosto kong maisiyan ninyo tanganing diri kamo magin mapagmataas. So diri pag-ako ko ibang manga Judio na magtobod ki Cristo diri migdanay. Anggan sana yan sa makompleto na a bilang ka ngamin na bukung Judio na romarapo sa Diyos. 26 Kin mangyari na adi, a ngamin na Judio maliligtas, arug sa nasosorat,
?Omaabot a Paraligtas galin sa Zion.
Aalinun niya a karatan sa erensiya ni Jacob.
27 Sagkud amo adi a gigibowon kong kasondoan namu,
kin alinun ko na a manga kasalan nira.d?
28 Ta isinikwal ka manga Judio a Maraay na Bareta, kaya nagin kasogot sira ka Diyos, sagkud kamong manga bukung Judio a nanginabang. Alagad nabubutan pananggayud na sira ka Diyos holi ko kandang manga ginikanan na pinili niya. 29 Ta diri nagbabago a isip ka Diyos manungud ka manga pinili niya sagkud ka biyayang itinao niya. 30 Kadto diri kamo nagkoyog sa Diyos, alagad ngowan, innako kamo ka pagkaerak ka Diyos ta diri nagtobod so manga Judio. 31 Arug man kan, holi ko pagkaerak ka Diyos na namatian ninyo, nagkinusung man ngowan a manga Judio tanganing mamatian man nira ngowan a kanyang pagkaerak. 32 Ta pinabayaan ka Diyos na maoripun sa pagigin kusung a ngamin na tawo tanganing maipamati niya kanda ngamin a pagkaerak niya.
Pag-omaw sa Diyos
33 Malakaambonda ka pagkaerak ka Diyos! Diri marurup a kadonongan niya sagkud kaisipan! Uda makapag-isplikar ka manga desisyon niya. Uda makaiintindi ka manga paagi niya. 34 Ta nasosorat, ?Siisay nakaiisi ka pag-iisip ka Kagorangnan?
Siisay a pwedeng tagaatol niya?
35 Siisay a nakapagtao kanya sa ono man
na kaipowan niyang bayaran?e?
36 Ta iya a naglalang ka ngamin, iya a namomoon ka ngamin, sagkud a ngamin linalang tanganing iya omawun.
Mapakanya a kamorawayan anggan pa man! Amen.