Roma 5

A Pagigin Matanos sa Diyos

¹ Holi ta ginibo na kitang matanos sa paagi ka kanatung pagtobod, agko na kita matoninung na relasyon sa Diyos sa paagi ka kanatung Kagorangnan na si Jesu Cristo. ² Sa paagi ka pagtobod ki Jesu Cristo, naako ta a karayan na buut ka Diyos, sagkud naoogma kita holi ka paglaom na makaparte sa kanyang kamorawayan. ³ Buku sanang an. Ikinaoogma ta man a manga kadipisilan na kanatung tinitius, ta isi ta na nagbobonga adi sa pagtitiyaga. ⁴ Sagkud a pagtitiyaga nagbobonga sa kakusugan, sagkud a kakusugan man nagbobonga sa paglaom. ⁵ Sagkud diri kita pinapasupug ka paglaom na adi holi ta pinono na ka Diyos a poso ta ka pagkabuut niya sa paagi ka Espirito Santo na itinao niya kanatu.

⁶ Ta kadtong uda kita kakayanan na tabangan a sadiri ta, nagraan si Cristo sa tamang panawon para sa manga makasalan. ⁷ Kadipisil mangyari na iatang ka siisay man a boway niya holi sa usad na tawong matanos, dawa ngani agko magkusug buut na gomibo kadi alang-alang sa usad na tawong maraay. ⁸ Alagad ipinamati ka Diyos a pagkabuut niya kanatu ko magraan si Cristo para kanatu ko kita makasalan pa. ⁹ Kaya ngowan pinatawad na kita ka manga kasalan ta sa paagi ka rogo niya, sagkud sigoradong makaliligtas kita sa kaungtan ka Diyos. ¹⁰ Dati, manga kasogot kita ka Diyos, alagad inako na niya kita bilang manga amigo sa paagi ka pagkagraan ka Igin niya. Sagkud holi kadi, sigoradong makaliligtas kita holi ta boway si Cristo. ¹¹ Sagkud buku sanang an! Naoogma kita sagkud nag-oomaw sa Diyos sa paagi ka kanatung Kagorangnan na si Jesu Cristo, ta holi kanya inako kita bilang manga amigo ka Diyos.

Si Adan sagkud si Cristo

¹² Ikonsiderar ta so resolta ko ginibo ni Adan sagkud ginibo ni Cristo. Si Adan nagkasala uban ng panawon sagkud amo adto so kapinonan na magkasala so manga tawo. Holi sa kasalan, kinondenar iya na magraan, kaya poon kadto, ngamin na tawo migraan ta ngamin na tawo nagkasala. ¹³ Bago itinao so Layi ki Moises, so manga tawo nagkasala na, alagad ta uda man Layi kaya so kasalan nira diri ibinilang na nagbalgar sira ko layi. ¹⁴ Alagad dawa ngani diri nira binalgar ni usad so Layi ka Diyos arug ko kasalan ni Adan, isi ta na nagkasala sira, holi ta sa kapinonan pa ko panawon ni Adan anggan sa panawon ni Moises, ngamin na tawo migraan.

Si Adan arug ni Cristo na nag-abot pagkatapos niya, ta so ginibo nira agko ngamin epekto sadto tawo. ¹⁵ Alagad bukung pareyo a darwang adi holi ta libre a regalo ka Diyos bukung arug ko kasalan ni Adan. Matood na dakul na tawo so nagraan holi sa kasalan ka usad na tawo. Alagad a karayan na buut ka Diyos mas orog na dakulu, arug man kan a uda bayad na regalo sa dakul na tawo sa paagi ka karayan na buut ka usad na tawo, si Jesu Cristo. ¹⁶ Usad pang pagkakaiba ka regalo ka Diyos sagkud ko bonga ko pagkakasala ko usad na tawo amo adi. So resolta ko usad na tawong nagkasala amo na kinondenar so manga tawo na padosaan, alagad holi sa karayan na buut ka Diyos dakul na manga kasalan ka ngamin na tawo a mapapatawad sagkud maibibilang sirang matanos sa Diyos. ¹⁷ Sa paagi ko diri pagkoyog ni Adan, a ngamin na tawo migraan holi ko kasalan niya. Alagad so resolta ko ginibo ni Jesu Cristo mas magubat. Holi kanya, a ngamin na nakaako ka malakadakulung biyaya sagkud ka katanosan na irenegalo niya, mig-ogma sa boway na uda kasagkuran sagkud mig-iba sa paghahadi ka Diyos.

¹⁸ Sagkud kin paonong a diri pagkoyog ka usad na tawo nagtao sa kapadosaan sa ngamin, a matanos na ginibo man ka usad na tawo amo nagtao sa kapatawaran sagkud boway na uda kasagkuran. ¹⁹ Ta sa diri pagkoyog ko usad na tawo, dakul so manga nagin makasalan; arug man kan, dakul a mapapatawad sa kasalan holi sa pagsonod sa usad na tawo.

²⁰ Ko magkaagko ka Layi, dinnakul so diri nagsonod, alagad sa pagdakul man ko manga diri nagsonod mas orog na nag-ambonda a karayan na buut ka Diyos. ²¹ Kaya ngani, kin paonong naghadi a kasalan tanganing sira magraan sagkud makasoway sa Diyos anggan pa man, arug man kan naghahadi a karayan na buut ka Diyos sa paagi ka pagpapatawad ka manga kasalan ta.