Roma 4

Ginibong Arugan si Abraham

¹ Ono man a masasabi ta ki Abraham a ama ka kanatung ginikanan? Ono a rason tanganing ibilang iyang matanos? ² Kin ginibong matanos si Abraham holi sa manga maraay niyang gibo, agko raw iya maipagmataas? Alagad uda iya pwedeng maipagmataas sa atobangan ka Diyos. ³ Holi ta sinasabi sa Kasoratan, ?Nagtobod si Abraham sa Diyos, sagkud holi kadi, inako iyang matanos ka Diyos.? ⁴ A itinatangran sa tawong nagtatrabawo diri maibibilang na regalo, kindi tangran kanya. ⁵ Alagad a diri nagtitiwala sa sadiring manga gibo, kindi nagtotobod sa Diyos na amo a naggigibong matanos sa manga parakasala, ibinibilang na matanos ka Diyos holi ka kanyang pagtobod. ⁶ Kaya binaoy ni David na paladan a tawong ginibong matanos ka Diyos, bukung holi sa sadiri niyang gibo. Sinabi niya,

⁷ ?Paladan a manga tawong pinatawad na a manga kasalan,

sagkud liningawan na so manga mararaut na gibo nira.

⁸ Paladan a tawong a manga kasalan

nilingawan na ka Kagorangnan.?

⁹ A biyaya kayang adi para sana sa manga Judio? Buku! Para man adi sa manga bukung Judio. Sinasabi ta sigon sa Kasoratan na ibinilang na matanos ka Diyos si Abraham holi ka kanyang pagtobod. ¹⁰ Kono adi nangyari? Bago iya tinori, o pagkatapos? Bago iya tinori, sagkud bukung pagkatapos. ¹¹ Tinori iya bilang tanda na ibinilang iyang matanos ka Diyos, holi sa pagtobod niya ko diri pa iya tori. Kaya iya a nagin ama ka ngamin na nagtotobod sa Diyos, kaya pinatawad man sira dawa diri sira tinori. ¹² Sagkud iya man a ama ka manga tori, buku sana sa kandang pagigin tori, kindi holi ta nagtobod sira arug ko ginikanan tang si Abraham bago pa iya toriun.

Naresibi so Panoga holi sa Pagtobod

¹³ Ipinanoga ka Diyos ki Abraham sagkud sa manga erensiya niya na mamanawun nira a bilog na kinaban, bukung holi sa pagsonod niya ka Layi, kindi holi ta ibinilang iyang matanos sa paagi ka pagtobod niya sa Diyos. ¹⁴ Kin a panoga itatao sana sadto manga nagsosonod ka Layi, uda kamutangan a pagtobod ka tawo sagkud uda kamutangan a panoga ka Diyos. ¹⁵ A Layi agko kaibang kaungtan ka Diyos para sadto manga nagbabalgar. Alagad kin uda layi, uda man pagbalgar.

¹⁶ Kaya ngani sa pagtobod nakabase a panoga, tanganing maitao ading uda bayad na regalo para sa ngamin na erensiya ni Abraham, buku sanang sa manga nasasakupan ka Layi, kindi sa ngamin na nagtotobod man arug ni Abraham. Ta iya a ama ka ngamin na nagtotobod, ¹⁷ arug ka nasosorat, ?Gigibowon ko ikang ama ka manga tawo sa dakul na nasyon.? A panogang adi agko alaga sa atobangan ka Diyos na tinotobod niya, a Diyos na nagboboway otro ka manga guraan, sagkud miglalang ka manga bagay na diri pa nalalalang. ¹⁸ Dawa uda na paglaom na magkaigin naniwala pa nanggayud na si Abraham na magigin ama iya ka manga tawo sa dakul na nasyon, oyon sa sinabi kanya, ?Arug kadakul ka manga bitoon a magigin erensiya mo.? ¹⁹ Diri nanloya a kanyang pagtobod, dawa ngani isi niya na maloya na iya ta gorang na, sagkud nasa sanggatos na iya kadto, sagkud so agom man niyang si Sara baog. ²⁰ Diri iya nagdorodarwa sa panoga ka Diyos. Imbes, mas orog na tinnibay so pagtobod niya sagkud nag-omaw sa Diyos. ²¹ Bilog iyang nagtiwala na gigibowon ka Diyos so ipinanoga niya. ²² Kaya holi ka kanyang pagtobod, ibinilang iya ka Diyos na matanos na tawo. ²³ A oosipun na, ?ibinilang na matanos? buku sanang para kanya, ²⁴ kindi para man kanatu. Kita man gigibowon na matanos, nagtotobod kita sa Diyos na nagboway otro ki Jesus na kanatung Kagorangnan. ²⁵ Ipinaguraan iya holi ka kanatung manga kasalan sagkud binoway otro tanganing kita magin matanos.