3
1 Kin arug kan ono a karayan ka pagigin usad na Judio sa manga bukung Judio? Ono importansiya ka pagigin tori? 2 Malakadakul! Ona, sa manga Judio ipinagkatiwala ka Diyos a oosipun niya. 3 Ono man kin agko nagkapira kanda na diri nagin maimbod? Magin rason raw an na diri na magigin maimbod a Diyos? 4 Diri basang! Ta dawa botigun a ngamin na tawo, padagos pa nanggayud ng maimbod sagkud matood a Diyos. Arug sa nasosorat,
?Kaipowan na mabayad na tama ika;
Sagkud kin oosgaran ika kaipowan na manggana ika.?a
5 Alagad kin a karatan ta nagpapabayad ka ostisya ka Diyos, masasabi ta kayang buku iyang maimbod ta kita pinapadosaan niya? (Arug kan kin magrason a manga tawo.) 6 Buku basang! Ta kin a Diyos bukung matanos paono niya oosgaran a kinaban?
7 Kin sa paagi ka manga kabotigan ko mas orog na natatawan sa onra a Diyos, holi ta mas orog na nabibisto na iya maimbod, ngata ta padodosaan pa niya ako bilang makasalan? 8 Kin arug kan, ngata ta diri ta sabiyun, ?Gomibo kita sa maraut kin maraay man a magigin bonga kadi.?? Arug kono kan a itinotottoro namu, sabi ka manga nanraraut kanamu. Padodosaan sira ka Diyos, sagkud amo yan a tama.
Uda Tawong Matanos
9 Ono palan a masasabi ta? Mas maraay a kamutangan tang manga Judio kisa ka iba? Buku basang! Arug ngani ko sinabi ko, a ngamin na tawo makasalan Judio man o bukung Judio. 10 Arug ka sinasabi sa Kasoratan,
?Uda matanos, uda dawa usad.
11 Uda ni usad na nakaiintindi, sagkud nag-aanap sa Diyos.
12 Ngamin sira tinnalikokod sa Diyos, sagkud ngamin nagkasala.
Uda naggibo sa maraay, uda dawa usad.?b
13 A manga oosipun nira pono sa makaguguraan na kabotigan;
A manga rira nira ginagamit sa pandadaya.c
Sagkud mararaut na oosipun arug sa kamandag ka sawa a naglolowas sa nganga nira.d
14 ?Pono sa pagmomoda sagkud pagsompa a nganga nira.?e
15 ?Malangdali nirang mangkulug sagkud mangguraan.
16 Bagana inagyan sa peste a inaagyan nira,
17 diri nira isi a raran ka katoninungan,f
18 ni nakatuud na makatakot sa Diyos.?g
19 Ngowan, isi ta na onoman na sinasabi ka Layi sinasabi sa manga nasasakupan kadi tanganing uda mairason a siisay man, sagkud holi kadi minnimbagan a ngamin na tawo sa Diyos. 20 Ta uda siisay man na nagigin matanos sa atobangan ka Diyos sa paggibo ka inaayat ka Layi; a gibo ka Layi amo na ipaisi kanatu na kita makasalan.
Paono Ginibong Matanos ka Diyos a manga Tawo
21 Alagad ngowan naayag na kin paonong ginigibong matanos ka Diyos a manga tawo. Buku ading sa paagi ka Layi, dawa ngani a Layi sagkud so manga propeta mismo a nagpamatood manungud kadi. 22 Ibinibilang na matanos ka Diyos a siisay man holi ka kanyang pagtobod. Uda iya pinapaorog. 23 Holi ta a ngamin nagkasala sagkud arayo sa makaliligtas na presensiya ka Diyos. 24 Alagad holi sa uda bayad na karayan na buut niya, ginibo niyang matanos sira sa paagi ni Cristo Jesus na amo a nagpalibre kanda. 25 Iya a itinao ka Diyos bilang atang, tanganing sa paagi ka rogo niya mapatawad a kasalan ka ngamin na nagtotobod kanya. Ginibo adi ka Diyos tanganing mapamatoranan na iya matanos. Kadtong panawon nagpasensiya iya ko manga kasalan na nagibo ko manga tawo. 26 Alagad ngowan malinaw na ipinabayad ka Diyos na iya matanos sagkud iya a naggibong matanos sa manga nagtotobod ki Jesus.
27 Kaya ono ngowan a kanatung maipagmamataas? Uda basang! Sagkud ono man a rason ta kadi? Holi raw sa pagkoyog ta sa Layi? Buku! Kindi holi sa pagtobod ta ki Cristo. 28 Kin arug kan, malinaw na sa paagi sana ka pagtobod nagigin matanos a manga tawo, sagkud bukung sa paagi sa pagkoyog sa Layi. 29 A Diyos raw Diyos sana ka manga Judio? Bukung Diyos man iya ka manga bukung Judio? Amo, Diyos man iya ka manga bukung Judio, 30 ta uusad sana a Diyos. Pareyo niya gigibowon na matanos a manga Judio sagkud bukung Judio holi ka kandang pagtobod kanya. 31 Inalinan raw namu sa kamutangan a Layi holi ka pagtobod na adi? Diri basang! Imbes, pinakusug pa ngani namu adi.