Roma 2

Matanos a Pag-osgar ka Diyos

¹ Kaya ngani, dawa siisay pa ika, uda ika rason na osgaran a iba. Ta sa pag-osgar mo sa iba inoosgaran mo man a sadiri mo, ta ika na nag-oosgar naggigibo man ka ginigibo nira. ² Ta isi ta na tama a pag-osgar ka Diyos sa manga tawong arug kan a gibo. ³ Pag-una mo raw makalilikay ika sa padosa ka Diyos kin oosgaran mo a manga naggigibo sa maraut na ginigibo mo man? ⁴ O baka man gosto mo pang toyatoyaun a Diyos holi ta iya malangbuut, matinius sagkud mapagpasensiya. Diri mo isi na malangbuut ka Diyos kanimo holi ta gosto pa niya ikang tawan sa oportonidad na magsulsul sagkud magbago? ⁵ Alagad holi ka kakusungan mo sagkud diri pagsulsul, mas orog mong pinapagubat a padosang itatao kanimo sa Alduw na adto, kin kono iaayag a kaungtan sagkud matanos na pag-osgar ka Diyos. ⁶ Holi ta babalusan niya a kada usad oyon sa kanyang gibo. ⁷ A manga tawong padagos na nag-iingoang gomibo sa maraay, sagkud nag-aanap ka kamorawayan, kaomawan sagkud boway na uda kagranan, tatawan ka Diyos sa boway na uda kasagkuran. ⁸ Alagad a manga tawo na sadiring karayan sana a iniisip sagkud abung omako ka kamatoranan, makaaako ka grabing kaungtan ka Diyos, ta mas gosto pa nirang koyogon a sala. ⁹ Pagsakit sagkud kadipisilan a mamamatian ka kada usad na naggigibo sa maraut, ona a manga Judio sagkud amo man a manga bukung Judio. ¹⁰ Alagad kamorawayan, kaomawan sagkud katoninungan a maaako ka kada naggigibo sa maraay, ona a manga Judio, pangala a manga bukung Judio. ¹¹ Holi ta uda pinapaorog a Diyos sa pag-osgar.

¹² A ngamin na nagkakasala na lowas sa Layi ni Moises padodosaan man na soway sa Layi. Sagkud a ngamin na nagkasala na sakup ka Layi, oosgaran oyon sa Layi. ¹³ Ta bukung a nag-iirungug ka Layi a ibinibilang na matanos sa atobangan ka Diyos, kindi so manga nagkokoyog kadi amo gigibowon na matanos. ¹⁴ Dawa a manga bukung Judio na uda Layi, naggigibo ka manga bagay na sakup ka Layi, amo yan nagigin layi kanda, dawa uda sira Layi, ¹⁵ sagkud a manga iwag-iwag nira nagpapabayad na nakasorat sa poso nira a ipinagbubuut ka Layi. Pinapatotonayan an ka kandang manga konsensiya, ta kin minsan binabasol sira ka kandang manga isip, kin minsan man sinosorog sira. ¹⁶ Sigon sa Maraay na Baretang ipinapangadal ko, mingyari adi sa Alduw na oosgaran ka Diyos a manga sekreto ka tawo sa paagi ni Cristo Jesus.

A manga Judio sagkud a Layi ni Moises

¹⁷ Ono man a manungud kanimo? Binabaoy mo a sadiri mong Judio; nagsasarig ika sa Layi ni Moises sagkud ipinagmamataas mo a relasyon mo sa Diyos. ¹⁸ Isi mo a kabutan ka Diyos sagkud naturan mo man sa Layi a pagpili ka maraay. ¹⁹ Nag-uuna ika na ika a parakabit ka manga bota, sagkud liwanag ka manga nasa kangitngitan, ²⁰ paradawuy ka manga patal, maestro ka manga igin, ta naisiyan mo sa Layi a ngamin na pagkaintindi sagkud kamatoranan. ²¹ Nagtotottoro ika sa iba, ngata ta diri mo tottoroan a sadiri mo? Nagtotottoro ika kontra sa pagtaban, ngata ika ta nagtataban? ²² Ika na nagsasabing diri makiolod sa buku mong agom, nakikiolod man sa buku mong agom. Naooyam ika sa diyosdiyosan, ngata ta nagluluug ika sa templo makapagtaban sana? ²³ Ipinagmamataas mo na agko ika ka Layi, alagad ngata ta diri mo iginagalang a Diyos sa diri mo pagkoyog ka layi niya? ²⁴ Ta nasosorat, ?A ngaran ka Diyos binabasangbasang ka manga bukung Judio holi kaninyo.?

²⁵ A pagigin tori mo importante sana kin nagkokoyog ika ka Layi, alagad kin diri ika nagkokoyog ka Layi, bagana man sana ika bukung tori. ²⁶ Kin a bukung tori naggigibo oyon sa inaayat ka Layi, diri raw iya ibibilang ka Diyos na tori? ²⁷ Kaya kamo na manga toring agko nakasorat na Layi alagad diri man nagkokoyog, oosgaran kamo ka manga bukung tori, na nagkokoyog ka Layi. ²⁸ A pagigin matood na Judio ka usad na tawo bukung sa rason na agko iya tanda sa awak, sagkud diri iya nagigin matood na tori sa rason na tinori iya sa laman. ²⁹ Kindi, a matood na Judio amo a manga tawong nabago a poso, oyon sa Espirito sagkud bukung oyon sa nakasorat sa Layi. A tawong arug kan inoomaw ka Diyos, bukung ka tawo.