Roma 1

Sorat ni Pablo sa manga

TagaRoma

¹ Akong si Pablo a nagsorat kadi usad na mamandaan ni Cristo Jesus, pinili sagkud binaoy ka Diyos na magin apostol tanganing mangadal ka Maraay na Bareta. ² A Maraay na Baretang adi ipinanoga niya poon pa kadto sa paagi ko manga propeta, arug ka nasosorat sa Banal na Kasoratan. ³ Manungud adi sa kanyang Igin na si Jesu Cristo na kanatung Kagorangnan, na sa kanyang pagigin tawo ipinangigin iyang erensiya ni David, ⁴ sagkud ipinaayag iya bilang Igin ka Diyos sa kapangyariyan ka Espirito ka kabanalan, holi sa pagkaboway niya. ⁵ Sa paagi niya, inako ko galin sa Diyos a prebilihiyo na magin apostol tanganing holi ki Cristo madara ko a ngamin na tawo sa pagkoyog sagkud pagtobod kanya. ⁶ Sagkud kamong manga isan Roma na sinosoratan ko kaiba man kamo ka manga binaoy ka Diyos na magin parasonod ni Jesu Cristo.

⁷ Kaninyo ngamin na tagaRoma na nabubutan ka Diyos sagkud binaoy na magin manga banal, mapakaninyo logod a bendisyon sagkud katoninungan galin sa Diyos na kanatung Ama sagkud ka Kagorangnan tang si Jesu Cristo.

A Pagmawut ni Pablo na Bomisita sadto Roma

⁸ Ona sa ngamin, nagpapasalamat ako sa Diyos sa paagi ni Jesu Cristo holi kaninyo ngamin, ta a pagtobod ninyo nababareta sa bilog na kinaban. ⁹ Testigo ko a Diyos na kanakung pinagsisirbiyan na tuduk sa poso ko sa paagi ka kanakung pangangadal ka Maraay na Bareta manungud sa Igin niya, na pirmi ko kamong ipinapangadyi. ¹⁰ Inaayat ko sa Diyos na buutun man logod niya na mabisita ko na kamo. ¹¹ Ta minamawut ko saigo na mabayad kamo tanganing matawan ka biyaya espiritwal sagkud magin makusug a pagtobod ninyo. ¹² A buut kong sabiyun, pareyo kita mapakukusug; mapakukusug kamo ka pagtobod ko, sagkud ako man ka pagtobod ninyo.

¹³ Manga ngod, gosto kong maisiyan ninyo na pirang beses ko ng plinano na bomisita kaninyo, alagad anggan ngowan diri ako nadadagos. Gosto ko man na makabinsir san inyo, arug ko ginibo ko na sa ibang manga bukung Judio. ¹⁴ Ta agko ako paninimbagan sa ngamin na tawo, sa manga sibilisado sagkud bukung sibilisado, sa agko inadalan sagkud uda inadalan. ¹⁵ Kaya amo yan a rason kin ngata ta minamawut ko saigo na ipangadal kaninyo siton Roma a Maraay na Bareta.

A Kapangyariyan ka Maraay na Bareta

¹⁶ Diri ko ikinasusupug na ipangadal a Maraay na Bareta manungud ki Cristo, holi ta amo adi a kapangyariyan ka Diyos tanganing maligtas a ngamin na nagtotobod, ona sa manga Judio, pangala sa manga bukung Judio. ¹⁷ Ta sa paagi ka Maraay na Bareta ipinababayad ka Diyos kin paono niya ginigibong matanos a tawo sa pagsilung niya. A katanosan na adi galin sa Diyos, sa paagi sana ka pagtobod uda na iba. Holi ta arug ka nasosorat sa Kasoratan, ?A tawong ginibo ka Diyos na matanos holi ka pagtobod niya, agko boway na uda kasagkuran.?

A Kasalan ka Tawo

¹⁸ Naayag galin sa langit a kaungtan ka Diyos kontra sa nagtotomang kanya sagkud karatan ka manga tawo, kin sari a maraut nirang gibo amo nag-uulang na maisiyan a kamatoranan. ¹⁹ Pinapadosaan sira ka Diyos holi ta iya mismo a malinaw na nagpaayag kanda ka manga bagay na pwede nirang maisiyan manungud kanya. ²⁰ Uda mananggayud na sira rason holi ta poon na lalangun niya a kinaban, malinaw na nabayad nira a nakatagong natoralesa niya na amo a kanyang kapangyariyan na uda kataposan sagkud a kanyang pagkaDiyos. Nabayad nira yan sa paagi ka manga bagay na ginibo niya.

²¹ Sagkud dawa isi nira na agko Diyos, diri pa nanggayud na nira iya tinawan sa kaomawan bilang Diyos, sagkud diri sira nagpasalamat kanya. Imbes, nagparaisip sira ka manga bagay na uda kamutangan, kaya nangitngitan a patal nirang pag-iisip. ²² Nagdodonong donongan sira, alagad linnolowas na manga patal sira. ²³ Tinalikokoran nira a kamorawayan ka Diyos na uda kagranan, sagkud a manga sinamba nira manga ritrato ka manga tawong agko kagranan, ka manga bayong, ka manga ayup na agko upat na tiil, sagkud ka manga ayup na nagkakanap.

²⁴ Kaya pinabayaan na sira ka Diyos sa kandang manga mararaut na kamawutan anggan sa natuud na sira sa paggibo ka kadostaan sa kada usad. ²⁵ Ibinalyo nira a kamatoranan manungud ka Diyos sa kabotigan. Nagsamba sagkud pinagsirbiyan nira so manga linalang, imbes na a Kaglalang na amo a kaipowan na omawun anggan pa man. Amen.

²⁶ Holi kadi, pinabayaan sira ka Diyos sa manga gibo nirang makasusupug. Ta dawa so manga babayi, abu nang makiolod sadto manga lalaki kinding sa kapareyo na nira babayi. ²⁷ Arug man kan so manga lalaki, abu ng makiolod sadto manga babayi kinding sa kapareyo na nira lalaki. Naggigibo sira sa kadostaan lalaki sa lalaki, kaya itinao na kanda a padosa na maninigo sa gibo nirang maraut.

²⁸ Holi ta abu nirang bistowon a Diyos, pinabayaan na niya sira sa maaati nirang kaisipan sagkud manga sala nirang gibo. ²⁹ Napono sira ka ngamin na klase sa karatan, kasalan, kapasluan, kaangapan sagkud bisyo. Manga ooriyun sira, manga paraguraan, parapakikasogot, madaya sagkud maati a isip. Manga tsismoso sira, ³⁰ manga paramoda, nauungut sa Diyos, manga uda maraay na ogali, mapagmataas sagkud maaablada, pirmi sirang nag-aanap sa paagi tanganing gomibo sa maraut, sagkud diri nagkokoyog sa manga kag-igin, ³¹ manga patal, manga bukung maimbod, manga uda pagkabuut sagkud pagkaerak sa kapwa. ³² Dawa ngani isi nira a Layi ka Diyos na nagsasabing kaipowan sanang guranun a siisay man na naggigibo kan, alagad padagos pa nanggayud na sira sa paggibo ka maraut sagkud inooyonan pa nira a manga naggigibo kadi.