28
Si Pablo sadto Isla ko Malta
1 Ko makalibri na kami sagkud nasa pangpang na, naisiyan namu na a islang adto binabaoy na Malta. 2 Maraay so pag-ako kanamu ko manga taga sadto. Nag-ooran sagkud maagnuw so panawon kadto kaya innamak sira sa kalayo sagkud pinadagos kami ngamin. 3 Si Pablo pinnorot sa manga igagatong. Ko ibinubutang na niya adto sa kalayo, linnowas so usad na rimoranun ta nainitan sagkud pinnuruput adi sadto kamut niya. 4 Ko mabayad ko manga taga sadto so rimoranun na nagkakalaykalay sadto kamut ni Pablo, nangag-osip-osip sira, ?Paraguraan a tawong adi, ta dawa nakaligtas iya sa dagat, diri man iya itinogot ka langit na maboway pa.? 5 Alagad so rimoranun iwinigtik ni Pablo sadto kalayo sagkud uda man basang nangyari kanya. 6 Inulat nirang bomaga so kamut niya o bigla iyang matomba sagkud magraan. Alagad ko mauban na sirang nagpaparaulat, nabayad nirang uda man nangyari kanya, nagbago so pag-una nira sagkud sinnabi sira na si Pablo usad na diyos.
7 Arani sa logar na adto so manga oma na a kagsadiri so namomoon ko islang adto, a ngaran niya Publio. Maraay so pag-ako niya kanamu, sagkud tolong alduw niya kaming nagin bisita. 8 Naupud man na so kag-igin na lalaki ni Publio kinakalintora sagkud agko disenteria. Binisita ni Pablo so nag-iilang, ipinangadyi, rinutaan ko kamut niya sagkud pinaraay. 9 Ko mangyari adto, inniyan sadto ki Pablo so ibang agko manga ilang sadto isla sagkud pinaraay niya sira. 10 Tinawan nira kami sa malakadakul na regalo ko kami pagalin na, sagkud pinabalonan kami ko kanamung kaipowan sa pagsakuy.
Pag-abot sadto Roma
11 Pagkalipas sa tolong bolan, linnonad kami sa usad na barkong nagpalabos sa tag-agnuw sa islang adto. Galin sa Alejandria a barkong adi na nakangaran sa darwang diyos na si Castor sagkud Pollux. 12 Rinnoong kami sa Siracusa sagkud nagtiner sadto sa tolong alduw. 13 Paggalin sadto nagsakuy kami sagkud nakaabot sa Regio. Kinaudmaan, innangin sa habagat galin sa timog, sagkud ko somonod na alduw naabot namu so Puteoli. 14 Nakasompong kami sadto sa nagkapirang ngod sa pagtobod na nag-imbitar kanamung magpalipas sa usad na simana sadto kanda. Pangala nakaabot na kami sa Roma. 15 Nabaretaan ko manga kangoran sadto Roma na omaabot na kami kaya linnonad sira paiyan sa plasa ko Apio sagkud sa Tolong Panikan na Baluy tanganing sabatun kami. Ko mabayad ni Pablo so manga tawong adto, nagpasalamat iya sa Diyos sagkud kinnusug so kanyang buut. 16 Pag-abot namu sadto Roma, tinogotan iyang magkaagko istaran, kaiba so usad na gwardiya na migbantay kanya.
17 Pagkalipas sa tolong alduw, ipinabaoy ni Pablo so manga namomoon ko manga Judio sadto. Ko matipon na sira, sinabi ni Pablo kanda, ?Manga ngod, dawa uda ako naginibong katomangan sa kanatung nasyon o kontra sa manga kaogalian ka manga ginikanan ta, inaresto ako sadto Jerusalem sagkud itinao sa manga Romano. 18 Pagkaimbistegari nira kanaku, gosto na kintana akong palibriyun, ta uda man ako naginibong sala tanganing osgaran sa kagranan. 19 Kindi ko komontra so manga Judio, napiritan akong romapo sa Emperador dawa uda ako isosombong kontra sa manga kapareyo tang Judio. 20 Amo adi a rason kin ngata ta gosto ko kamong mabayad sagkud makaosip. Nakakadenaan ako holi ki Jesus, na amo a paglaom ka manga Israelita.?
21 Sinnimbag sira, ?Diri kami nakarisibi sa ono man na sorat galin sa Judea manungud kanimo sagkud so manga ngod ta man na innabot sadi, diri nagbareta o nag-osip sa maraut kontra kanimo. 22 Alagad gosto namung marungug a manga oosipun mo, ta isi namu na a manga tawo dawa sari nag-oosip kontra ka sektang adi.?
23 Kaya binnutang sira sa alduw kin kono kakaosipun si Pablo, sagkud kadakul na tawo so inniyan sadto logar kin sari iya nakaistar. Poon sa ramrag anggan sa gab-i inisplikar niya sagkud sinabi kanda a Kahadian ka Diyos sagkud iningoa na kombinsirun sira manungud ki Jesus sa paagi ko Layi ni Moises sagkud ko manga propeta. 24 So nagkapira nagtobod ko sinabi niya, alagad so iba diri nagtobod. 25 Ta diri sira nagkaoyon, ginnalin sira pagkasabi ni Pablo kadi, ?A Espirito Santo sinabi a matood sadto manga ginikanan ninyo sa paagi ni Propeta Isaias.
26 ?Omiyan ika sa manga tawong adi sagkud sabiyun na:
Makarungug man kamo, alagad diri kamo makaiintindi;
somilung man kamo, alagad diri kamo makababayad.
27 Ta nagin makusa a poso ka manga tawong adi;
dipisil makarungug a kandang manga talinga,
sagkud pinirung so kandang manga mata.
Ta kin diri, nakabayad kintana a kandang manga mata,
nakarungug a kandang manga talinga,
nakaintindi a kandang manga poso
sagkud binnalik kanaku, tanganing parayun ko sira.? ?
28 ?Kaya gosto ko ng maisiyan ninyo na a mensayi ka Diyos manungud ka kaligtasan naipadara sa manga bukung Judio sagkud mig-irungug sira!? 29 Pagkatapos niyang sabiyun adi, so manga Judio ginnalin na, na nagdidiskotir sa kada usad.