4
Si Pedro sagkud si Juan sa Atobangan ko Konseho
1 Innabot so manga padi, so kapitan ko manga gwardiya sadto templo sagkud so manga Saduceo, mantang si Pedro sagkud si Juan nag-oosip pa sadto manga tawo. 2 Naungut sira saigo ta so manga apostol nagtotottoro sadto manga tawo na si Jesus naboway otro, na nagpapatonay na a guraan maboboway otro. 3 Kaya rinakup nira si Pedro sagkud si Juan, alagad ilinuug ngona sira sa prisowan anggan na magramrag, ta gab'i na kadto. 4 Alagad dakul na manga nakarungug ko mensayi so nagtobod ki Jesus, sagkud so bilang ko manga kalalakiyan innabot sa singko mil.
5 Sonod na alduw, so manga namomoon, so manga kagogorangan sagkud so manga paratottoro sa Layi, nangagtipon sadto Jerusalem. 6 Isadto man si Anas, na pinakanamomoon ko manga padi, sagkud sira si Caipas, Juan, Alejandro sagkud so iba pang kalalakiyan na kaiba sa pamilya ko pinakanamomoon ko manga padi. 7 Pangala si Pedro sagkud si Juan dinara sadto atobangan nira sagkud pinonan na ongaun: ?Sa onong kapangyariyan o kiisay na ngaran ninyo adi ginigibo??
8 Si Pedro na pospos ko Espirito Santo, sinnabi kanda, ?Manga namomoon sagkud manga kagogorangan! 9 Kin ipinabaoy ninyo kami ngowan tanganing ongaun manungud ko karayan na ginibo sadto lalaking lopog sagkud kin paono iya naraay, 10 kaipowan ninyong maisiyan, kamo sagkud a ngamin na tawo sa Israel: Sa ngaran ni Jesu Cristo na taga Nazaret, na ipinapako ninyo sa kros, alagad binoway otro ka Diyos, a lalaking adi na nagtitindug sa atobangan ninyo, naraay. 11 A Jesus na adi amo a sinasabi ka Kasoratan na
?A batong isinikwal ninyo manga paratogrok,
amo a nagin pondasyon.? a
12 A kaligtasan diri matotorakan sa kiisay pa man, ta uda na ibang ngaran sa irarum ka langit a itinao sa manga tawo na makaliligtas kanatu.?
13 Ko mabayad ko Konseho so kaisugan ni Pedro sagkud ni Juan lalo na ko maisiyan nira na diri sira nakapag-eskwela sagkud manga ordinaryong tawo sana nangalas sira. Naisiyan man nira na a manga tawong adi dating korokaiba ni Jesus. 14 Mantang nababayad nira so lalaking pinaraay na nakatindug kaabay ko manga apostol, uda sira maisimbag. 15 Kaya, minandaan nira si Pedro sagkud si Juan na gomalin ngona pangala nag-osip-osip sira, 16 sagkud sinnabing, ?Ono a gigibowon ta sa manga lalaking adi? Ngamin na nakaistar sadi Jerusalem nakaiisi na nakagibo sira sa kakaibang ngangalasan, sagkud diri ta iyan maninigaran. 17 Alagad tanganing mapondo a pagluyap ka manga bagay na adi sa manga tawo, kaipowan tang pataniran a manga lalaking adi na diri na magparaosip sa kiisay pa man sa ngaran ni Jesus.?
18 Pangala binaoy nira otro si Pedro sagkud si Juan, sagkud pinataniran na diri na magparaosip o magparatottoro sa ngaran ni Jesus. 19 Alagad si Pedro sagkud si Juan sinnimbag: ?Kamo a omosgar kin ari a tama sa atobangan ka Diyos: a komoyog kaninyo o komoyog sa Diyos. 20 Ta diri pwedeng diri namu sabiyun a manungud ka manga nabayad sagkud narungug namu.?
21 Pagkatapos sirang pataniran saigo, pinagalin na sira. Diri makapagdisisyon so Konseho kin paono sira padodosaan, ta so ngamin na tawo nag-oomaw sa Kagorangnan ko manga nangyari. 22 Ta so lalaking milagrong naraay sobra ng kwarenta so edad.
A Pangadyi ko manga Paratobod
23 Ko palowasun na si Pedro sagkud si Juan binnalik na sira sadto manga kaiba nira sagkud sinabi so ngamin na sinabi kanda ko namomoon ko manga padi sagkud ko manga kagogorangan. 24 Ko marungug nira adi, nagkausad sirang mangadyi, sagkud sinabi nira, ?Kaoroalangkawing Diyos, kaggibo ka langit sagkud kinaban, ka dagat, sagkud ka ngamin na isan. 25 Ika nangosip sa pangongona ka Espirito Santo sa paagi ka kanimong mamandaan, a kanamung amang si David,
?Ngata ta a manga nasyon nauungut
sagkud a manga tawo nagpaplano sa maraut?
26 A manga hadi sadi kinaban nag-aandang lomaban
sagkud a manga namomoon nangagtitipon
kontra sa Kagorangnan
sagkud kontra sa pinili mo!? b
27 Kaya si Herodes sagkud si Poncio Pilato, nangagtipon kaiba so manga bukung Judio sagkud manga tawo sa Israel sa syodad na adi tanganing magkauusad kontra sa banal mong mamandaan na si Jesus, na kanimong pinili. 28 Ginibo nira so ngamin na bagay na kaipowan na mangyari na plinano mo kadto pa. 29 Ngowan Kagorangnan, silngan mo a manga pagtatatakot nira. Tabangan mo a kanimong manga mamandaan na makapagtottoro na agko kakusugan sa buut. 30 Unatun mo a kanimong kamut tanganing makapagparaay sagkud makagibo sa ngangalasan sagkud manga milagro sa ngaran ka kanimong banal na mamandaan na si Jesus.?
31 Pagkatapos nirang mangadyi, sadto logar na kin sari sira nangagtipon, nayugyug. Sagkud napospos sira ngamin sa Espirito Santo sagkud makusug so buut nira na nagpaayag ko oosipun ka Diyos.
Nangagtatabang so Ngamin na Paratobod
32 So ngamin na paratobod nagkauusad sa poso sagkud isip. Uda sinnabi na a sa kanya, kanya sana, kindi para sa ngamin ono man na agko sira. 33 Sa paagi ka dakulung kapangyariyan, so manga apostol padagos na nagpatonay ko pagkaboway otro ni Jesus na Kagorangnan, sagkud dakul pang biyaya so itinao ka Diyos kanda ngamin. 34 Uda kanda nagkolang sa ono man. Ta so kada usad na agko sadiring raga o manga baluy ipinapabakal, sagkud dinadara nira so kabaklan 35 sagkud itinatao sadto manga apostol, sagkud itinatao man adi sa kada usad sigon sadto kandang pangangaipo.