5
Si Ananias sagkud si Safira
1 Alagad agko usad na lalaki na a ngaran Ananias, kaiba so kanyang agom na si Safira, na nagpabakal man ko raga nira. 2 Pagkapabakalan nira, itinago ni Ananias so ibang sintabo ko kabaklan, isi adto ko agom niya. Pangala dinara niya so natuda ko kabaklan sagkud itinao sadto manga apostol.
3 Kaya sinnabi si Pedro, ?Ananias, ngata ta nagpadaug ika ki Satanas sagkud nagbotig sa Espirito Santo? Itinago mo so ibang kwarta na kabaklan ko raga mo? 4 Bukung sadiri mo na so raga bago mo pa ipabakal? Sagkud pagkatapos na ipabakal mo, bukung kanimo so kabaklan? Ono ta naisipan mong gibowon a bagay na adi? Diri ika nagbotig sa tawo kindi sa Diyos.?
5 Ko marungug adi ni Ananias, natomba iya sagkud nagraan. So ngamin na nakarungug ko pangyayaring adto nakatakot. 6 Pangala inniyan so manga soltero sadto onaan, pinotos so awak niya, sagkud binoligan palowas sagkud ilinubung.
7 Pagkaagi sa tolong oras so agom niya innabot na uda pagkaisi kin ono so nangyari. 8 Inonga iya ni Pedro, ?Sabiyun mo kanaku, amo talaga adi so ngamin na nakoko mo sagkud ni Ananias na kabaklan ko raga ninyo??
?Opo,? simbag niya, ?amo yan so presyo.?
9 Sinabi ni Pedro kanya, ?Ngata ta pinagkausaran ninyong porbaran a Espirito ka Kagorangnan? Silngi! So manga soltero na naglubung ko agom mo san na pwertaan, sagkud ika naman a boboligan nira palowas.?
10 Ko oras man sanang adto natomba iya sadto agko paniilan ni Pedro sagkud nagraan. Pangala, so manga soltero linnuug, sagkud nabayad na guraan na iya, kaya binoligan iya nira sagkud ilinubung kaabay ko agom. 11 Dakulung pagkatakot so namatian ko bilog na simbaana sagkud so ngamin na nakarungug manungud ka nangyaring adi.
Kadakul na Pinaraay so manga Apostol
12 Ginnibo sa kadakul na milagro sagkud ngangalasan so manga apostol sa atobangan ko manga tawo. Sagkud so ngamin na paratobod nagtipon sadto Asotiya ni Solomon. 13 Uda ni usad man na bukung paratobod na inniba kanda, dawa ngani iginagalang sira ko manga tawo. 14 Alagad nagparadakul so manga lalaki sagkud babayi na nagtotobod sa Kagorangnan so inniba kanda. 15 So kinalowasan, dinara ko manga tawo so manga agko ilang sadto tinampo sagkud pinabatang sira sa katre sagkud banig tanganing sa pag-agi ni Pedro malindongan basang so iba kanda ko annino niya. 16 Innabot man so kadakul na tawo galin sa manga banwaan na nakapalibot sa Jerusalem, dara so manga nag-iilang sagkud so manga sinasaniban sa maraut na espirito, sagkud sira ngamin naraay.
Pinadipisilan so manga Apostol
17 So pinakanamomoon ko manga padi sagkud so ngamin niyang kaiba, na manga miyembro sa gropo ko manga Saduceo, napono sa pagkaibug. 18 Kaya rinakup nira so manga apostol sagkud ipinapriso. 19 Alagad ko gab'i man sanang adto, a anghel ka Kagorangnan binoksan so pwertaan ko prisowan, sagkud ilinowas sira. 20 ?Pomaiyan kamo sadto templo,? sabi ko anghel, ?sagkud sabiyun ninyo sadto manga tawo a kompletong mensayi manungud sa bagong boway na adi.?
21 So manga apostol kinnoyog, sagkud ko mararamragun na, inniyan sira sadto templo, arug ko sinabi kanda, sagkud pinnoon ng magtottoro sadto manga tawo.
Ko so pinakanamomoon ko manga padi sagkud so manga kaiba niya innabot, ipinabaoy nira so Konseho sagkud so ngamin na kagogorangan sadto Israel. Pagkatapos, ipinakoko nira sadto prisowan si Pedro sagkud si Juan. 22 Alagad pag-abot ko manga opisyal sadto prisowan, diri nira natorakan so manga apostol. Kaya, binnalik na sira sagkud sinnabi. 23 ?Naabotan namu na nakakandado so prisowan, nababantayan ko manga gwardiya na nakatindug sadto pwertaan, alagad ko boksan na namu, uda kami nabayad ni usad sadto luug.? 24 Ko marungug adi ko kapitan ko manga gwardiya sadto templo, sagkud ko manga namomoon ko manga padi, napaisip sira sagkud nangalas kin paono adto nangyari.
25 Pangala agko innabot sagkud nagbareta kanda na sinnabi, ?So manga lalaking ipinapriso ninyo nakatindug sadto templo, nagtotottoro sadto manga tawo.? 26 Kaya inniyan sadto templo so kapitan sagkud so manga soldados sagkud rinakup so manga apostol. Diri sira naggamit sa kusug, ta nakatakot sira na baka batowon sira ko manga tawo.
27 Dinara nira so manga apostol sagkud iinatobang sadto manga kagogorangan, sagkud so pinakanamomoon ko manga padi pinonan sirang pag-ongaun, 28 sagkud sinnabi, ?Pinagbawalan namu kamo saigo na magtottoro sa ngaran ni Jesus, alagad silngi ninyo kin ono a ginigibo ninyo! Pinagluyap ninyo a kaninyong katottoroan sa bilog na Jerusalem sagkud gosto ninyong basolon kami ka manga tawo sa pagkagraan niya.?
29 Si Pedro sagkud so ibang manga apostol sinnimbag, ?Kaipowan namung koyogon a Diyos ki sa manga tawo! 30 A Diyos ka manga ginikanan ta binoway si Jesus, na ginuraan ninyo ko ipako iya sa kros. 31 Itinaas iya ka Diyos sa too niya bilang Prinsipe sagkud Paraligtas, tanganing tawan so manga Israelita sa panawon na makapagsulsul sagkud tomalikod sa kandang manga kasalan tanganing sira patawarun. 32 Kami a migpatonay ka manga bagay na adi, magin a Espirito Santo, na itinao ka Diyos sa manga kinnokoyog kanya.?
33 Ko marungug adi ko Konseho, mala nira kaungut sagkud gosto nirang ipaguraan so manga apostol. 34 Alagad, usad kanda tinnindug sadto atobangan ko manga kagogorangan na a ngaran Gamaliel, usad iyang Pariseo, paratottoro sa Layi, sagkud iginagalang ka ngamin na tawo. Nagmanda iya na ilowas ngona so manga apostol sa gatikot na panawon. 35 Pangala sinabiyan niya sira, ?Manga kapareyo kong Israelita, isipa ninyo saigo a manga pinaplano ninyong gibowon sa manga tawong adi. 36 Diri pa nauuban innabot si Teudas na nagsaginsagin na bistadong tawo, sagkud sinnonod kanya so kwarentang kalalakiyan. Alagad nagraan iya, sagkud so ngamin na parasonod niya nagkasowaysoway, sagkud nauda so gropo nira. 37 Pagkatapos, si Judas na tagaGalilea nagpabayad ko panawon sa pagpapalista sagkud sinnonod man kanya so dakul na tawo, alagad nagraan man iya kaya so ngamin niyang parasonod nauda man sana. 38 Kaya sa manga nangyayaring adi ngowan, sinasabiyan ko kamo: Diri ninyo pagpakilabutan a manga tawong adi! Bayaan ninyo sira. Ta kin a kandang katoyowan o a manga ginigibo nirang adi galin sa tawo, mauuda man sana. 39 Alagad kin adi galin sa Diyos, diri ninyo sira madadaug, lomolowas pa logod na kamo a kinnokontra sa Diyos.?
40 Sinonod ko Konseho so sinabi ni Gamaliel. Kaya ipinabaoy nira so manga apostol na lomuug, pangala ipinabanug sagkud pinataniran na diri na magtottoro sa ngaran ni Jesus, sagkud pinagalin na sira.